《《原鄉．夜合》 客語詩集》

 | | | 轉寄

發香先生 Fat hiông sîn sâng

作者 曾貴海 白話字：邱淑華 2007.10.21

半路竹林屋ke發香先生
Pan lu tsuk lìm vuk ke Fat hiông sîn sâng
台北醫專畢業後就歸鄉下
Thòi pet yî tsôn pit ngia̍p heu tshiu kuî hiông ha
佇屋家老伙房開業
Thê vuk khâ ló fó fòng khôi ngia̍p

三百六十五日沒休診
Sâm pak liuk sṳ̍p ńg ngit mò hiû tsṳ́n
喊了就行
Ham mè tshiu hàng
老嫩大小燒冷病痛全部看
Ló nun thai se sêu lâng phiang thung tshiòn phu khon

騎一台舊踏腳車
Khì yit thòi khiu kiok tha̍p tshâ
發風落雨沒推辭
Pot fûng lo̍k yí mò thuî tshṳ̀
偏僻角落那都去
Phiên phit kok lo̍k nai lûng hi
看病沒錢沒要緊
Khon phiang mò tshièn mò yeu kín

照顧鄉人五十年
Tseu ku hiông ngìn ńg sṳ̍p ngiàn

對後生看到老
Tui heu sâng khon to ló
沒起大樓沒討小妻沒買汽車
Mò hí thai lèu mò thó se tsiá mò mâi tshung tshâ
閒了，叭一枝煙
Hàn nè, pak yit kî yân
佇廟前同老人家行相棋
Thê meu tshièn thùng ló ngìn kâ hàng siong khì

人講佳冬出醫生
Ngìn kóng Kâ Tûng tshut yî sên
發香先生過身後
Fat hiông sîn sâng ko sṳ̂n heu
沒一個醫生歸故鄉接落去
Mò yit ke yî sên kuî ku hiông tsiap lo̍k hi



發風＝刮風