《CTT出頭天園地》

 | | | 轉寄

I-sap 寓言 5

作者 TLH 2007.03.18

5. Siàu-liân Tsha̍t-thau kap I ê Lāu-bú

　　Ū tsi̍t-ê siàu-liân-lâng in-uī tsò tsha̍t hông lia̍h--khì, huat-kuaⁿ kā phuàⁿ-tsuē tio̍h tsē-kaⁿ. Tī beh kuaiⁿ-ji̍p kaⁿ-ga̍k tsìn-tsîng, i iau-kiû kìⁿ i ê lāu-bú tsi̍t-bīn.

　In bú-á-kiáⁿ kìⁿ-bīn ê sî, i tuì lāu-bú kóng, “Guá siūⁿ beh kā lí kóng sè-siaⁿ uē.” I ê lāu-bú tsiū kiâⁿ uá--khì. In lāu-bú tsi̍t àⁿ-thâu, i suî tuì lāu-bú ê hīⁿ-á kā kā--lo̍h--khì. Piⁿ--á ê lâng khuàⁿ-tsi̍t-ē lóng tshuah-tsi̍t-tiô, mē i sī tsuáⁿ-iūⁿ tsò tsiah-ni̍h tsho͘-ló͘ bô jîn-sìng ê tāi-tsì.

　I ìn-kóng, “Tse sī i ê pò-ìng! Guá sè-hàn thâu-tsi̍t-pái kā lâng thau-the̍h mi̍h-kiāⁿ tńg-khì tshù--ni̍h ê sî, i m̄-nā bô tsik-pī--guá, tshú-hua̍t--guá, huán-tò-tńg tshiò-tshiò-á kā guá kóng, bô lâng ē huat-hiān lah! Tsiū-sī in-uī i, guá kin-á-ji̍t tsiah ē piàn án-ne!”

　Ū tsi̍t-ê Bo̍k-su kóng, “Hū-jîn-lâng ah, lín kiáⁿ kóng--ê bô m̄-tio̍h! Siōng-tè kóng, ‘Kàu-ióng gín-á tio̍h īng ha̍p-gî ê huat, án-ne kàu-lāu iā bē uai-tshua̍h.’ ”