《林茂生博士論文》

 | | | 轉寄

第六章 新台灣教育令時期

作者 英語：林茂生, 華語：林詠梅, 台語：林俊育 2017.09.24

第六章 新台灣教育令時期（1922年到1929年）

一）政治情況kah社會條件

1） 政治情況
頭前已經敘述過，田男爵總督tī 1919年就職開始，得tio̍h下村宏博士，to̍h是當時總務長官ê輔助，對台灣ê統治做劃時代ê改革。伊公然宣布「內地延長」ê理論會是伊ê施政方針，而且伊iáu強調台灣是帝國實質ê一環，她ê人民經過詳細精選ê教育，會成做日本名副其實ê國民。 田總督ê施政工作中siōng引人注目ê是，解決有關六三法所引起ê問題。伊設立地方諮詢機關kah台灣評議會，這是伊tī行政上ê跨一大步。這以外，伊實行日本本地通用ê民法kah商法；而且，為tio̍h加強「內地延長」理論ê涵義，tī 1923年，伊邀請日本皇太子（to̍h是現今ê天皇〉訪問tsit-ê島嶼（註：1）。

田總督所主張ê理論kah政府ê做法往往引起衝突，因為當時in是互相對立ê。Tī頂一階段，伊為台灣人民所實行ê教育制度，kah提供hō͘日本人ê完全兩樣，同時，程度mā遠遠落後。「內地延長」ê主張kah同時期ê教育水準是真明顯自相矛盾，台灣人民中間ê知識份子並無贊同tsit種主張（註：2）。Tī 1922年，田總督改正教育令，因為伊覺察tio̍h實際ê應用無法度達tio̍h伊ê基本方針。這改正教育令，hō͘台灣ê教育實施kah日本本地平行，台灣人民kah日本人ê差別教育就án-ne廢除。 1923年田總督離職退休，接伊了後有四任總督，lóng是文官。In大致上lóng堅持in tsit位有名ê前任者ê施政方法，tī教育方案上無做重大ê改革。

2） 社會條件
Tī頂一個階段，台灣人民已經真敏捷感受tio̍h民族意識ê成長，民族自尊，tī tsit階段koh khah顯明。這當然是受tio̍h內部政治事務ê影響，同時mā受tio̍h威爾遜總統（Woodrow Wilson）ê「民族自決」主義ê影響，這tī大戰中以及戰後風行全世界；當然，tsit時tsūn tsit-ê思潮主導台灣政治思想界。

「文化協會」 tī頂一個階段成立，目的是beh喚醒對台灣文化ê關心，tsit幾年來，對本地人民ê啟蒙工作有明顯ê成就。有一個政治社團稱做「台灣議會期成同盟會」（促立台灣議會協會），tī頂一個階段興起了後mā仝款活跳。《台灣青年》是月刊雜誌，由以上兩個社團ê發起人創立kah支持，tsit-má改名做《台灣民報》（台灣人民之聲），並tùi月刊改成做週刊。聽講它ê銷路超過一萬份。Tsit份雜誌大大鼓吹民主精神kah擁護新文化。

直到最近，該運動ê中心人物分裂做兩派，一派叫做「人民黨」，有它ê政治kah文化發展ê目的；另外一派iáu-koh保留「文化協會」ê名，大致上強調人民ê經濟發展。實質上，tsit兩派tī要求政治以及經濟上kah日本人平等，持有仝款ê立場，in mā仝款反對由田總督所規劃ê日本文化ê同化過程，此過程由伊ê繼承者繼續護航。

表現台灣人民新自由精神ê兩種主要思潮以外，iáu有第三個團體興起，in是極端激進kah坦白正直，tsiok受近代社會主義思想ê影響。Tsit-ê團體全心關注tī階級爭鬥，mā to̍h是勞資之間ê紛爭。因為散播tsit種思想ê結果，今á日真tsē工會kah農民協會遍佈全島。三個社團ê領導人物，主要是日本、中國kah西方國家個高等學府畢業生á是學生。

