《赤崁樓ê情phoe》

 | | | 轉寄

Tsiùtshng ê Hônghun Tô͘

作者 Kua Pik'êng 2021.04.11



Tshiktsiáu'á tshōe bô tiūtsháu lâng ê kingkah
Tō͘kún'á suh bô kamtsià hn̂g ê lingtsúi
O͘ bīn lāpue bāng bô pe̍h iâm'iâm ê bîntshn̂g, tsi̍tphiàn
Hônghun, hāⁿ ji̍p·lâi. Mua tī
Tshânkap'á hō͘ tathô͘ hang kah tio̍hsua
Sihsut’á hō͘ tsa̍ptsháu kiaⁿ kah ékáu
Ahbî'á hō͘ lahsap tsúi sīⁿ kah n̂gsng
Ê pakpêng piⁿ. Hâ tī lâmpêng piⁿ ê
Tsòsit lâng jú lâi jú sán
Phahng tē jú lâi jú pûi
Tsúigû kah pe̍hlēngsi sio siámsin ê ba̍ksîn
Jú lâi jú tsheⁿso͘
Ji̍tthâu kah gue̍hniû siotsiohmn̄g ê tâisû
Jú lâi jú tsheⁿléng
Tsi̍t tsiah sinhêng ê phùnsiāki bô siaⁿ bô sueh
Pue tshut hônghun ê siōng tangpêng
Tsi̍t pû kiutsúi ê tsiáu'á sái bô lám bô ne
Tòm lo̍h hônghun ê siōng saipêng

── tse sī tsi̍t pak gēsu̍t ōe
　 khàm tsi̍t niá thô͘sua hún un, tī bûnbêng ê siōng piahkak
　 bînbāng kìtî lâi kiò khítshn̂g------------
Tsi̍t tūi pe̍h káuhiā pûi nńg pûi nńg, ùi ōikhing
Tsiùtshng ê kapphāng sô tshut·lâi
Tshat thâu tshat hīⁿ thâu tú thâu
Thauthau'á hòngsàng
Si So Mi ê khiktiāu