《Kahui ê Tâi-bûn Phû-tô-hn̂g》 |
 |
 |
|
 轉寄 |
Tâi-gí pí-sài
作者 Ko Ka-hui 2019.12.08
Ē kì-tit téng kò gue̍h ê 21 hit-kang, góa khì Sîng-tāi tsham-ka Aulinpikho pe̍h-uē-jīt tui~tui~tui~ê pí-sài, tse sī tsuân-kok tē it kài ê Pe̍h-ōe-jī pí-sài. Tsit ê ua̍h-tōng sī góa ê Tâi-gí lāu-su kóo-lē guá khì tsham-ka--ê, góa phō-tio̍h sió khuá kín-tiuⁿ ê sim-tsêng, tō tsē hué-tshia ka-kī khì ah!
Guá thê-tsá beh puàⁿ tiám tsing kàu hiān-tiûⁿ, tsē tī gōa-kháu ê í-á tī hiah tán sî-kan kàu beh ji̍p-khì pí-sài, tsi̍t-ê sî-tsūn mā-sī koh sió-khuá kiaⁿ-kiaⁿ. Sî-kan tī beh kàu ê sî , tō ū kang-tsok jîn-guân kóng ē-tàng ji̍p-lâi sing tshue ling-khì, sim-tsêng pàng khin-sang, góa tō kín ji̍p-khì tsún-pī, koh hām piⁿ á ê a-tsí si̍k-sāi hām i kóng-ōe, sūn-suah tiâu-tséng guá ê sim-tsêng hōo khah pîng-tsīng--leh！Kuè bô guā kú, kóng beh khai-sí pí--á.
Guá iáu sī ū tsi̍t-tiám-á kín-tiuⁿ. Tē it kuan khó suah, beh kong-pòo tsîng tsa̍p miâ ê sî , sim-lāi siūⁿ kóng ing-kai ē tio̍h--lah, kiat-kó guá tsin-tsiàⁿ ū pâi--ji̍p-khì neh！Guá pâi tī tē sì--ê, án-ne tō sī beh koh tshian-piàⁿ tē jī kuan ah o͘h！Si̍t-tsāi tsiok tshì-khe--lah!
Tsiúⁿ kàu-siū sī tsú-khó-kuaⁿ, khuàⁿ-tio̍h i góa tsiok kín-tiuⁿ--ê!Góa ē kì-tit tē it tiâu tê-bo̍k tō kòng-tò tshit ê lâng, tshūn 3 ê lâng teh pí niâ , tsai tiûⁿ ê pêng-sím kóng án-ne sing pí tsîng 3 miâ, pí tsit-ê--á tio̍h tshut--lâi-ah!
Ah góa--leh？Tshūn tshit ê lâng lo̍h-khì pí, guá tō sī kî-tiong tsi̍t-ê, pí kàu guá tsia ê sî-tsūn , khèh-tio̍h tē 6 mâi, hit ê sî-tsūn kî-si̍t góa ū tsi̍t-tiám-á m̄-káⁿ siong-sìn , kài-sîng teh tsò bāng neh! Guá ê Tâi-gí lāu-su mā tī hiān-tiûⁿ, i kóng guá tsiok gâu--ê, koh ka guá lám, guá sim-lāi tsin-tsiàⁿ ū-kàu huaⁿ-hí--neh！Hó-ka-tsài guá ū thiaⁿ Kim-hua lāu-su ê ōe uē, lâi tsham-ka tse Tâi-gí Bûn-huà li̍k-sú-sìng ê pí-sài.Ǹg-bāng guá ē-tàng uī Tâi-gí kè-sio̍k phà-piàⁿ--lo̍h-khì lah!
