《CTT出頭天園地》

 | | | 轉寄

I-sap 寓言 16

作者 TLH 2007.06.03

16. Lông kap Ho̍h

Tsi̍t-tsiah lông teh hiáng-siū i ê la̍h-mi̍h. Bô tiuⁿ-tî, tsi̍t-ki kut-thâu khê tī nâ-âu-kńg--ni̍h, thun bē lo̍h--khì, mā kha̍k bē tshut--lâi. I kám-kak nâ-âu tsin thiàⁿ, tsin thòng-khó͘. Tī hia tsông-lâi tsông-khì, ná tsông ná ai. I sì-kuè khì thó kiù-ping. I kóng nā ū lâng ē-tit-thang kā hit-ki kut-thâu the̍h--tshut--lâi, m̄-kuán sím-mi̍h tiâu-kiāⁿ, i lóng guān-ì tap-ìng.

Tsi̍t-tsiah ho̍h kóng beh tshì khuàⁿ māi. I kiò lông tó--lo̍h--khì, kā tshuì khui hō͘ tuā-tuā-ê. Ho̍h kā tn̂g-tn̂g ê tsiam-tshuì-kóng kap ām-kún tshun-ji̍p-khì lông ê nâ-âu-kńg--ni̍h, kā hit ki kut-thâu ngeh--tshut--lâi. Ho̍h tuì lông kóng, “Kiám ū-iáⁿ kóng guá beh ài-ti̍h sím-mi̍h mi̍h-kiāⁿ lóng ē-sái--tit?”

Lông gê-á giàng-giàng, iōng im-tîm ê siaⁿ kóng, “Lí ài ti-tsiok ah lah! Lí kā lí ê thâu khǹg ji̍p-khì lông ê tshuì lāi, ē-tàng pîng-an kiu--tshut--lâi, án-ni kiám bô kàu hó-ūn? Tsit-khuán pò-tap kiám bô-kàu gia̍h?”

Ah-pà ê lâng sī bô khó-lîng ē kám-un--ê.