《赤崁樓ê情phoe》

 | | | 轉寄

Siû Bāng

作者 Kua Pik'êng 2021.04.18



Lí iōng hueh kap ing gán
Kā sántshiah tshèngsat
Tshèngtsì phùntshut ê hóetsheⁿ
Kā tshingtshun sio‧sí

Tshiúkhàu khaliâu ê bôa hûn
Thuntsia̍h tsheⁿ bīn liâu gê ê tshiah liông
Ga̍k hûn tshàngtshiu
Amtà ji̍t go̍at
Kiôngpik lí khì thiaⁿ tshiû tsīⁿ būn
Khì phīⁿ lô tshiûⁿ ê tshàuphú bī
Sí sik ê ba̍ktsiu jîn
Khòaⁿ bē tio̍h tînsè ê miākeh
N̂gsng ê bīnpôaⁿ
Bô mê bô kak

Anpêng ê háihong kiáulām thóhái lâng ê hánhuah
Kǹgkòe thihthang ìnji̍p lí ê hīⁿkiàⁿ
tsi̍t pho tsi̍t pho hiongtshiû ê tsehtsàu
Búlāng kú nî tsiùkhí ê thiu thiàⁿ
Tiuh! Lāupē ê tsi̍t kù kàsī
Tiuh! Lāubú ê tsi̍t siaⁿ thó͘khùi

Tsiāmtsiām, lí sakkhui àm iā
Lō͘tshut khihkak ê bāng khí
Iù’iù’á pō͘ tūilo̍h tsêng ê kìtî
Tshuntshut iôtshuah ê tséngthâu’á
Thiahphòa khiauku tsheⁿ pe̍h ê siû hûn
Tsiāmtsiām, lí ēng hâm sau ê siaⁿtòa, tèⁿ la̍t
Kiktshut gēsu̍t ê thâu siaⁿ
Ha̍ksi̍p phi tsi̍t niá hibāng ê siktshái
Tshiùⁿkua

Háiⁿ! Kásik ê khathúi sngnńg bô la̍t
Tī lāu tshù ê lō͘‧lin, thun thun
Thò͘ thò͘, sô sô sô

Lí tsíhó kā kakī
Tâiji̍p tsi̍t mûi ô'á ê paktó͘ lāi
Kòa tī ô'á kè ê siōng thâu kàu
Tánthāi lāubú ê ba̍ksái
Kā ô khak
Phòa khui