《林茂生博士論文》

 | | | 轉寄

第七章 教育行政機關ê發展

作者 英語：林茂生, 華語：林詠梅, 台語：林俊育 2017.10.01

第七章 教育行政機關ê發展

一、 中央政府教育行政ê發展

1, 起動tī 1895年
Tī 1895年5月21日，當台灣總督府臨時政府制度設立ê時，to̍h tī民政局部門中列入學務部，這就是tī日本佔領下ê台灣ê第一個教育行政機關ê開始。同時，tī第一任總督樺山將軍ê選擇kah邀請之下，伊澤修二被指派為學務部長，伊澤是當時日本ê卓越教育家之一。

隔tńg年（1896年）4月，軍事行政改做民事行政ê時，學務部分做兩科，to̍h是教務課kah編纂課。前者主要是負責教育事務，後者ê主要功能為編冊kah發行學校教科書。

2. 1897年ê改革
Tī 1897年10月，因為總督府官制改正，設立兩局，to̍h是民政局kah財務局，每一局koh分做幾個部門。Tsit時，學務課to̍h是民政局ê幾個課中之一。

3. 1898年ê改革
Tī 1898年6月，總督府koh再改組，民政局kah財務局合併為一，稱做民政部，學務課就稱做民政部學務課。

4. 1901年ê改革
1901年11月，總督府官制改正，民政部分做五局一署，因為án-ne，學務課to̍h suah被列tī總務局內面。學務課以外iáu有其它各種組織，像講編纂組、教科用圖書審查委員會、教員恩給委員會等。值得注意ê是，學務課對醫學校、農業講習所á是糖業講習所，並無透過委任á是其它方式ê管轄權，tsiah-ê學校另外設有專門令管理。

5. 1909年ê改革
根據1909年10月，政府ê改正制度，總務局被廢除，學務課就án-ne附屬tī內務局。同時，tī 1901年設立ê編纂組mā遭遇廢除，tī學務課裡重組編纂組。Koh講，1901年5月敕（thik）令第131號解決久長以來懸而未決（hiân--jî-bī-kuat）ê學事視察制度ê問題。根據tsit仝一個敕令，有一部分政府機構（官制）受tio̍h改進，並指派一位督學官kah幾位督學。

6. 1911年ê改革
根據1911年10月敕（thik）令第260號，總督府官制koh重新改正。因為tsit pái ê改組，到taⁿ屬tī內務局ê學務課就án-ne獨立，成做民政部真tsē部門中ê一個部門，to̍h是學務部，主管全島教育事務。而且兩課to̍h是學務課kah編修課koh重新設置，後者負責教科書ê出版、編修、檢定kah翻譯，前者主管kui個學校行政事務。除了tsit兩課以外，iáu設有公學校教科用圖書審查委員會、教員檢定委員會、學校教員恩給審查金委員會，以及督學委員kah督學補助委員會。

7. 1919年ê改革
Tī 1919年6月，總督府官制koh再重組。過去ê制度由四個局組成，to̍h是財務局、通信局、殖產局kah土木局，改由六局組成，to̍h是內務局、財務局、殖產局、遞信局、土木局kah警務局，並設有法務局。過去ê學務部被廢除，tī內務局設立學務課kah編修課，前者主管kui個教育事務，後者負責教育書籍ê出版、編修、發行、檢定、翻譯kah銷售。除了tsit兩課以外，iáu包括以上己敘述ê各種委員會。 Tsit-ê制度繼續到1924年，tsiah kā兩課合併為一，to̍h是文教課，像以前仝款屬tī內務局。Tsit-ê新設立ê文教課，就ná它ê名稱所表明ê，除了通常ê教育事務以外，增加兩個重要ê事務，to̍h是宗教事務kah社會工作。

8. 1926年ê改革
「文教課」向koh khah有權力而且獨立ê「局」邁進，tī 1926年10月12日，根據敕（thik）令第321號，成立文教局，標示中央教育行政上ê新紀元。以下是目前教育行政ê中央編制。

文教局ê人事親像下面（註：1）： 局長···········1人（敕任） 事務官···……2人（薦任） 督學官···……5人（薦任） 編修官···……2人（薦任）

局中四個辦公室親像下面：
(1) 庶務係
(2) 督學室，負責
(a)學事視察
(b)改善學校kah成人教育
(c）教育kah文化調查

(3）學務課包括兩係，to̍h是
(a)學務係，負責
一敕語謄本ê有關事項
一教員檢定ê有關事項
一體育kah學校衛生ê有關事項
一專門學校入學資格檢定ê有關事項
(b)編修係，負責
一教科用圖書之編修·檢定、著作、翻譯版kah保管ê有關事項
(4) 社會課，負責有關
(a)神社kah宗教
(b）節日獻穀
(c）圖書館kah博物館
(d）社會團體、人民娛樂kah其他教化團體ê有關事項
(e）軍事救護
(f）賑恤救災工作、兒童保護、失業救濟、公設當鋪等
(g）公益法人

二、地方政府ê教育行政發展

1, 引言
地方教育行政不時因為中央（總督府）官制ê改變來改變。Tī 1896年4月初，設立三縣（主要轄區）kah一廳（次要轄區），每一縣ê內務課lóng指派一名學務主任負責教育事務。

經過1897年5月kah 1898年6月地方官制ê改革，tī每一轄區ê內務部設立學務主任kah學事視察員來主管教育。

2, 1901年ê改革
1901年改革ê結果，新設立二十「廳」，每一廳ê總務課設有一位學事主任。（「廳」是比較khah細ê政治實體，比遭廢除ê「縣」khah細。）Tsit-ê制度一直繼續到1909年ê改革。

3, 1909年ê改革
Tī 1909年5月ê改革，kā 20廳改做12廳。每一廳ê庶務課設有學務主任kah伊ê部屬，負責地方學校事務。

4, 1918年ê改革 1919年8月，由庶務課直接任命督學，負責有關學事視察ê事務。這是tī地方學校ê事務上第一位督學。

5. 1920年ê改革
Tī 1920年9月，地方官制經過重大ê改革，全島設五州（khah大ê行政區）kah兩「廳」（khah細ê行政區）。每一州ê內務部新設立教育課，負責學校事務，由階級koh khah koân ê官員掌理tsit課，並tī每一課指派兩位督學。

地方教育課負責ê事項真清楚界定親像下：
(1) 神社kah神職有關事項
(2) 宗教建築物、宗教團體、修道者、教師kah其它宗教有關事項
(3）兵事有關事項
(4）軍需工業動員有關事項
(5）學校、幼稚園、「書房」、圖書館kah其他學事有關事項
(6）學校職員退休金、遺族撫卹（hú-sut）金kah扶助金ê有關事項
(7）學校衛生有關事項
(8）學事視察有關事項
(9）華語普及有關事項
(10) 社會教化有關事項

Tī每一郡（譯按：州廳以下設郡）、市（譯按：五州中設五市），mā設一位督學負責郡、市內ê學校事務。地方教育活動ê正式組織就án-ne確立落來。當然，它ê制度kah中央政府類似，kan-taⁿ是格局khah細。全島每一州lóng設有一位教育課長（薦任）、9位督學kah 23位屬員，市、郡共有44位督學。三廳（由高雄州分出一廳suah成三廳）有三位督學。以上所描述ê所在，教育行政制度一直繼續到tsit-má，並無受tio̍h 1926年中央機關改革ê影響。

註釋
（1）見吉野秀公，頁474-475。