《CTT出頭天園地》

 | | | 轉寄

I-sap 寓言 44

作者 TLH 2007.12.16

44. Hong kap Ji̍t-thâu

Tsi̍t-ê kuâⁿ-thiⁿ ê tsá-khí, Hong kap Ji̍t-thâu nn̄g-ê teh tsèⁿ kóng tàu-té sím-mi̍h lâng khah gâu. Bô-ì-tiong khuàⁿ-tio̍h tsi̍t-ê kuè-lō͘-lâng kiâⁿ--kuè--lâi. Ji̍t-thâu tsiū kóng, “Guá ū tsi̍t-ê pān-huat ē-tàng hō͘ lán pí tsi̍t-ê-á kuân-kē. Khuàⁿ siáⁿ-lâng ū tsâi-tiāu hō͘ hit-ê kuè-lō͘ lâng kā hiû-á thǹg--lo̍h--lâi, tsiū-sǹg i iâⁿ. Tshiáⁿ lí tāi-sing.” Kóng-suah, Ji̍t-thâu tsiū bih tiàm o͘-hûn āu-piah.

Hong the̍h-tshut tsia̍h-ling-á la̍t, kut-la̍t tshue, piàⁿ-miā thàu. M̄-kú, m̄-kuán Hong án-tsuáⁿ tshue, án-tsuáⁿ thàu, hit-ê lâng m̄-nā bô siūⁿ beh thǹg-saⁿ, tian-tò kā hiû-á jú-giú jú-ân. Kàu-bué-á, Hong tsiū hòng-khì lah.

Uāⁿ Ji̍t-thâu khai-sí tián kang-hu. I khin-khin sang-sang kā jia̍t-tsîng ê kng hòng-siā--tshut--khì, hit-ê-lâng kám-kak jû-kiâⁿ jú-jua̍h, suî kā hiû-á thǹg-tiāu.

Tsû-siông jia̍t-tsîng ê tuì-thāi pí giâm-khok ê ap-pik koh-khah ū hāu-kó!