《CTT出頭天園地》

 | | | 轉寄

I-sap 寓言 4

作者 TLH 2007.03.11

4. Tshī Iûⁿ-á ê Gín-á

　Ū tsi̍t-ê tshī-iûⁿ ê gín-á kā i ê iûⁿ-á kuáⁿ kàu suaⁿ-kha ê tshiū-nâ khì tsia̍h tsháu. I kui-ji̍t lóng bô phuāⁿ, tsiū siūⁿ-khang siūⁿ-phāng beh tsè-tsō tshì-khik. I tsáu-ji̍p tsng-lāi, tuā siaⁿ huah kóng, “Ū iá-lông o͘h, ū iá-lông o͘h!” Tsng-lāi ê lâng thiaⁿ--tio̍h, suî tsông--tshut--lâi; ū--ê tsin kín tsiū tsáu kàu i hia. Tsit-ê gín-á kám-kak án-ne si̍t-tsāi ū-kàu sim-sik. Kuè bô kuí-ji̍t, i tsiū koh tshì tsi̍t-pái. Tsng-lāi ê lâng iáu-sī kāng-khuán tsáu-tsut-lâi beh kā i tàu-saⁿ-kāng. Tāi-ke huat-hiān tsit-ê gín-á iū-koh teh kóng pe̍h-tsha̍t, lóng tsin siū-khì.

　Kuè bô kuí-ji̍t, tshiū-nâ lāi tsiâⁿ-si̍t tshut-hiān tsi̍t-tsiah tuā iá-lông. Tsit-ê gín-á khai-sí kín-tiuⁿ, huân-ló i ê iûⁿ-á. Tsit-pái i tong-jiân pí í-tsîng koh khah tuā siaⁿ huah, “Iá-lông lâi lah, iá-lông lâi lah!” M̄ -kú, hia-ê í-king hō͘ i phiàn kuè 2 pái ê lâng, siūⁿ kóng tsit-ê gín-á iū-koh teh tshòng-tī--lâng lah! Bô puàⁿ-ê lâng beh tshap--i. Só͘-í, iá-lông tsiū kā iûⁿ-á tsia̍h liáu-liáu, tsia̍h kàu pá-thong-thong.

　Tng tsit-ê gín-á teh uàn-thàn bô lâng tàu-saⁿ-kāng ê sî, tsng--ni̍h ê tióng-puè kā kóng, “Tsún-kóng lí tsi̍t-ê pián-sian-á tsit-pái só͘ kóng--ê khak-si̍t sī tsin--ê, mā bô lâng ē siong-sìn lah!”