《林茂生博士論文》

 | | | 轉寄

[推薦序一] 《建立殖民地教育史研究ê標竿》

作者 吳文星 2017.04.30

近二十年來，台灣歷史ê研究大發彩（華語「蓬勃發展」），漸漸成做台灣歷史學界重要ê研究領域，其中，對日治時期ê研究尤其呈現激增ê趨勢，探討範圍大大擴張，研究態度無koh固守僵化ê意識形態，轉變到講求實證、理性kah客觀，史料ê整理（華語「爬梳」）力求（le̍k-kiû）有所突破，對相關ê研究就án-ne力求周至掌握，處處lóng是thang歡喜ê現象。

就研究史來看，早期研究日治時期ê人差不多lóng是日本人，台灣人非常少，近代台灣思想家兼教育家林茂生博士ē-sái講是先行者。林氏tī 1927年六月以台灣總督府在外研究員身分，出發去美國留學，進入哥倫比亞大學深造；1929年十一月，以《Public Education In Formosa under the JapaneseAdministration: A Historical and Analytical Study of Development and the Cultural Problems)（編按：to̍h是本冊）ê論文得tio̍h博士學位。Hit-ê論文乃是探討台灣殖民教育ê第一本學術性論著，可惜因為長期bē-tàng正式出版問世，知影ê人非常少。M̄-koh，詳細看它ê內容，真tsē論述kah看法相當值得咱來重視kah參考利用。Taⁿ約略舉它ê要點，紹介如下：
其一、問題意識有符合時代精神。伊用近代民主主義ê教育理念來檢視日本tī台灣ê殖民教育，強調近代教育ê目的在tī tùi學生ê內在啟發伊ê創造力，卻m̄是tùi外在hō͘伊強制性ê灌輸，若無，kan-taⁿ會破壞學生ê創造力。伊指出日本固然用她本國現代化ê經驗，致力tī台灣ê現代化，m̄-koh，用同化做依歸ê教育顯然違反民主ê精神。所以，伊ê研究目標除了tùi教育制度本身、發展過程kah主導發展ê方針做歷史ê探討以外，並且分析教育活動中ê文化衝突kah和諧ê原因kah影響，tshōe出建設性ê改善之道。真顯然，林氏希望藉tio̍h實證ê研究來提出改進意見，提供hō͘ 總督府採用。
其二、用比較方法觀察台灣、朝鮮、菲律賓等殖民教育制度kah措施ê異同，提出有khah客觀ê看法。
其三、資料ê掌握kah利用非常周至。雖然礙tī規定，無法度利用基本檔案，m̄-koh，伊充分利用英、日文ê官方出版品kah研究論著，甚至有用報紙、雜誌ê相關文字。伊ê研究thang講是一定有依據，論述十分頂真、紮實。
其四、針對同化教育、用日語為教育基礎、台日共學、差別待遇、義務教育、中等以上教育機會嚴重不足等等ê重大教育問題，伊一一進行實證性ê檢討kah批判。伊認為小學低年級應當以母語當做教學ê用語，中年級以上tsiah漸漸用日語當做教學ê用語。開放台日共學固然值得讚揚，m̄-koh，台灣人所渴望ê乃是「仝一個制度，m̄-koh學校分別」，來保留in ê文化。伊表示用同化做依歸ê教育ê結果，並bē改變台灣人ê本質，m̄-koh，bē-tàng否認ê是：現代化有明顯ê發展。伊指出台灣ê殖民教育遠不如美國ê殖民地波多黎各、海地、菲律賓等等。伊呼籲總督府tio̍h盡量趕緊解決台、日人ê教育機會不平等ê問題，並且廢除差別待遇。Tī結論中，林氏強調有（iú）意ê、強制ê同化教育是無適當ê，台、日人tio̍h互相尊重彼此ê文化，以及tio̍h實施教育機會完全平等ê政策，án-ne，建設性ê教育tsiah有可能實現。

Tùi頂面thang知，林氏雖然身處殖民地環境下，卻ē-tàng無受環境所束縛。伊ê論著用普遍ê價值觀念，來實證而且理性檢討殖民教育，提出真tsē寶貴ê意見，thang講有建立殖民地教育史研究ê標竿。今á日，伊ê論著m̄-nā是研究林氏教育思想kah伊對殖民教育批判重要ê素材，同時mā是有志tī研究日治時期教育史ê人bē-tàng欠缺ê參考用冊；根據這，á是印證林氏ê論述，á是用林氏ê意見做起點，進一步來深入探討。

本冊雖然是譯本，m̄-koh，譯文正確koh流利，充分傳達原著ê意思，而且hō͘人有真大ê興趣，相當有可讀性。本冊譯本終於ē-tàng出版，這ē-sái講是台灣研究界hō͘人歡喜ê大盛事（sēng-sū）。咱thang預期ê是，tsit本冊對未來ê台灣教育史研究，一定有重大ê影響。出版之餘，爰綴(華語)數語，略抒所感，是為序。
（作者為台灣師範大學歷史系教授）