《CTT出頭天園地》

 | | | 轉寄

I-sap 寓言 15

作者 TLH 2007.05.27

15. Sai ê Tsú-tiuⁿ

Ū tsi̍t-ji̍t, sai, hô͘-lî, tshâ-lông kap iá-lông tsò-tīn khì phah-la̍h. In tī tsháu-iûⁿ tíng-bīn tsáu-tsông kui-ji̍t, tsiah lia̍h-tio̍h tsi̍t-tsiah lo̍k-á. In kā lo̍k-á thâi--sí liáu-āu, būn-tuê tio̍h lâi lah. Tsit tsiah lo̍k-á ài án-tsuáⁿ pun tsiah ē kong-pêⁿ?

Sai tuā-siaⁿ huah kóng, i beh ti̍h tsuân-pō͘ ê sì-hūn-tsi-it. In tsiū kā hit-tsiah lo̍k-á thiah tsò sì-tè. Sai kiâⁿ-kuè-khì khiā tī lo̍k-á-bah thâu-tsîng beh tsò tshâi-phuàⁿ.

I kóng, “Tē-it-ê sì-hūn-tsi-it ài sàng hō͘ Pah-siù-tsi-ông; tē-jī-ê sì-hūn-tsi-it ài hō͘ tsò tshâi-phuàⁿ--ê; tē-saⁿ-tè sī guá ê, in-uī guá tsham-ka tsit-pái ê phah-la̍h; bué-á tsit-tè, guá siūⁿ beh khuàⁿ lín sím-mi̍h lâng káⁿ kā the̍h khì tsia̍h!”

“Hn̍gh!” hô͘-lî tsin put-buán kiâⁿ lī-khui. Ná kiâⁿ ná se̍h-se̍h-liām, “Guán guān-ì kap lí tsò-tīn phah-piàⁿ, m̄-kú lí bô ìng-kai ka-kī hiáng-siū sîng-kó.”