《台灣另類牧師．醫師─謝緯》

 | | | 轉寄

6-01 起帆(khí-phâng)去美國進修

作者 陳金興 2011.10.16

有一工，孫理蓮問謝緯是m̄是願意到美國去做進一步研習？伊講：「若按呢你就koh-khah ē-tàng充實家己來為上帝做工，替病人服務。」對謝緯來講，這是另外一種挑戰，伊同意beh去美國。因此，謝緯離開門諾會山地醫療團ê工作，tī 1951年秋天前往美國進修外科手術。Tī美國紐約州ê病院中，謝緯熟識了鮑伯‧馮雷（Dr. Bob Finley）醫師，以及tī加州舊金山ê教會中，mā感動了瑪喜樂太太（Mrs. Joyce Meredith McMillan）來台灣奉獻醫療服務將近半世紀。

因為五、六十年前台灣iáu tī戒嚴體制之下，beh出國是一件真不容易ê代誌。謝緯beh到美國進修ê消息，hō͘ 南投街仔ê鄉親以及教會ê會友，m̄-nā振奮無停，mā感覺非常光榮。Tī庄腳ê小所在，難得有一片歡欣鼓舞ê這種氣氛。除了謝緯ê親朋好友kā伊tsiān-pia̍t(餞別)以外，1951年9月30 tī南投教會、10月初7 tī赤水教會mā分別為謝緯赴美進修舉行歡送禮拜。

10月初10，36歲ê謝緯款一寡á簡單ê行李，由牽手、tiūⁿ-ḿ(岳母) kap李慶耀等人陪同，tùi南投到彰化火車頭，坐夜快車到基隆港口去坐船，啟程赴美國東部，tī紐約市 (New York City) 落船。伊先tī布魯克林 (Brooklyn) 區ê「聖約翰英國國教病院」(St. John Episcopal Hospital) 實習兼進修英語。

家己一ê人坐船過海來到美國紐約了後ê謝緯，tsit段時間kan-taⁿ ē-tàng靠tio̍h寫批tńg去kap台灣厝內ê人聯絡，用tsit種方式來化解思鄉之情。Tī伊結婚紀念日前兩工寫批 hō͘ 太太ê時，有提起家己回想tio̍h六年前大戰tú結束無偌久，in 兩人tī日本結婚，有得tio̍h大家ê祝福，到taⁿ內心iáu-koh非常感謝上帝。如今in lóng已經成做人ê父母 lah，koh過無偌久mā會老，tùi án-ne來感嘆歲月真是不饒人！

除了感謝kap感嘆之外，因為謝緯認為tī美國ê tsit段時間，是伊自我裝備ê最後機會，因為這種責任感ê 催逼，hō͘ 伊禁bē-tiâu有淡薄仔掛心。伊雖然早就已經決定tī美國進修告一段落了後，beh轉去台灣一世人盡心盡力為主做工。但是伊家己認為頭腦無比別人khah聰明，能力mā無比別人khah強，今仔日ē-tàng有tsit-ê服事ê機會，lóng是tùi上帝所領受ê，完全是上帝hō͘ 伊ê恩惠，所以mā希望楊瓊英 ē-tàng kap伊同齊獻身，同齊工作，同齊分憂解勞。