Tsit-má咱看tio̍h台灣人民，經過真tsē階段tsiah達tio̍h in今á日ê態度。日本人統治初期，咱看見in對日本人教育價值kah日本文化ê懷疑。M̄-koh，tī日俄戰爭了後，in發見日本文化確實是值得尊敬，並且了解提供hō͘ in ê教育是有價值ê，而且對in ê發展是有必要ê。Tī tsit階段，tī觀念上，in tùi lám-nōa變做雄心勃勃。Tsit-má in來到第三階段，這是有文化kah民族尊嚴ê意識階段，隨tòe teh來ê是對政治kah經濟平等ê渴望，保衛家己文化ê要求，並反對由另外一種文化來代替，雖然另外一種文化是in所認知koh尊重ê，in iáu是寧可疼家己ê文化。 因為tsit種態度佔上風，教育內容不得不會受影響。因為人民方面，自由開放ê態度ê生長，結果是政府方面ê保守力量，來致使koh khah嚴格ê同化。這to̍h是為何ài tī 1922年tsit年，原本有差別並隔離日本人kah台灣人民ê教育制度，tsit-má合併並強化塑造台灣人民，hō͘ in koh khah接近日本人ê模型，並擴大同化方針。這是tī 1922年頒佈第二個教育令á是改正教育令ê主要原因。

二）1922年新台灣教育令（註：3）

1） 教育令內容
第一條 Tī台灣ê教育根據本令。
第二條 國語常用者ê初等普通教育根據小學校令。
第三條 國語無常用者ê初等普通教育ê學校是公學校。
第四條 公學校ê目的在tī注意兒童身軀ê發展，並施與德育以及授與生活中必要ê知識kah技能，涵養國民性格，學習國語。
第五條 公學校ê修業年限為六年，m̄-koh，依地方ê情況ē-tàng縮短。 公學校ē-tàng入學者，年齡滿六歲以上者。修業年限六年ê公學校，thang設置修業年限二年ê高等科。高等科ē-tàng入學者，修業年限六年ê公學校畢業生á是依照台灣總督ê規定而有同等á是以上之學力者。公學校thang設有補習科，補習科修業年限kah入學資格ê有關事項依照台灣總督規定。
第六條 公學校ê設立、廢止、教科編制、設備kah學費ê有關事項，依照台灣總督裁定。
第七條 入學資格，凡是修業年限六年ê公學校畢業生、一般小學校畢業生、公學校高等科第一年修業者á是畢業生、各高等小學校第一年修業者á是修業年限二年ê高等小學校畢業生。
第八條 高等普通教育根據中學校令、高等女學校令kah高等學校令。
第九條 實業教育根據實業學校令。
第十條 專門教育根據專門學校令，大學教育kah其它預科教育根據大學令。
第十一條 敕（thik）令中第二條kah前三條規定文部大臣ê職務部分就án-ne由台灣總督執行。
小學校令、中學校令kah高等女學校令ê根據，因為台灣特殊tāi-tsì有必要設立特例ê時，台灣總督thang另制定法令。 高等學校ê設立kah教員資格、實業學校ê設立kah教科書、專門學校ê設立kah大學預科教員資格ê有關事項，根據台灣總督之裁定。
第十二條 師範教育實施ê學校是師範學校。師範學校特別注重德性ê涵養，來培養有志成做小學校教員者kah公學校教員者為目的。
第十三條 師範學校設有小學師範部kah公學師範部。M̄-koh tī特殊情況下，kan-taⁿ設小學師範部á是公學師範部。小學師範部是教育有志成做小學校教員者，公學師範部是教育有志成做公學校教員者。
第十四條 師範學校ê修業年限為六年，包括普通科五年kah演習科一年，m̄-koh ，女子師範教育ê修業年限為五年，普通科縮短一年。
第十五條 師範普通科ê入學資格是，一般小學校畢業生，á是認定有台灣總督所規定同等，á是以上之學力者。演習科ê入學資格是，修完普通科者、中學校á是修業年限四年ê高等女學校畢業生，á是認定有台灣總督所規定同等á是以上ê學力者。
第十七條 師範學校會設有研究科kah講習科。研究科kah講習科ê修業年限kah入學資格，由台灣總督規定。師範學校會設有附屬小學校kah附屬公學校。M̄-koh， kan-taⁿ有小學師範部ê師範to̍h只有附屬小學校，kan-taⁿ有公學師範部ê師範學校to̍h只有附屬公學校。若有特殊情況，公立小學校thang代替附屬小學校，公立公學校thang代替附屬公學校。
第十八條 師範學校thang做官立á是公立。公立師範學校由州á是廳ê經費設立。
第十九條 公立師範學校ê設立kah廢止由台灣總督認可。師範學校ê教科「編制」設備kah學費有關事項由台灣總督決定。
第二十條 Tī特殊情況下，官立、州立á是廳地方費設立ê中學校á是高等女學校thang設置師範學校ê演習科á是講習科。第17條ê規定thang應用tī中學校kah高等女學校。
第二十一條 Tī特殊情況下，根據台灣總督ê裁決，國語常用者thang進入公學校，國語不常用者thang進入小學校。
第二十二條 本令規定以外ê私立學校、特殊教育kah其它教育設施ê有關事項根據總督決定。

