《當上帝開嘴講台語》

 | | | 轉寄

2.3.1.2 國民政府戒嚴時期ê文字主張

作者 梁淑慧 2006.05.28

2.3.1.2 國民政府戒嚴時期ê文字主張：海外王育德提倡「漢羅合用字」

二次世界大戰結束，台灣hō͘國民政府接管了後，全面推行「國語政策」，國民政府對台語ê歧視、醜化以及對傳播媒體ê種種控制，致使台語文完全無發展ê空間，比日本時代koh-khah慘，台語文陷入數十冬ê烏暗期(註24)，台語文創作停頓，台語文字化無法度有正常ê進展，顛倒是中國ê白話文成做文學ê主流。

Tsit個時期學術上ê研究以「漢字」筆錄民間歌謠khah tsē，見《台灣文化》（1946~1950年）、《台灣風物》（1951~）等雜誌，khah少提起台語文字化ê問題。關於台語漢字ê語源考證，tī董同龢（1960）〈四個閩南方言〉中有零星ê考證。專書有孫洵侯（1964）ê《台灣話考證》，m̄-koh考證ê字數mā kan-taⁿ十幾個。

明顯提出文字化主張ê是tī海外ê學者王育德，伊建議採用「漢羅合用文」。 1960年王育德等人tī日本創辦《台灣青年》(註25)雜誌，初期以日文做主要ê語文，宣傳獨立建國ê理念以外，mā將語言革命看做重要ê任務。王育德ê「台灣話講座」共二十四講，tī 1960年4月至1964年1月tī《台灣青年》連載。伊對台語文字ê主張是「漢羅合用」，發表tī第二十四講：

「用羅馬字書寫台語是筆者一貫ê主張，m̄-koh根據過去ê經驗，tuì頭到尾kan-taⁿ使用羅馬字，閱讀ê效率kaⁿ-ná khah ke。一瞥之下就會tàng了解意思，tsit點iáu是漢字siōng好。M̄-koh用漢字書寫台灣話，正如頭前一再強調，困難重重。所以筆者ê另外一個提議是：漢字kap羅馬字tsit兩種文字混合使用。」（原文日文，引自黃國彥ê華語翻譯，1993：259，筆者再翻做台文）

王育德對台灣話文字化ê主張是分析比較「漢字」kap「羅馬字」二種系統表記台語ê優缺點kap可行性了後所下ê結論。伊對教會羅馬字有極kuân ê評價，認為「只要是台灣人，就有必要知影伊ê大概」（王育德，1993：45）。雖然伊認為教會羅馬字有需要改良ê所在，自創「王一式」（tī 1957年出版ê《台灣語常用語彙》中使用）kap「王二式」（tī「台灣話講座」中使用），m̄-koh後來伊考慮tio̍h教會羅馬字ê歷史kap社會普遍性，自án-ne聲明放棄家己ê設計，轉來支持教會羅馬字（黃昭堂，1992；許極燉，2000），後來出版ê《台灣語入門》（1972）、《台灣語初級》（1983）lóng改採用教會羅馬字。

王育德本身並無發表過台語文ê文章，主要ê貢獻是tī理論部分，會tàng講是siōng早提出漢羅合用理論ê人。以「漢羅合用字」書寫ê台文，直到1967年tsiah tī《台灣青年》出現。


註24：黃宣範（1994：113）指出：「禁用方言時期ê起迄年代為1950年到1987年，前後約兩個世代。」
註25：《台灣青年》這個名稱延用1920年「台灣文化協會」創辦ê民族運動重要刊物ê名稱。