《《原鄉．夜合》 客語詩集》

 | | | 轉寄

阿妹看人搞烏龍仔... moi khon ngìn káu vû liùng é

作者 曾貴海 白話字： 邱淑華 2007.10.07

大當晝，大人睡目
Theu tông tsu,thai ngìn soi mu̍k
細人仔偷偷走去伯公樹下搞烏龍仔
Se ngìn né thêu thêu tséu hi pak kûng su hâ káu vû liùng é

對捽來火盒仔放出烏龍仔
Tui tshu̍t lòi fó ha̍p é piong tshút vû liùng é
用手掌拍暈伊
Yung sú tsóng phok fùn kì
用細索仔搖暈伊
Yung se sok é yèu fùn kì
烏龍仔一見面就大聲小聲
Vû liòng é yit kian mien tshiu thai sâng se sâng
咬得兩隻翅緊顫
Ngâu a lióng tsak yi̍t kín tsûn
撞來撞去，拚輸拚贏
Tshong lòi tshong hi,pia sû pia yàng
有時節，尋沒索仔
Yû sṳ̀ tsiet ,tshìm mò sok é
一出手，向阿妹頭腦拔幾枝
Yit tshut sú,hiong â moi thèu nà pâng kí kî
阿妹目汁緊滴鼻水緊流
 moi mu̍k tsṳp kín tiet phi suí kín liù
佔佇頭前毋想走
Tsiam thê thèu tshièn m̀ sióng tséu
沒幾久，又拔幾枝
Mò yit kiú,yu pâng kí kî
緊看緊噭泣緊罵人
Kín khon kín kieu tsṳ̂ kín ma ngìn

阿妹要嫁人ke時節
 moi oi ka ngìn ke sṳ̀ tsiet
講起頭擺搞烏龍仔ke事情
Kóng hí thèu pái káu vû liòng é ke sṳ tshìn
抓著我等ke頭腦毛不放
Néu mún ngài tên ke thèu nà mô m̀ piong

大家大聲喊
Thai kâ thai sâng hêm
嫁分人後正同老公相鬥
Ka pûn ngìn heu tsang thùng ló kûng siông teu
這下毋好亂咬人
Yá ha m̀ hó lon ngâu ngìn

註解：烏龍仔＝黑蟋蟀,