附則
第二十三條 本令施行日期由台灣總督決定。
第二十四條 1919年所頒佈敕（thik）令第1號台灣教育令廢止。
第二十五條 本令施行ê時，已經存在ê台灣小學校、公學校、中學校、高等女學校、實業學校、簡易實業學校kah師範學校，成做各自根據本令設立小學校、公學校、中學校、高等女學校、實業學校kah師範學校。
照1919年頒佈ê台灣教育令設立ê師範學校，它ê在學學生iáu照舊令繼續求學。
第二十六條 本令施行ê時，台灣現存ê高等普通學校kah女子高等普通學校，成做根據本令來設立ê中學校kah高等女學校，m̄-koh，到taⁿ iáu在學ê學生iáu照舊令繼續求學。
第二十七條 本令施行ê時，現存ê總督府高等商業學校（註：4）、總督府醫學專門學校kah總督府農林專門學校，成做依照本令設立ê專門學校。台灣總督府醫學專門學校kah台灣總督府農林專門學校。Tsit-má在學學生，在學期間iáu依照舊令。本令施行ê時。台灣總督府商業專門學校，tsit-má在學學生，直到畢業照舊令。 （根據1922年3月所頒佈ê府令第18號，決定「台灣教育令tī 1922年4月1日開始施行」。）

2） 比較日本人kah本地人1922年新教育令tsìn前ê教育
直到1907年，tī台灣ê日本人教育kan-taⁿ到中學校為止。中學校ê畢業生渴望接受koh khah koân ê教育者，無其它辦法，除非去日本。Tī 1918年到1919年之間，高等教育ê學校續接成立，如tī台北醫學校ê醫學專門部以及台北商業專門學校。Tùi 1919年到1922年之間，第一個台灣教育令ê主要考慮在tī提供本地人koh khah tsē ê學校，所以，為內地人設立ê學校並無明顯ê進展。

Tī台灣ê日本人教育，無論án怎，總是成做改善台灣人學校教育ê刺激因素。雖然日本人ê學校數目，tī數字上並無大，m̄-koh，有完整koh繼續成長提供tùi小學校到學院階段ê教育。這以外，tsiah-ê學校完全立案並有kah tī日本ê學校相等ê高水準。Tī台灣ê日本人學校畢業生隨時thang取得日本koh khah koân學府ê入學考試ê資格。Tī人口ê比例上，日本人ê學校數目永遠大過本地人ê數目。所以，m̄-nā tī khah好ê設備kah khah深ê課程內容上，同時mā tī學校實際ê數目上，日本人學校是優越過本地人學校。Tùi siōng早時期到1922年之間，提供hō͘台灣人ê教育，它ê程度非常kē路，tsiah-ê真tsē理由容允後來tsiah陳述。通常學校ê設備真兩光（lióng-kong）（註：5），凡若台灣學生lóng渴望去日本進入koh khah koân ê學府求學。咱會發見有真tsē障礙koh oh得成事，除非tī日本koh再用兩、三年á是koh khah長ê時間koh再加訓練來達tio̍h入學ê資格。Tùi台灣人teh讀ê學校ê台灣畢業生，無論in得tio̍h畢業證書證明in完成提供hō͘ in ê課程，iáu是會發見in ê準備無夠應付日本學校ê入學標準。1919年ê教育令應該負起tsit種情況ê責任，因為它hō͘台灣畢業生tī教育上處tī不利ê境況，這mā變成不滿ê焦點。田總督認bat tsiah-ê不利ê情形，伊就án-ne頒佈新教育令，來代替kan-taⁿ存在三年ê前教育令。Tsit-ê新教育令去除頂面所講ê落差，hō͘台灣學生ē-tàng接受kah日本學生類似ê教育。

