《林茂生博士論文》

 | | | 轉寄

[推薦序二] Kā台灣人ê聲音放送到國際上

作者 吳密察 2017.06.11

林茂生先生自從進入東京帝國大學了後，伊to̍h是台灣siōng被矚目的學者、文化人。二0年代初期，文化協會舉辦「夏季學校」ê時，伊kah連雅堂差不多to̍h hông當做是島內有關西洋文化kah台灣文化ê代言人，二人分別講授「西洋文明史」kah「台灣通史」。Tsit款ê林茂生先生，伊以後到美國哥倫比亞大學留學，伊ê博士論文竟然to̍h是tsit本《日本統治下台灣ê學校教育—它ê發展kah有關文化之歷史分析kah探討》。林茂生先生án-ne tī西洋ê大學中，用台灣ê新式教育史為題，撰寫博士論文，到底真正ê意義是啥物？這真正是值得以後大家討論ê問題。我想林茂生先生有可能是有意beh kā伊對日本殖民政府教育ê批判，透過tsit種外國管道傳揚出去，mā to̍h是beh kā台灣人ê聲音放送到國際上去lah。

另外，我個人顛倒是特別注意tio̍h tsit-ê當時台灣ê「西洋通」（已經通過基督教ê信仰來得tio̍h西方ê文化，koh接受過大學教育），伊tī tsit篇論文中間，雖然正面評價日本殖民政府三十年間tī台灣所積極teh展開ê近代西方式教育建設，m̄-koh，卻mā非常土直teh批判日本殖民地教育中ê差別待遇kah同化主義。尤其是tī「近代教育原則考驗下ê同化政策」hit節中，伊koh khah是慎重teh批判tsit種來自外部ê同化主義教育。Tī tsit節中間，林茂生有引述亨利·亞當斯（Henry Adams)、约翰·杜威（John Dewey)、霍普豪斯（Hobhoose)等西洋哲學家ê話做家己ê憑據，對同化主義ê反民主性質提出批評。Tī tsia，咱看tio̍h一個tī當時有代表性ê台灣近代知識份子所認知ê，甚至用來做論事ê價值標準，mā看tio̍h林茂生先生ê思想koân度。Tsiah-ê想法準講tī今á日mā lóng iáu有啟發性，因為án-ne，我kā其中ê一個片段引述出來，當做tsit篇簡短序文ê結束。

近代教育ê目的，在tī tùi個人內部去發展，卻m̄是kā發展tùi外面強 壓tī個人，因為擔心這可能會阻礙兒童ê創造能力。同化ê出發點，在tī伊家己ê標準，tùi外部beh強加hō͘人，he m̄是人所渴望ê，因為同化ê需要是無必要ê，mā是無hō͘人所認知ê。
（作者為台灣大學歷史系副教授）