|
Kásik
Sī tsi̍t ki tsin liúlia̍h ê tshiú
Tiàu gō͘ tiâu sisòaⁿ
Tèng lo̍h goán ê thâukhak sùki
|
|
Góa tī o͘àm tiong to̍k hêng
O͘sik ê hong, tsiàⁿ khau tò siàn
Līking ê tshùi kháu, thunlo̍h liáujiân
Ji̍tthâu sī bô kiâmtsiáⁿ ê ping
|
|
Kiâⁿji̍p uanuan khiaukhiau ê Kimmn̂g lāu ke
Tsi̍t tsiah thô͘káu’á hiòng lí pūi nn̄g siaⁿ seⁿhūn ê tsioho͘
Lāu khì ê sòegua̍t hiônghiông khiā khí‧lâi
Thí khui lia̍t âng huehkng tiámto̍h làukau ê kìtî
|
|
Tùihōaⁿ iân phàulúi pêji̍p ba̍ktsiu
Kimsik phah khui kong’êng ê tsêng pòaⁿ sìlâng
Káⁿ sí koh sí bē khì ê ua̍h
Uikoân thiàuji̍p thihthang teh píⁿ kingkah
Pe̍hsik amkhàm uankhut ê āu pòaⁿ sìlâng
Siūⁿ sí koh sí bē khì ê sí
|
|
Hīⁿkhang lāi putsî thiaⁿtio̍h
Tsi̍t tsūn tsi̍t tsūn lóng lóng ê siaⁿim
Saⁿ bān gōa ē bô kuitsik ê tsiattsàu
Gō͘ tsa̍p nî lâi kín koh tāng ê kiaⁿ sim lún miā
|
|
Tsi̍t lia̍p tsi̍t lia̍p iâm
Tsi̍t tih tsi̍t tih kōaⁿ
Tsi̍t sûn tsi̍t sûn jiâubûn
Tsi̍t tǹg tsi̍t tǹg jīnhūn
Sī pâipí
|
|
Hiankhui nâsik ê bīnse
Lí sī tsi̍t tiâu gēsu̍t ê khioksòaⁿ
63 tiâu si hûn
78 lia̍p si tsí
Ū tsêng ū gī ê pah nî le̍ksú
|
|
Ngē kut ê mûikùi
1915 nî ê mn̂gsìⁿ phāng āupiah
Ji̍tpún ping liàmtn̄g Tâioân thâu
Tī lí káu hòe ê simkuaⁿ khut’á
Tâi lo̍h tsi̍t lia̍p hoán-khòng ê tséngtsí
Puh tshut ap bē píⁿ ê
Ngē kut ê mûikùi
|
|
Kōaⁿtsúi thiàⁿsim tsim sántshiah ê tshânthô͘
Sánsán ê sìⁿmiā kiat pápá ê tiūsūi
Tsi̍t pō͘ tsi̍t pō͘ o͘ta ê khaìn
Siān tauhtauh ê ji̍tthâu khòaⁿtio̍h
Khunpin peh boántsiok ê tshiòiông
|
|
Tng hongtshia thâu kôankôan pháng khí
Tsi̍t ki Iâmhūn tētài bûngē kî
Thêngthêng tèng lo̍h lâm Khunsin biōtiâⁿ
Bē iô bē khi hiòng kàigiâm tshiàng siaⁿ
|
|
Khòaⁿtio̍h lí ê tângsiōng
Góa tsiah tsaiiáⁿ lí
Tha̍ktio̍h lí ê si
Góa tsiah se̍ksāi lí
|
|
Ūitio̍h tháukhui abú kiat kiû ê ba̍kbâi
Ngē jím gêtsô khíhōaⁿ hueh saisai
Ūitio̍h thè apa ê hoânló kiám pûi
Khíkin kā ân piàⁿsè lim pit tsúi
|
|
Phāiⁿ tsi̍t hù saⁿ kak la̍k khiau ê miāté
M̄ goān tèⁿ tiāmtiām kùtsāi miāūn tsing
M̄ goān pī teh tiâu ê lênghûn bô siaⁿ
Khikhiau ê tséngthâu’á gīm ân sèⁿmiā tsi pit
Gīgī tsùn, la̍kla̍k tshuah
Thàumê thàu-ji̍t thò͘ ba̍k iô bē thêng
|
|
Thàu tiongtàu ê ji̍tthâu, kā lûn’í ê lián’á hang tshut hûn
Tsi̍t sian tòkiu ê sin’iáⁿ, tsi̍t siuⁿ gō͘ hue tsháikǹg ê ēkha
Nn̄g tsat ta-pô͘ ê liân’ngāu thúi
"Lâi bé tsháikǹg o͘h──"
|
|
Khangkhang thàulām io̍htsúi bī ê pângking