3）1922年新（改正）教育令ê要旨
雖然區分小學校kah公學校，來識（sik）別日本人kah台灣人ê教育，m̄-koh，照新法令，初等教育ê內容一致化，hō͘ 它ê畢業生有仝款ê khiā腳點，tsit兩種學校ê存在只因為語言ê障礙。M̄-koh，共學教育tī理論上kah實踐上已經被承認。大致上，中等教育kah高等教育比初等教育有koh khah少ê差別，tī tsiah-ê學校時行（kiâⁿ）共學ê情況khah贏過初等學校。

Tī 1922年4月1日，有關tsit-ê教育令ê意義，由田總督發表ê聲明，koh khah清楚表示出來：
「有看tio̍h本島人民ê實情，阮承認教育普及是急務。到taⁿ阮已經完成一部共學制ê試驗，這已經改正以前ê教育令，撒除內地人kah台灣人之間ê差別教育，tī教育上達到完全平等ê地步，本總督實感欣慰。講tio̍h受初等教育ê小學校kah公學校之ê別，是為tio̍h beh hō͘大部分本島人民ē-tàng常用國語ê一時機宜。總講一句，相信將來當文運進步，教化普及，它ê效果顯見ê時，當然內地kah台灣會合一（註：6）。」

Tsit-ê教育令ê幾項重點，由當時擔任學務課長生駒高常詳細kā伊解說（註：7）。伊所講ê ná親像是下面幾點：
（1）「根據新教育令ê方針，阮渴望去除所有ê差別教育。甚至棄除種族名稱。用『hiah-ê國語常用者』指日本人，而且用『hiah-ê非國語常用者』來指台灣人民。」
（2）「台灣ê教育制度tī台灣事情ê許可範圍內，根據內地ê教育制度。」
（3）「Tsit-ê改正令tī台灣kah朝鮮同時發佈。Tsit兩個法令之間tsē少有一kóa差別。Tī台灣ê國語常用á無tī教育上ê區別只限tī初等教育，m̄-koh，tī朝鮮ê tsit種區別繼續到中等教育。」

三）台灣兩頂教育命kah朝鮮1911年以及1922年教育令相比較ê歷史意義

1）引言
Tú親像生駒高常先生所做ê（註：8），當研究台灣政府所實施ê教育。不得不kah朝鮮政府所實施ê教育相比較。當殖民地教育是受非教育政策á是教育以外ê廣泛（huat）政策所決定，卻m̄是由教育理論本身所決定ê時，tsit兩個殖民地（朝鮮kah台灣）。因為有仝款ê政治情況並受仝一個「母國」統治，in ê教育政策仝款出一個法度，它ê決定因素就自然有密切ê關係。Tsit種推測已經受tio̍h歷史發展ê形跡所證實à。

2 ) 條文主要內容kah批判ê共同點
台灣1919年ê教育令背後ê教育政策，mā to̍h是1911年朝鮮教育令背後ê教育政策。In ê共同點大約thang包括三點（1）Tī朝鮮kah台灣，本地人kah日本人接受隔離kah無仝ê教育。( 2 ) 坦白正直來聲明提供教育ê主要目的，在tī塑造日本忠貞ê公民。（3）朝鮮kah台灣ê教育，得適應既有ê落後條件（註：9）。M̄-koh，有一項區別，台灣公學校ê修業年限是六年（註：10），朝鮮是四年（註：11）。

兩地ê人民對tsiah-ê法令有類似ê批評：（1）為本地人所設立ê制度標準。大大比為日本人設立ê制度khah低。（2）用同化為目的ê坦白正直聲明，致使tsit兩方人民tī心理上lóng仝款感受tio̍h民族尊嚴ê傷害（註：12）。

當咱看tio̍h兩個殖民地tī 1922年ê改正教育令，它ê改正ê原因kah精神是hiah-ni̍h類似，hō͘人感覺是仝一個法令，只不過是公佈tī無仝地方。若是有任何無仝ê所在，he就是生駒先生tī先前ê聲明中所提起ê（註：13）。當咱想tio̍h tsiah-ê改正令同時出tī兩位開明ê總督—佐藤男爵kah田男爵，這就bē oh判定tsiah-ê法令是出tī仝一個來源，to̍h是來自tī東京ê中央政府。以下是擔任朝鮮民政廳長ê水野博士所做ê一項聲明。Tsit項聲明kah田男爵ê聲明比較之下，ē-tàng顯示tī主旨上是hiah-ni̍h類似（註：14）。

