《大人囡a2詩》

 | | | 轉寄

Muâ-tāu ê Kò͘-sū...麻豆 ê 故事

作者 Li KhinhuaN 2006.01.08

listen


Sió-pîng-iú, gâu tsá!
小朋友，gâu 早！
Lâi-lâi-lâi
來來來
Lâi tha̍k Tâi-uân-sú
來讀台灣史
Thiaⁿ guá kóng kò͘-sū
聽我講故事
Kin-á-ji̍t beh kóng “Muâ-tāu ê Kò͘-sū”
今á日beh講「麻豆ê 故事」
Muâ-tāu pún-tsiâⁿ sī tāu-á
麻豆本成是豆á
Āu-lâi suah piàn-tsò iū-á
後來煞變做柚á
Kó͘-tsá Tâi-uân ê iū-á tsin sè-lia̍p
古早台灣ê柚á真細粒
Ná tshiūⁿ muâ-á hiah sè-lia̍p ê tāu-á
Ná像麻á hiah細粒ê豆á
Tiong-kok hông-tè iû Tâi-uân ê sî
中國皇帝遊台灣ê時
Tsia̍h tsi̍t-ē suah piàn kah tsiok tuā-lia̍p
食一下煞變kah足大粒
Koh piàn kah tiⁿ-but-but
Koh變kah甜but-but
Piàn kah phòng-phòng-phòng
變kah phòng-phòng-phòng
Tiong-kok hông-tè liông-sim tuā hí
中國皇帝龍心大喜
Tsiū sù Hàn-miâ bûn-tàn
就賜漢名文旦
Koh sù Hàn-sèⁿ Ông
Koh賜漢姓王
Tâi-uân ê guân-tsū-bîn pêⁿ-po͘-tso̍k
台灣ê原住民平埔族
Pún-tsiâⁿ tshin-tshiūⁿ iū-á phòng-phòng-phòng
本成親像柚á phòng-phòng-phòng
Tiⁿ-but-but
甜but-but
Luí-luí tuī-tuī
累累tuī-tuī
Tò-tshù khuàⁿ ē-tio̍h
到處看會tio̍h
Tsū-tsiông Tiong-kok hông-tè iû-kuè Tâi-uân
自從中國皇帝遊過台灣
Sù Hàn-miâ Hàn-sèⁿ
賜漢名漢姓
Suah piàn-tsò muâ-á sè-lia̍p ê tāu-á
煞變做麻á hiah細粒ê豆á
Lo̍h tī thô͘-kha khuàⁿ lóng bô
落tī土腳看lóng無
Siau-sit tī Ka-lâm-pîng-guân
消失tī嘉南平原
---2003/5/9 Harvard