《CTT出頭天園地》

 | | | 轉寄

I-sap 寓言 30

作者 TLH 2007.09.09

30. Siáu-thiú-á kap Tsng-kha-lâng
Tsng-kha nāu-jia̍t ê sî, ū tsi̍t-ê siáu-thiú-á teh piáu-ián bô͘-hong ta̍k-tsióng tōng-bu̍t ê kiò-siaⁿ, ta̍k-ê lóng khuàⁿ-kàu tshiò-ha-ha. Siōng lō͘-bué, i koh o̍h ti-á ki-ki kiò, o̍h kàu tsiok sîng. Khuàⁿ nāu-jia̍t ê lâng long siūⁿ-kóng i sin-khu tiāⁿ-tio̍h ū tshàng tsi̍t-tsiah ti-á.


M̄-kú, ū tsi̍t-ê guā-tsng-lâng khiā tī piⁿ--á kóng, “He ná-sī ti-á ê kiò-siaⁿ! Tsi̍t-tiám-á tio̍h bô sîng. Bîn-á-tsài guá tsiah hō͘ lín thiaⁿ khuàⁿ ti-á ê kiò-siaⁿ sī seⁿ-tsò siáⁿ-khuán.”

Keh-tńg-kang, hit-ê lâng tsiâⁿ-si̍t peh-tsiūⁿ bú-tâi, thâu-khak lê-lê, o̍h ti-á ki-ki-kiò, kiò bô thîng koh tsin tshò-hīⁿ. Kuan-tsiòng thiaⁿ liáu tsin sit-bōng, lóng kā mē, koh kā tìm tsio̍h-thâu-á kiò i tiām--khì.


“Lín tsiah-ê giàn-thâu--ê!” i khui-tshuì tuā-siaⁿ jiáng, “ Lí tàu-té sī bat siáⁿ!”. I ná jiáng ná kā tshàng tī hiû-á lāi ê ti-á-kiáⁿ lia̍h--tshut--lâi, tshiú kā ti-hīⁿ-á khiú tiâu-tiâu. Guân-lâi sī tsiàⁿ-káng ê ti-á teh ki-ki-kiò.

Ké--ê thong-lâng o-ló, tsin--ê lâng suà hiâm tshàu--tsho.