「Tī tsit-ê新ê教育制度下，各校ê入學資格標準以及課程lóng普遍提高à。Koh講，tsit-ê新教育令提供大學教育kah師範教育。商業kah工業教育親像專門教育kah大學教育仝款，仝款受kah母國仝款ê規定所管理。講tio̍h師範教育。為日本kah朝鮮學者設立共同新制度，來適應tsit塊土地頂面ê環境為目的（註：15）。」

自從tī tsit兩地—朝鮮kah台灣，頒佈tsit-ê改正教育令以來，得tio̍h一kóa補救ê方法，來彌補因為tsìn前歧視ê制度所引起ê傷害（註：16）。Tī理論上，本地人方面因為歧視來引起ê不利情況已經被排除。M̄-koh，除非tsiah-ê不利情況完全消失，真oh避免重複ê批評，而且，當實行新ê制度期間會產生新ê問題，這容允後來tsiahkoh再討論。

四）1922無改正教育令發佈了後學校教育ê發展kah活動大要

1）引言
現階段因為改正教育令ê新規定，m̄-nā學校重新組織，一般教育ê機構mā大量增加。根據1927年kah 1928年《政府年鑑》（第24號kah 25號〉，1926年tsit年，學校ê總數為925間。這顯示比1923年ê數量增加40間學校；教員ê數目mā增加，1923年為6千470人，1926年為6千701人；學童入學人數mā toè-leh增加，tùi 1923年24萬7千886人，增加到1926年ê 25萬5千737人（註：17）。

2 ) 初等教育
初等教育有兩種學校，為日本人來設ê小學校kah為台灣人來設ê公學校。根據新規定，小學校kah公學校lóng由地方稅收來維持。只有師範學校ê附屬學校á是州立女子高等學校，in個別由國庫á是州費來支付。1926年學校、教員以及兒童ê總數顯示有所增加，m̄-koh，無像頂階段hiah-ni̍h hō͘人tio̍h驚。所特別用台灣學齡兒童ê入學百分率為例，1922年為28.82，到1926年只增加到29.02，無法度kah頂階段tùi 15.71（1918年）增加到27.22（1921年）相提並論（註：18）。

3）中等教育
（1）中學校
1929年總共有10間中學校，這顯示tùi 1921年以來增加7間學校。照中學校令ê說明，中學校ê目的在tī提供女子高等普通教育，同時適當重視培養in ê國民道德。教科目包括修身、國語kah漢文、英語（á是德語á是法語）、數學、歷史、地理、博物、物理kah化學、法制kah經濟、圖畫、唱歌kah體操，修業年限為五年，只有完成小學校課程（á是公學校課程）ê學生tsiah有入學資格。

根據新公立中學校規則（註：19），每一州一定tio̍h設立至少一間中學校並維持它，教員ê薪金就án-ne由國庫支付。

（2）高等女學校
為tsa-bó͘-gín-á設立khah koân學府ê目的在tī提供女子高等普通教育，特別注重tī培養in國民道德kah婦德ê涵養。

每一州一定tio̍h負責為tsa-bó͘-gín-á設立一間高等學校，而且負責所有費用，除了教員ê薪水是由國庫支付。

高等女學校修業年限有五年、四年á是三年不等，依地方ê情況而定（註：20）。高等女學校thang提供高等科、補習科、專攻科kah實科。一般學科目包括修身、國語、英語á是德語、歷史、地理、數學、理科、圖畫、家事、裁縫、音樂kah體操，mā提供hō͘日本學生以台灣語當做選修課程。統計顯示，tī 1922年到1926年之間，有三間類似ê新學校成立，入學學生ê總數tùi 2千117人（1922年）增加到4千145人（1926年）（註：21）。

（3）「高等學校」
根據「高等學校令」，有兩種「高等學校」，一種是提供三年高級學術科目課程ê高等科；另外一種稱做「七年制高等學校」，有四年ê尋常科，等於是中學校課程，加上三年ê高等科。Tsit-ê學校，tī名義上所以完成高等普通教育為目的，實際上為hiah-ê想進入官辦大學所設ê預備學院（註：22）。凡若有志成做有望ê大學生，需要完成「高等學校」課程，因為án-ne，tsit間學校tī日本官方教育階梯中佔一個重要ê位置。

