《當上帝開嘴講台語》

 | | | 轉寄

第三章 「實況化」理論

作者 梁淑慧 2006.07.16

第三章 「實況化」理論

Kāng一種語言有無仝ê《聖經》譯本，主要ê原因有三個：一、語文ê變遷；二、 翻譯ê原則無kāng款；三、 所根據ê原文抄本無仝。本研究tī比較各版本台語《聖經》ê時採用「實況化」ê觀點，to̍h是khiā-tī「各《聖經》譯本是m̄是合乎現代台灣社會ê需求？」tsit個角度做檢視，將重點khǹg tī語文變遷kap《聖經》翻譯ê原則上。另外，神學ê發展也影響tio̍h《聖經》tī翻譯時所採取ê方法。因此「實況化」方法論ê建構，咱beh tuì近年來語言學、神學kap聖經翻譯理論ê行向來探討。

3.1 實況化ê語言學理論

語言m̄-nā是一個符號系統，伊存在tī每一個人ê大腦中，並且受人類語言共性ê制約。對任何一個會曉母語ê人來講，伊ê頭腦內底一定存在三項因素：個人ê特點、母語ê文化特點（cultual specfics）kap人類ê語言共性（language universals）（鄭良偉，2003a）。以往語言學ê研究偏重tī以句法為主ê研究，khah欠缺全面性ê考量，但事實上，語言現象往往m̄是單一ê存在，是連結各範圍--ê。現代語言學家用「模組（module）」ê概念來解釋並連結各語言範圍，對語料會tàng有khah詳細ê分析，mā koh-khah 會tàng描述kap解釋所存在ê語言現象。尤其漢語「結構標誌」ê同義語繁雜koh tsē，文脈依存ê情況格外複雜，特別需要有generation以及interpretation/parsing雙向功能ê語法模板（bi-directional grammatical template）來處理跨語對譯ê語意、語法、詞彙等問題（鄭良偉，2003b），這是語言學行向實況化ê表現。

表3.1 各模組ê內涵Properties of Varioos Modules(註30)

c模組module工作task由語意而語詞Textgeneration 由語詞而語意Text interpretation
1發言意圖intended message 選定信息，強調某信息，決定發言目的，建立彼此良好關係，表示適當ê禮貌……↓↑
2修辭法rhetoric如何運用修辭法抑是講話ê語氣來表達各種目的（誇張信息、表現客氣、互相親近……等）↓↑
3觀念模組semantics
含意kap表意expressed and implied meanings		 根據修辭法決定
a) 決定採用舉例反逆法或強度比較法
b) 決定主要信息ê肯定或否定強調
c) 選用信息連貫性標誌
d) 決定運用任指皆真或以極端特例襯托信息
e) 決定極容易或極困難特例
f) 利用特定語型表達常用ê語意kap語法ê含意關係 		↓↑
4語法模組syntax決定各種同義語ê句法結構↓↑
5語用模組 (焦點結構、回指結構、言談評估結構) 決定焦點ê句法結構
決定同指涉語詞之間ê代詞選用
品質原理Quality Maxim(選用真實ê關係反實假設)
數量原理Quantity Maxim(重複語增加明確度遵守經濟原則)
關連性原理Relevance Maxim (談話內容需要主題有關連)
方式原理Manner Maxim(講話清楚明瞭、簡單、有條有理低估高估對方ê解釋能力)		↓↑
6詞法morphology決定各種同義語ê詞法結構↓↑
7詞彙lexicon 根據2,3,4決定虛詞、實詞、諺語、俗語裡隱藏ê難易、好pháiⁿ、禍福等社會偏見、常識↓↑
8語音結構phonology輕重音、音節結構↓↑
9語用規律pragmatics書面語、口語、正式、口白風格↓↑
10社會語言規律sociolinguistics無kāng社區ê語言特點分布↓↑


各語言lóng具備表3.1模組裡ê各項內涵，語言特性siōng tsē、語言間差異siōng大ê是詞彙，第二是慣用語型，第三是句法（鄭良偉，2003b）。《聖經》tuì原文（新約為希臘文，舊約為希伯來文）譯入傳教士ê母語koh再譯做台語，中間必須經過兩至三種語言ê對譯，正是因為人類語言kap文化ê「共性」hō͘翻譯成做可能；m̄-koh tī表現上to̍h受限tī譯入語ê語言結構kap表達方式，這是翻譯ê困難點。To̍h算講是kāng一種語言，tī無kāng時代、無kāng地區mā會有無kāng款ê形貌，這也就是《聖經》譯本為tio̍h語言ê實況化，每隔一段時間就必須再修譯ê主要原因。

本研究第四章tī研究者ê能力範圍內，將各譯本kap現代台語ê語感做比較，期待會tàng展現出各譯本ê特色。另外，tī探討語法差異ê成因時，以文言文、近代中文、英文ê經文譯文來互相對照，期待有koh-khah清楚ê比較。第五章則實際以語感kap閱讀兩方面ê測驗，來檢視第四章ê探討結果，並歸納出原因。

註30：引用自鄭良偉（2003b）〈從口語及文言的稱呼語看兩性平等觀〉。