《台灣另類牧師．醫師─謝緯》

 | | | 轉寄

5-04 門諾會山地巡迴醫療團

作者 陳金興 2011.10.02

Tsit ê醫療團選定花蓮成做山地醫療救濟計劃ê基地，tī美崙地區稅一間原本製造鋁ê工廠來做診所，免費替原住民看診治療，並前後tī竹東、埔里以及屏東等所在設立山地臨時診療所。

In將一台美國軍用卡車，改裝做載運醫藥品kap罐頭、牛奶等補給品路用ê醫療專車，koh用peh山潦水ê方式，進入偏遠山區替原住民看病，這是台灣醫療史上第一批由外國宣教師 kap本地ê醫護人員、傳道者、翻譯人員所組成ê專業醫療團。

MCC由孫雅各紹介到台灣，In主要ê工作是提供現代醫療觀念hō͘ 原住民、替in提供醫療服務、實施教育kap傳福音四項。為tio̍h無欲因為「建立教會」ê代誌來kap長老教會互相競爭，門諾會就只有單純從事醫療kap救濟ê工作。若是有人因為受到醫療服務來信主，就由長老會kā伊引tshoā，繼續關心及栽培信仰。


門諾會高甘霖牧師(註1) tī 1950年1月tùi香港坐船來到基隆，孫理蓮(註2)傳教士向伊做山地醫療團ê簡單工作報告，並請伊駛巡迴醫療車去參加佈道會。後來，孫理蓮紹介伊kap呂春長牧師(註3)認識，高甘霖擔任山地醫療團負責人。此後，MCC除了維持在東部的山地醫療工作之外，高甘霖又在西部山區開辦第二隊巡迴醫療團為原住民服務，團址設於台中。

..........................................................................................................

(註1)
高甘霖(Rev. Glen Daniel Graber 1920-2009)，基督教門諾會美籍宣教師，1950年加入門諾會東部山地醫療工作。結婚了後搬去台中，從事收容孤兒ê工作，koh tī台中創辦「光音育幼院」。1954年kap呂春長牧師共同創設門諾會台中林森路教會，1964年7月，tī台中正式成立「基督教兒童福利基金會（ Tsristian Tsildren's Fund 簡稱C.C.F.）台灣分會」（家扶中心），高甘霖牧師任第一屆會長。高甘霖有「台灣孤兒之父」之稱。

(註2)
孫理蓮（Lillian Ruth Dickson）1901年1月29日出世tī美國明尼蘇達州彼略湖( Prior Lake ) 畔，就讀馬加勒斯特學院(Macalester College, St. Paul, Minnesota )時，熟識她的同學孫雅各( James I. Dickson )。1927年in兩人結婚了後，就由加拿大來台灣服務。1948年伊tī美國成立「基督教芥菜種會」(The Mustard Seed, Inc.)到處募款，tī台灣積極從事肺病、痲瘋病及烏腳病的醫療工作；又koh tī全台各地設立產院、育幼院、兒童之家、褓姆學校等，並到監獄傳道。1983年1月14日過身了後，kap丈夫孫雅各仝款，埋葬tī台灣神學院禮拜堂邊。

(註3)
呂春長（1914-2010），澎湖人，為出名ê佈道家。1941年tùi台南神學院畢業，1943年7月tī大肚教會受封立做牧師。Bat tī門諾會kap長老教會真濟教會佈道，深入山區從事醫療宣教，也bat擔任長老教會台中中會傳道部部長，1964-1994 tī台中市忠孝路基督長老教會牧會。謝緯tī 1934年讀台南神學院，呂春長tī 1937年進入南神。