《CTT出頭天園地》

 | | | 轉寄

I-sap 寓言 41

作者 TLH 2007.11.25

41. Lô͘-lē kap Sai

Ū tsi̍t-ê lô͘-lē kiò A-Bûn, tuì i ê tsú-lâng hia thau-tsáu--tshut--lâi, bih tī tshiū-nâ-lāi. I khuàⁿ-tio̍h tsi̍t-tsiah Sai tó-tī thô͘-kha haiⁿ-haiⁿ-tshan. I tshuah tsi̍t-tiô, ua̍t-thâu tsiū tsáu. M̄-kú, Sai bô kā jiok. I kám-kak tsin kî-kuài, tsiū se̍h huán-thâu, kiâⁿ uá khì Sai ê sin-khu-piⁿ kā khuàⁿ. Sai khuàⁿ i kiâⁿ uá--lâi, tsiū kā lâu-hueh lâu-tih koh tsíng-uaiⁿ-uaiⁿ ê kha-tê-á tshun-tshut-lâi hō͘ i khuàⁿ. Guân-lâi Sai ê kha-tê-á hō͘ tsi̍t-ki tuā-ki tshì tsha̍k--tio̍h. A-Bûn tsiū kā hit-ki tshì pue̍h--khí--lâi, koh kā khang-tshuì pau hō͘ hó-sè.

Sai suî ē-tàng khiā--khí--lâi, koh tshin-tshiūⁿ káu-á kāng-khuán tsīⁿ A-Bûn ê tshiú. Āu--lâi, Sai tsiū tshuā A-Bûn khì i ê siū. Ta̍k-kang lóng khì tshuē bah lâi hō͘ A-Bûn tsia̍h. A-Bûn tsiū tsiām-sî kap Sai tuà tsò-hué, bô siū-tio̍h iau-gō.

Kuè bô juā-kú, A-Bûn kap Sai lóng hō͘ lâng lia̍h--khì. A-Bûn hō͘-lâng phuàⁿ-hîng, kuaiⁿ ji̍p-khì láng-á-lāi. Sai mā hō͘ lâng kuaiⁿ tī līng-guā tsi̍t-ê láng-á lāi. Tsi̍t-ji̍t, Hông-tè kap huat-kuaⁿ lâi beh khuàⁿ Sai kap lâng piàⁿ seⁿ-sí. A-Bûn hō͘ lâng tshuā lâi kàu tsi̍t-ê îⁿ-hîng ê pí-sài-tiûⁿ. Tsit-sî í-king iau kuí-nā kang ê Sai mā hō͘ lâng tuì láng-á lāi pàng--tshut-- lâi. Sai tsi̍t-khuàⁿ-tio̍h lâng-iáⁿ, tsiū khai-sí tuā-siaⁿ âu-kiò, suî tsông kuè-khì beh kā tsia̍h. Sai tsông uá-kīn A-Bûn ê sî, suî jīn-tshut sī i ê hó pîng-iú. I tsiū thîng lo̍h-lâi tuì A-Bûn iô bué-liu, tsīⁿ A-Bûn ê tshiú, tshin-tshiūⁿ káu-á kāng-khuán.

Hông-tè khuàⁿ-tio̍h tsit-khuán tsîng-kíng, kám-kak tsin ì-guā, tsiū kā A-Bûn kiò-kuè-lâi mn̄g. A-Bûn kā i ê kò͘-sū tsū-thâu kàu-bué kóng hō͘ Hông-tè thiaⁿ. Hông-tè thiaⁿ-liáu tsin kám-tōng, tsiū sià-bián A-Bûn ê tsuē, sù i tsū-iû. Mā kā Sai pàng tńg-khì tshiū-nâ. Ē-hiáu kám-un ê lîng-hûn tsiah-sī ko-kuì--ê, ta̍t-ti̍t tsun-tiōng--ê.