《CTT出頭天園地》

 | | | 轉寄

I-sap 寓言 17

作者 TLH 2007.06.10

17. Tsa-po͘-lâng kap I ê Nn̄g-ê-bó͘

Kó͘-tsá sî-tāi, tsa-po͘-lâng ē-sái ū kuí-nā-ê bó͘. Tsi̍t-ê tiong-liân-lâng ū tsi̍t-ê lāu-bó͘ kap tsi̍t-ê siàu-liân-bó͘; nn̄g-ê bó͘ lóng kap i tsiok hó, mā lóng hi-bāng tit-tio̍h ang-sài ê thiàⁿ-sioh.

Tng tsit-ê tsa-po͘-lâng thâu-mo͘ tsiām-tsiām piàn phú-sik ê sî, siàu-liân-bó͘ tsin bô huaⁿ-hí, in-uī i bô-ài i ê ang-sài khuàⁿ--khí--lâi siuⁿ lāu. Só͘-í muí-àm i lóng lī-iōng kā ang-sài lua̍h thâu-mo͘ ê sî, kā pe̍h-thâu-mo͘ bán--khí--lâi. M̄-kú khah lāu ê bó͘ tsin huaⁿ-hí khuàⁿ-tio̍h i ê ang-sài thâu-mo͘ tsiām-tsiām piàn phú-sik, in-uī i bô ài hō͘ lâng lia̍h-tsò sī ang-sài ê lāu-bú. Só͘-í i muí tsá-khí lóng lī-iōng tsíng-lí ang-sài thâu-mo͘ ê sî-tsūn, tsīn-liōng kā tsē-tsē ê o͘-thâu-mo͘ tshuah--khí--lâi. Kiat-kó, tsit-ê tsa-po͘-lâng bô juā-kú tsiū bô puàⁿ ki thâu-mo͘ lah, tsi̍t-lia̍p thâu-khak kim-sih-sih, tshiūⁿ tiān-hué kiû-á!

Ū-tit, tsiū ū-sit.