《CTT出頭天園地》

 | | | 轉寄

I-sap 寓言 42

作者 TLH 2007.12.02

42. Seⁿ Kim-nn̄g ê Gô-bó

Tsi̍t-ê tsng-kha lâng tī i ê gô-siū khioh-tio̍h tsi̍t-lia̍p n̂g-n̂g kim-kim ê gô-nn̄g, the̍h- tio̍h tshiūⁿ iân hiah-ni̍h tāng. I kiaⁿ tsi̍t-tiô, sim-lāi siūⁿ-kóng, it-tīng sī ū lâng teh kap i kún sńg-tshiò, kuáⁿ-kín kā tàn-tiāu.

Kuè tsi̍t-ē-á, i kuat-tīng beh sing kā khioh tńg-khì khuàⁿ māi leh. Āu--lâi, i huat-hiān hit-lia̍p gô-nn̄g kìng-jiân sī sûn n̂g-kim--ê, hui-hiông huaⁿ-hí.

Tsū hit-kang khai-sí, ta̍k tsá-khí gô-bó lóng ē seⁿ tsi̍t-lia̍p kim-nn̄g. I tsin-kín tsiū piàn-sîng tsi̍t-ê hó-gia̍h lâng. I jú-lâi jú hó-gia̍h, khiok jú-lâi jú tham-sim. I tsin hò͘ⁿ-kî, siūⁿ beh tsai-iáⁿ gô-bó ê pak-tō͘ lāi tàu-té ū juā-tsē kim-nn̄g, sī án-tsuáⁿ bô beh tsò tsi̍t-khùn kā kim-nn̄g lóng seⁿ--tshut--lâi? Tsiū kā gô-bó thâi--sí, beh khuáⁿ tsi̍t-ē-á kiù-kìng. Siūⁿ bē kàu, gô-bó pak-tó͘ lāi liân tsi̍t-lia̍p nn̄g mā bô!