《《原鄉．夜合》 客語詩集》

 | | | 轉寄

肖應 Seu Yin

作者 曾貴海 白話字：邱淑華 2007.10.28

佳冬六根庄頭庄尾
Kâ Tûng Liuk Kîn tsông tèu tsông mî
挫上挫下
Tshók sông tshók hâ
沒人毋識肖應
Mò ngìn m̀ sṳt Seu yin

著一領油粕粕ke爛衫褲
Tsok yit liâng yù tsi tsi ke lan sâm fu
頭腦毛長到膝頭
Thèu nà mô tshòng to tshit thèu
想到了就大喊一聲「好！」
Sióng tó è tshiu thai hêm yit sâng「hó!」

毋知伊好麼介
M̀ tî kì hó mak ke
沒妻沒兒沒頭沒路
Mò tshî mò yì mò thèu mò lu
身上沒帶半文錢
Sṳ̂n hong mò tai pan vùn tshièn
人生到底好麼介
Ngìn sên to tái hó mak ke
倚佇路角
Khî thê lu kok
看故鄉人來人去
Khon ku hiông ngìn lòi ngìn hi
慢慢ke
Man man nê
故鄉ke河壩田坵海岸巷路
Ku hiông ke hò pa thièn khiû hói ngan hong lu
變款又變樣
Pian khuán yu pian yong
還小時節ke佳冬去那了
Vàn se sṳ̀ tsiet ke Kâ Tûng hi nai è

毋識同庄肚人講過話
M̀ sṳt thùng tsông tú ngìn kóng ko fa
每日恬恬看著故鄉
Mî ngit tiâm tiâm khon tén ku hiông
暗了，正尋新開ke路歸去
Am mè,tsang tshìm sîn khôi ke lu kuî hi




肖應＝故鄉一位精神病患
挫上挫下＝四處遊蕩
著一領＝穿一件
油粕粕＝沾滿油漬
麼介＝什麼
沒頭沒路＝沒有工作
倚佇＝站在