《當上帝開嘴講台語》

 | | | 轉寄

2.3.1 台語文字化簡史

作者 梁淑慧 2006.05.14

2.3.1 台語文字化簡史

2.3.1.1 日本時代ê文字主張 ：「羅馬字」kap「漢字」

台灣自明清時代延續到日據時代早期ê書面語，一直是沿襲中國古漢文（文言文）ê形式，日常ê口語kap書面語「言文無一致」ê情況相當嚴重。Siōng早意識tio̍h台灣ê「言文無一致」，想beh改造台灣話文做文化啟蒙工具ê人是蔡培火，伊tī 1914年to̍h bat向「同化會」提出普及羅馬字 ê建議，但無受tio̍h接納。引起多數知識分子注目ê是tī 1919年中國ê胡適等人所提倡ê「白話文運動」，tsit-ê運動tī台灣文學界馬上受tio̍h熱烈ê響應，形成「台灣新文學運動」。Tī-leh phah倒文言文舊文學ê呼聲中，台灣作家探討「什麼tsiah是台灣ê白話文」ê時，tsiah hiông-hiông發覺台灣ê「語言」kap「文字」kap中國並無kāng款，tuì án-ne展開一場論爭，最後形成1930年代強調以台灣話描寫台灣事物ê「台灣鄉土文學運動」，koh稱做「台灣話文運動」。Tī tsit-ê運動相連續ê討論當中，實際上是包含「內容」（鄉土文學）kap「語言文字」（台灣話文）兩個層面。

Tuì tsia咱 thang知：1920~30年代tī文壇上ê討論，主要是tuì新舊文學論爭開始，隨後tsiah進入台語文字化ê探討。關於台語文字形式的主張，主要有1920年代蔡培火提倡ê「羅馬字」kap 1930年代黃石輝、郭秋生等人提倡ê「漢字」。

（1） 羅馬字
早tī十九世紀末基督教傳入台灣ê時，長老教會to̍h提倡「白話字」教育。利用18個羅馬字母組成ê音素符號（見附錄一）就會tàng拼寫所有ê音節，簡單、好學，koh 會tàng表達日常口語，相對於漢字漢文ê複雜oh bat，「白話字」的確tī學習效率kap生活應用上超越傳統漢字ê讀寫訓練。1885年台灣siōng早ê報紙《台灣府城教會報》創刊，to̍h是用白話字做書寫文字，可見白話字當年tī台灣教會內已經是行之有年，tsiah 會tàng成做共同刊物ê表達媒介。長老教會也用白話字翻譯《聖經》、《聖詩》、編寫字典、教材、註解漢文……等。透過白話字教育kap《台灣府城教會報》ê輔助，白話字成做台灣基督徒社群內部共通ê文字，長老教會也藉此塑造出一個自成體系ê白話字社會（張妙娟，1990）。

蔡培火tī 1914年向「同化會」提出普及羅馬字ê建議無受接納了後，1921年「台灣文化協會」成立，伊再次提議普及羅馬字，iáu是無成功。到1923年tsiah通過議決做該會ê新設目標。

蔡培火tī 1925年出版《Tsa̍p-Hāng Kuán-Kiàn（十項管見）》一書，其中ê第二項「新台灣kap羅馬字」to̍h是大力鼓吹羅馬字ê好處。伊認為台灣社會beh進步，必須ài普及知識。M̄-koh台灣人受教育ê比例siuⁿ少，最主要ê原因是漢文（指「文言文」）siuⁿ困難，必須用真長ê時間來學習，而且漢文書面語實際上koh kap台語口語有真大ê距離。羅馬字好學、好用，tú 會tàng解決台灣ê「知識大饑荒」，提升台灣人ê文化水準。伊koh tī《台灣民報》發表真tsē篇文章提倡羅馬字，並且編課本授課。雖然真tsē擺遭受日本政府ê禁止，伊iáu極力奔走，據理抗爭。

蔡培火ê大力提倡雖然得tio̍h一kuá人ê支持，親像張洪南（1923）(註21)、葉榮鐘（1929）等，m̄-koh反對ê人koh-khah tsē。當時ê知識分子iáu有強烈ê漢文化意識，無願意接受羅馬字。加上日本政府用「恐驚會影響tio̍h日語ê普及，有礙教育方針」做理由禁止， tī內外交困ê情況下，不得已suah來停頓loh。

（2） 漢字
1930年黃石輝tī《伍人報》頂面發表〈怎樣不提倡鄉土文學〉，主張用台灣話來描寫台灣事物，正式展開「台灣話文運動」。關於文字ê問題，黃石輝tī〈再談鄉土文學(註21)〉一文中，主張用漢字來寫台灣話，無字thang用ê時，採用代字抑是新字。

郭秋生mā主張用漢字來建設台灣話文。伊tī 1931年發表〈建設台灣白話文一提案 〉提出對文字ê看法：
「記號台灣語ê文字，到底tio̍h用toh一種leh？……台灣既然有固有ê漢字，……但是怎樣無氣息，mā iáu是漢民族性ê定型，mā iáu是漢民族言語ê記號，所以理論上會tàng用簡便易寫ê拼音文字替代oh解難寫ê漢字，但實際上這恐驚m̄是容易ê工作，所以我beh主張台灣人bē使得放棄固有文字ê漢字。……」

黃、郭二人tī文字上採用「漢字」ê主張，得tio̍h大多數文人ê支持，如：黃純青、林鳳岐、莊垂性……等人，雖然in tī用字ê看法頂面有無一致ê所在。有關台語ê語料整理，mā用漢字記錄khah tsē，如：連橫ê《台灣語典》、《雅言》等。

受tio̍h tsit-ê運動ê影響，mā有一kuá台文作家出現（如：賴和），m̄-koh當時台灣受日本政權ê統治，作家對語文ê選擇有現實上ê困境。1937年皇民化運動開始，全面禁止漢文，「台灣話文運動」mā被迫停止。葉石濤（1987）認為雖然日本時代ê作品大部分bē-tàng用台灣話文做表現ê工具，m̄-koh in tī內容上確實有反映台灣tī殖民統治下ê悲慘現實，為「鄉土文學」ê初期構想完成歷史上ê使命。陳恆嘉則認為：

「蔡氏ê白話字本來有可能同時解決台灣『語』『文』ê雙重ê困境，可惜，文人ê漢字情結phah siuⁿ死，包括當時進步ê新知識分子，當面對廢用漢字、改用羅馬字來普及教育、啟蒙人民、著述寫作ê時，伊也隨就變成做『保守派』lah（郭秋生就反對），…… 白話字運動ê失敗，蔡氏成做『先烈』，是『時也』『命也』ê問題，同時，mā是台灣以及台灣作家ê宿命lah！」（陳恆嘉，1996：452）

註21： 見楊允言（1993）〈台語文字化兮過去佮現在〉。
註22： 發表tī《台灣新聞》1931年７月24日。
註23： 原本tī《台灣新聞》1931年７月起連載33期。本段文字是引錄自呂興昌（1999）主編ê《台語文學運動論文集》55-56頁。