台灣ê「高等學校」是「七年制高等學校」，有四年ê尋常科kah三年高等科。尋常科ê教科目包括修身、國語kah漢文、外國語（英語、德語kah法語三種現代語言中任選其中一項〉、歷史、地理、數學、博物、物理kah化學、圖畫、唱歌kah體操。台灣語提供hō͘日本學生當做選修科。高等科分做文科kah理科。文科提供修身、國語kah漢文、第一外國語、第二外國語（隨意科目）、歷史、地理、哲學概講、心理kah論理、法制kah經濟、數學、自然科學、體操；理科教科目包括修身、國語kah漢文、第一外國語、第二外國語（隨意科目）、數學、物理、化學、植物kah動物、礦物kah地質、法制kah經濟、圖畫，kah體操。 有資格許可進入尋常科ê學生，一定是小學校ê畢業生á是被認定有同等學力者。高等科接受尋常科ê畢業生á是完成中學校四年課程者（註：23），á是有同等á是超越頂面所講學力者。台灣ê「高等學校」成立tī 1922年，它ê發展顯示tī表30。

4）大學教育
Tī 1928年，tī台灣設立帝國大學。因為是新近tsiah設立，無特殊ê大事hō͘人談論它，m̄-koh ē-tàng肯定講，它計劃tùi日本kah台灣招生，特別是hiah-ê對南洋區域有興趣做研究ê人。

大學分做兩個學部：文政學部（文學kah政治，這相等於美國ê文學院），kah理農學部（科學kah農業）。計劃招收100個學生，m̄-koh，tī 1929年只有66名學生入學。

5）實業教育
Tī台灣有三種實業學校，lóng由州撥款設立kah維持，教員薪水由國庫供給。修業年限tùi三年到五年不等，看學校ê性質kah地方ê情況而定。它招收小學校á是公學校ê畢業生。課程mā因學校ê種類有無仝，m̄-koh，修身、國語、數學、法律kah經濟，以及體操，是所有ê實業學校lóng提供。物理kah化學、博物、農業實習等學科目會增加hō͘農業學校；物理kah化學、圖畫、實習等hō͘ 工業學校；歷史、地理、外國語以及理科等增加hō͘ 商業學校。1929年tsit年，有6間實業學校，to̍h是3間農林學校，2間商業學校kah 1間工業學校。所有ê實業學校lóng有五年ê課程，tī表31 ê統計數字顯示1921年到1926年之間ê發展情形。

6）實業補習教育
Tsit種學校ê設立是為tio̍h beh hō͘小學校kah公學校ê畢業生兩年ê職業教育，由州á是地方撥款設立並維持實業補習學校。Tī 1926年，有17間農業補習學校、1間商工補習學校、2間商業補習學校、1間水產補習學校。有kóa學校tī夜間開課，這等於是美國ê成人學校。

7）專門教育
Tī 1926年，由中央政府設立並維持4間專門學校，to̍h是台北醫學專門學校、台北商業專門學校、台南商業專門學校kah台北農林專門學校，tsiah-ê學術機構由日本本地ê「專門學校令」所管理。除了台北醫學專門學校修業年限是四年以外，其他學校修業年限為三年。

8）師範教育
台灣ê師範教育tú親像初等教育仝款，受1922年改正教育令ê清楚規定，這thang比照其它tī日本本地受仝款法令所管理ê學校。

Tī 1926年有3間師範學校，tī三個主要城市，台北、台中和台南，各有一間。1927年，tī台北新成立另外一間師範學校，稱做台北第二師範學校。台北第一師範學校，有原國語學校悠久ê歷史，tī 4間師範學校中間是siōng老koh siōng大，它有具備1922年教育令所列舉ê所有師範教育ê課程。其它3間師範學校，設有公學師範部kah公學校教員養成講習科。

直到1928年，有2間高等女學校，設有公學校女教員講習科（註：24）。

9．盲啞教育
直到1926年，只有1間公立盲啞學校設tī台南，tsit間學校早tī日本統治以前，由甘為霖牧師（Rev. Dr. William Campbei）所設立。日本佔領台灣了後，因為它ê社會性質，它ê管理工作便由tsit位出名ê傳教士轉移到州府官員ê手。Tī 1926年，總共有119名學生kah 8位教員。

