《《原鄉．夜合》 客語詩集》

 | | | 轉寄

秋夜放田水 Tshiû ya piong thièn suí

作者 曾貴海 白話字：邱淑華 2007.10.14

秋夜暗晡
Tshiû ya am pû
月公像一尾小白帶魚
Ngia̍t kûng tshiong yit mî se pha̍k tai ǹg
金金吊天邊
Kîm kîm tiau thiên piên

阿叔帶我去放田水
 suk tai ngài hi piong thièn suí
用腳頭挖開上坵田滣
Yung kiok thèu yat khôi song khiû thièn sùn
就坐落來叭煙
Tshiu tshô lo̍k lòi pak yân
吸一口閃一絲光
Sut yit héu sám yit sî kông
遠遠ke庄肚
Yán yán ke tsông tú
幾盞燈光眨著目珠想睡目
Kí tsán tên kông ngiap tén mu̍k tsû sióng soi mu̍k

水聲流過腳底ke田滣
Suí sâng liù ko kiok tái ke thièn sùn

靜靜ke田坵暗夜
Tshin tshin ke thièn khiû am ya
響起「蛙」仔同虫仔聲
Hióng hí kuái é thùng tshùng é sâng
風吹過田坵尾ke竹頭樹
Fûng tshôi ko thièn khiû mî ke tsuk thèu su
盡多小鬼佇竹葉尾喊我等
Tshin tô se kuí thê tsuk ya̍p mî hêm ngài tên

四周ke夜沒邊沒底
Si tsû ke ya mò piên mò tái
阿叔恬恬毋講話
 suk tiâm tiâm m̀ kóng fa
帶我來到這黑暗世界ke中心
Tai ngài lòi to yá vû am sṳ kiai ke tsûng sîm
像分人擲去世間暗角
Tshiong pûn ngìn tsiet hi sṳ kiân am kok

驚到想噭泣ke時節
Kiâng to sióng kieu tsṳ̂ ke sṳ̀ tsiet
阿叔手指左邊ke大黑影
 suk sú tsṳ́ tsó phién ke thai vû yáng
月光下天頂上坐著南大武山
Ngia̍t kông hâ thiên táng hong tshô tén nàm thai vú sân
伊講山神一直看守我等
Kì kóng sân sṳ̀n yit tshṳ̍t khon sú ngài tên


這兜老公太ke後代
Yá têu ló kûng thai ke heu thoi
係毋係還會來放田水
He m̀ he vàn voi lòi piong thièn suí




腳頭＝鋤頭
叭煙＝抽煙
「蛙」＝青蛙
這兜＝這些
係毋係＝是不是