《台灣另類牧師．醫師─謝緯》

 | | | 轉寄

6-02 謝緯開始 tī美國 ê 新生活

作者 陳金興 2011.10.23

1952年ê 2月初，因為tú到美國無偌久，語言kap文化mā tú仔teh學習kap適應，病院卻tī無事先通知ê情形下，將謝緯解聘，理由是因為伊ê英語無偌好。 Tsit-ê 代誌 hō͘ 伊hiông-hiông感覺前途黑暗，餒志失望，真想自按呢就結束tī美國ê進修，隨時tńg去台灣。但是，伊讀了《聖經》〈約伯記〉以及唱聖詩〈至好朋友就是耶穌〉了後，koh恢復了信心。Tùi án-ne，謝緯積極拜託朋友鬥參共另外tshoē病院。

關於tsit段忽然臨到ê打擊，伊寫phe請太太放心，因為伊ê美國朋友，真正對伊真好，m̄-nā鼓勵安慰伊，iáu四界為tio̍h伊探聽其他病院，伊相信無偌久就會有好消息。果然，就tī朋友ê熱心幫助之下，伊真緊就有四、五個面試ê機會。

Tī面試ê時，謝緯lóng無掩khàm kā對方講，家己被解聘ê理由是因為英文程度不好。但是hiah-ê病院suah kā 謝緯講，in bē因為tsit-ê理由m̄任用伊。甚至iáu有ê kap謝緯交談了後向伊表示，對一個外國人來講，謝緯ê英文程度已經有夠好lah，tùi 按呢就kā伊錄取。

謝緯tùi 1952年2月16日開始去紐澤西州(New Jersey) 一間設tī河邊ê「聖瑪莉病院」（St. Mary's Hospital）上班，除了月給70元以外，院方iáu提供吃kap住。因此，除了三頓m̄免煩惱以外，伊iáu有屬tī家己ê房間，m̄免tī外面另外soè厝toà。

Tī生活kap工作lóng漸漸安定了後，謝緯寫phe hō͘ 太太，向伊報告美國ê 種種代誌，mā相當關心厝內gín-á kap親人，並特別請太太加關照喪夫已經9年ê老母。同時，因為大兄已經染tio̍h肺病十goā冬，病情有時好，有時壞。謝緯mā提醒楊瓊英，若是大兄ê身軀iáu無恢復到真好，就hō͘ 伊加歇睏，mài hō͘ 伊常常出來看診。

身處異鄉ê遊子，生活kap以前仝款規律，tī病院ê實際臨床案例中，得tio̍h真多寶貴ê經驗。Tī伊真無閒ê醫療工作中，猶原無bē記得伊對上帝ê應允，以及感謝厝內ê人對伊ê栽培kap照顧。9月l2日ê家書按呢寫： 「第一、我是一ê奉獻hō͘ 上帝ê人，所以無論做任何代誌，lóng beh lia̍h上帝做中心。第二、自細漢到大，我得tio̍h厝內ê人ê溫暖以及受tio̍h家庭hō͘ 我ê恩惠，我真感謝。我是一個歡喜大家庭生活ê人，我會koh-khah愛護我ê家庭。」

同時，伊對tī將來學成歸國了後beh何去何從，iáu無按算，伊透過家書向愛妻表達家己ê想法： 「將來若教會醫療需要我鬥腳手，我會盡心盡力去做。設使無tsit-ê需要，我個人若有一間病院ê時，我計劃tī病院體系之下，另外成立社會關懷部，來免費幫贊hiah-ê無能力就醫ê貧困患者。若上帝憐憫我，koh容允我活到60歲以上，到時，就會kā醫療事業傳hō͘ 後輩，我就ē- tàng全心去傳福音lah。」