《台灣另類牧師．醫師─謝緯》

 | | | 轉寄

5-05 犧牲是一種快樂

作者 陳金興 2011.10.09

門諾會山地巡迴醫療團需要醫生協助，tsit時tsūn，kap謝緯是台南神學院前後期校友ê呂春長向孫理蓮kap高甘霖推薦謝緯加入團隊。自按呢，謝緯 tī 1950年10月起開始kap高甘霖、呂春長等tsiah-ê人做伙去做山地巡迴醫療事工。

謝緯tī＜在所不辭＞中講起： 「有一工我遇tio̍h孫理蓮教士，伊kā我講，伊對山地同胞中間染病kap性命kiông-beh無去ê人內心有一種極大ê負擔。『謝醫師，tsiah-ê 艱苦koh 散赤ê人需要你。咱有一個巡迴診所，ē-tàng四、五ê人同齊往診。』這是我頭一ê挑戰，我並無逃避。阮同齊peh嵁硈(khâm-khia̍t) ê 山路；睏tī土腳頂；阮tī茫霧中抑是雨裡行踏，歸身軀濕kô͘-kô͘，m̄-koh阮kap主做陣行，拯救人ê性命，按呢 hō͘人感覺興奮。」

謝緯參加山地醫療團 ê時間雖然m̄是真久，但是tī將近一年ê工作中間，hō͘ 伊注意tio̍h 散赤ê原住民同胞。M̄-nā án-ne，謝緯有koh-khah tsē ê心得：美國人比咱koh-khah拚(piàⁿ)；犧牲m̄是折磨、痛苦，顛倒是快樂。

因為台灣ê山地真崎(kiā)，加上當時中部iáu未有橫貫公路，交通相當不便，beh從事山地醫療非常艱苦。醫療團若beh深入原住民部落(番社)常常tio̍h愛行七、八點鐘，潦水過溪、趡(nǹg)過o͘- lu-lu ê樹林，除了家己搬運行李之外，且(koh) tio̍h運送物資kap醫療器材。In所lim ê水無經過消毒，逐三頓mā真tshìn-tshái 吃。謝緯tī tsit種ê生活條件下面，盡心盡力工作。根據呂春長ê回憶，謝緯常常在一工內診斷治療五百名以上ê患者，tsit種ê工作量其實是相當大，伊m̄-nā lóng無怨言，iáu充滿喜樂。

孫理蓮按呢講： 「阮tio̍h爬山過溪，tī任何條件之下睏、食。謝緯常常一工看幾若百ê病人，有時tsūn上千。就算阮有一陣工作人員tī邊仔鬥參共(tàu-saⁿ-kāng)，伊猶原是過頭tio̍h磨。但是無論tú-tio̍h joā-ni̍h-á困難ê工作，伊並無失志抑是激動，反tńg時常快快樂樂。」 除了按呢以外，謝緯tī醫療團工作一站仔了後，伊kā呂春長講：「我以後無beh koh領tsit 份津貼lah，因為美國人到台灣做善事(行善)，咱the̍h in ê錢，對上帝講未得過，tī人面前，頭舉未起來，對家己mā心未安。」不領取醫療團 ê津貼以外，伊tī山地kap醫療同工作伙ê時，mā時常tùi褲袋á jîm錢出來買涼ê或(á)是餅招待in。

醫療團工作ê主要地點選tī當地 ê鄉公所、派出所以及學校等公共場所。高甘霖牧師相當強調醫療kap傳福音兩項應該結合，tùi án-ne tī山地巡迴醫療服務中，in會帶患者做禮拜kap放福音影片，ín-tshoā了真tsē原住民來信主。早起時由謝緯或(á)是呂春長領詩唱福音短歌，續落來由呂春長用掛圖佈道。了後，謝緯kap三、四位醫師做醫療工作。呂春長、孫理蓮kap高甘霖就tī邊仔分發藥品，順soà做簡單ê外科治療，一直到暗時。