《CTT出頭天園地》

 | | | 轉寄

I-sap 寓言 50

作者 TLH 2008.01.27

50. Thò͘-á Kap ku

Ū tsi̍t-pái, thò͘-á pûn ke-kui kóng, i tsáu ê sok-tō͘ pí pa̍t-lâng lóng khah kín, bô lâng ē pí--tit. I kóng, “Guá nā piàⁿ-miā tsáu, tsîng kàu-taⁿ m̄-bat su--kuè! Guá thìng-hó kā só͘-ū ê tōng-bu̍t thiau-tsiàn.” Ku tsin líng-tsīng kā ìn kóng, “Nā án-ne, guá tsiap-siūⁿ lí ê thiau-tsiàn.’’

Thò͘-á kóng, “Tshiò sí lâng! Liân lí iā káⁿ beh hâm guá pó-sài! Guá tsua̍t-tuì kui-lō͘ lóng tsáu iâⁿ--lí.“

Ku kóng, “Tī lí liáu-buē su tsìn-tsîng, tsò lí tsīn-liōng tshàu-phuì, bô iàu-kín.”

In suî tsiū khai-sí pí-sài.

Thò͘-á tsi̍t-ē-á tsiū tsáu kàu bô khuàⁿ-kì iáⁿ. M̄-kú tsin-kín tsiū thîng--lo̍h--lâi, ua̍t-thâu tshiò ku tsiâⁿ-si̍t m̄-tsai thiⁿ ū juā-kuân, tē ū juā-kāu. Tshiò suah, tsiū tó tī tsháu-á-po͘ hioh-khùn, put-ti put-kak suà khùn--khì.

Ku tsi̍t-pō͘ tsi̍t-pō͘ bān-bān-á pê, lóng bô thîng. Thò͘-á khùn-tshéⁿ ê-sî, khuàⁿ-tio̍h ku í-king teh beh pê kàu bué-tsām. Tsit-sî, i koh-khah án-tsuáⁿ piàⁿ sèⁿ-miā tsáu mā bô huat-tō͘ kā ku jiok--tio̍h lah.

Tsò tāi-tsì iáu-sī ài kha ta̍h si̍t-tē, jīn-tsin phah-piàⁿ tsiah ē sîng-kong.