Kā kakī khōng tòa pe̍hsik ê tshn̂gkin
Bián koh tshapsiâu ji̍tthâu ê tshiaiāⁿ
Bián koh thunlún hongthai ê hiaupai
Ánne, tsiâⁿ hó
|
|
Mamĭ, góa tsiok siūⁿ lí ê
Papa kóng sī góa bô kuai, lí tsiah ē tsáu tshutkhì
Hāi góa háu kui mê
|
|
Kámsiā lí ê ba̍ksái
Tī lí tsho͘ pêpê ê tshiútê līkhui góa iù mimi ê tshùiphóe liáu’āu
Lí ba̍kkho͘ kâm tsúi, kóng lí ài góa
Góa goânliōng lí
|
|
Siān tauhtauh ê ji̍tthâu teh thua âng hê ê sin’iáⁿ
Kúi lúi o͘ jîn lânglâng sangsang tiàu tī thiⁿténg bóe
Pehkhui kam’á sik ê hônghun
Khaisí tsi̍t bān tsi̍t bān thàngthiàⁿ ê thunlún
|
|
Góa bô koài lí
Tng góa tùi lí ê khatsiahphiaⁿ, siak lo̍h
Góa thiaⁿkìⁿ sìⁿmiā tsi̍t tsat tsi̍t tsat, tshùi iûⁿiûⁿ
Lak lo̍h útiū khangkhak ê siaⁿim
Khinkhin khongkhong
M̄ sī lí tsho͘ kha pūn tshiú
Sī góa miā tiong tsùtiāⁿ
|
|
Koái’á, sô līkhui thóthàn ê lia̍hlêng pâng
Lângkheh khì-hiâm ê pháiⁿsiaⁿsàu
Iáu tī hīⁿkhang piⁿ, phōngphōng tân
Tsi̍t tīn bîhong, khaukòe bīnphôe
Léngléng, tài sngbī
|
|
Kimsik ji̍tthâu kôankôan kòa thiⁿténg
Pe̍hsik hûnlúi sûi hong lōngliulian
Tsiáutsiah tī tshiūki liu liulông
Huaⁿhí ê tsôaⁿtsúi ti̍tti̍t tiòng
|
|
Góa thiaⁿkìⁿ tsi̍t khik Bāng Tshunhong
Í Tikpò͘si ê tsiattsàu
Tī lí simpâng mn̂gkháu
Tiûtû
|
|
12 gue̍h sngléng thiⁿ
Tsiamtsiam ê hong
Siā lo̍h sihsih tsùn
Mā siā nńg tsho͘ióng ê kutba̍k
|
|
Tùi phangtsúi phuetsóa ê khí-thâu
Siá lí ê miâ
Tsi̍t keh tsi̍t keh iù tsōa tsúihûn
Lóng sī lí siû‧ kòe ê tshing phang pho iáⁿ
|
|
Tsi̍t tsâng lian‧ khì ê mûikùi
Oá tī bān tsí tshian hông lûnhôe ê
Tshiûⁿ’á kak
Tiāmtiām ê hue iáⁿ
Pa̍ktio̍h góa
Bô sînhûn ê ba̍kkng
|
|
Lí kiò góa kā ba̍ktsiu kau hō͘ lí
O͘’àm sī lí ê sèkài
Gō͘ hue tsa̍p sik ê pò͘kéng
Lâu thòaⁿ o͘ kúikúi ê bū
|
|
Iāhêng kun ê sihsut’á pòsò͘ siaⁿ sàu
Ka tn̄g tù khíkôⁿ ê khùnbîn
Sô tī tshiûⁿá kak sûnlô ê siānthâng’á ping
Tsha̍t thâu tsha̍t hīⁿ, iōng hôe’ik ê lûita̍t
Sàubiô siûsik lāi ê góa
|
|
Tī tsit tè khiónghat sī ha̍phuat
Tsauthat sī tsètō͘
khausé sī tsèngtong ê
|
|
Phâng hûn lám gue̍h siàn tshiⁿ khian ji̍t
Hiâⁿ hue tsú tshiū hang suaⁿ tsian hô
|
|
Kìtsiá hóngbūn hoānlâng,
Tshiáⁿmn̄g lí ji̍p ga̍k ê kámsióng?
|
|
Lí ēng hueh kap ing gán
Kā sántshiah tshèngsat
Tshèngtsì phùntshut ê hóetsheⁿ
Kā tshingtshun sio·sí
|
|
Tshiktsiáu'á tshōe bô tiūtsháu lâng ê kingkah
Tō͘kún’á suh bô kamtsià hn̂g ê lingtsúi
|
|
|