10．略言私立學校
Tī台灣政府hiah-ni̍h官僚koh有系統ê教育制度之下，留hō͘ 私立學校成長kah發展ê空間是非常微小，這是bē hō͘人tio̍h驚ê。事實上，自從1918年以後，私立學校to̍h真少有進展；私立學校ê設立kah管理lóng由政府嚴密規定kah控制（註：25），m̄准許設立任何私立小學校。有2間hō͘ 男生ê教會學校kah 3間女生ê教會學校。Lóng只有實行中等教育課程，tsiah-ê學校lóng是有完整設備ê私立學校。In真渴望tùi政府得tio̍h「認可」，thang達tio̍h kah公立中學校仝款地位，m̄-koh，因為in堅持學校課程包括宗教教育，he是政府所m̄允准ê，認可問題kah-ná tio̍h等待時間來解決（註：26）。其它私立學校設備比較khah兩光（lióng-kong），並且kan-taⁿ實施一部分ê教育課程，招收ê學生大部分是無法度進入公立學校者（註：27）。

講tio̍h「書房」ê情形，當公立學校漸漸增加ê時，in就減少à。大部分講起來，「書房」存在ê唯一意義是in thang提供一kóa機會，hō͘ 有志tī公立學校ê課前á是課後來學習漢文者得tio̍h學習，因為漢文往往受公立學校所忽略（註：28）。

1922年以來ê教育制度


說明：「高等學校」除了有修業三年ê高等科以外，iáu有修業四年ê尋常科課程，等於修業五年ê中學校課程。

註釋

（1） 聽講皇太子訪問ê教育意義非常大。殿下tī 1923年4月12日離開東京，並tī 16日來到基隆，伊遊歷全島包括澎湖共一兩工。當伊結束旅程ê時，伊發佈聲明如下：「希望台灣人民益加合作，共同圖謀文化ê發達kah民生ê安定，hō͘ 遠近lóng享康福，並感受皇上仁愛ê盛意。」當伊停腳tī台灣ê期問，伊訪問主要城市ê大部分有名學校。聽講hō͘ in教師kah學生非常深刻koh感動ê印象。見吉野秀公，頁454-459
（2） 見平邊淑郎，〈台灣人の施政方針〉，《台灣青年》，第二卷第一號，頁2-9；1918年蔡培火，〈台灣教育江關寸乙根本主張〉，《台灣青年》，第三卷第三號，1921年9月，頁40一49，kah 1921年10月，第三巷第三本，頁50一60；王金海，〈台灣教育に關する私見〉，《台灣青年》，第三卷第二號，頁29一42，1921年8月；林呈祿，〈對台灣教育令ê批評〉，《台灣青年》，第四卷第一號，頁49-58，1922年4月。
（3）1922年2月4日敕（thik）令第20號。
（4）Tsit間學校是為日本人來設立ê，有時叫做台北商業專門學校，來區別台南商業專門學校，he是根據舊令專為本地人來設立ê學校。
（5）比較性ê講法。
（6）見吉野秀公，《台灣教育史》，頁465、466。
（7）見吉野秀公，《台灣教育史》。頁467、468。
（8）見第七章第一節。
（9）見H.H. Underwood, Modem Education in Korea, pp.191一193，International Press, New York, 1926。
（10）見1919年教育令第5條。
（11）見附錄一，1911年朝鮮教育令第9條。
（12）見H.H. Underwood，p.192。
（13）見第六章第二節。
（14）見第六章第二節。
（15）Seool Press, Feb. 9.1922；轉引自Underwood，p.216.
（16）見Underwood, pp.214一217.
（17）見表25。
（18）見表2。
（19）見1928年政府年鑑第25號kah表28。
（20）現今tī台灣ê高等女學校，修業年限lóng是為tio̍h四年。
（21）見表29。
（22）「高等學校」tī某一kóa程度上，kah德國ê Gymnasium á是法國ê Lyce類似。
（23）尋常科畢業生beh進入高等科無需要經過考試。一般學生想進入高等科á是尋常科lóng tio̍h經過競爭激烈ê入學考試，tsit-ê考試是非常困難ê。
（24）見表35 ê統計數字。
（25）見1922年6月27日府令第138號。
（26）聽講tī朝鮮ê教會學校mā有仝款ê問題。見Underwood, pp.219-220.
（27）見表36 ê統計數字。
（28）見表7 ê統計數字。