《林茂生博士論文》

 | | | 轉寄

[推薦序四] 台灣教育史ê研究先鋒

作者 林玉体 2017.06.25

林茂生先生，台灣台南人，美國哥倫比亞大學教育學院畢業，榮獲博士學位；伊ê學歷kah胡適之ê仝款。Tī哥大ê期間，伊koh深受當時ê名師Paul Monrue, I. L. Kande1, L. M. Wilson) kah G. S. Coonts，以及W. H. Kilpatrick ê指導，tī 1929年撰寫《日本統治下台灣ê學校教育—它ê發展以及有關文化ê歷史分析kah探討》為博士論文。Tsit-má譯做中文，tī林茂生ê故鄉台灣出版。

以台灣為主體性所做ê學術研究kah論文，tī過去ê戒嚴時代，非常冷門。其實，台灣ê一切lóng thang用學術ê角度做深度ê探討。以台灣ê教育史為例，深入研究台灣教育史，m̄-nā內容豐富，而且真有意義，它ê闊度kah深度lóng bē khah輸中國教育史á是西洋教育史。而且台灣學者關心台灣，這是義不容辭ê，mā是理所當然ê，koh khah是無應該推辭ê。

根據台灣四百gōa年ê可靠文字資料，tsit-ê美麗島早to̍h有本來存在ê傳統風俗kah文化，西洋兩大宗教ê強勢國家又koh bat經營台灣一段時間—新教ê荷蘭統治南台灣，舊教ê西班牙佔領北台灣；然後，明鄭kah大清帝國代表中國儒家思想ê文教措施，mā深入tī台灣居民ê心中；日本koh khah是用西方現代文明ê教育制度kah內容，有系統性正式實施tī台灣。台灣學校教育ê開始，to̍h是以1895年算起；大家lóng知，hit年to̍h是日本佔有台灣hit年。目前台灣有bē少學校當teh慶祝立校一百週年，可見日本人一到台灣，to̍h興辦學校；日本政府對台灣教育ê貢獻，比其他統治者加真tsē。 撰寫台灣日治時期ê教育史，siōng完整ê應該是日本人鶴見tī哈佛所撰寫ê博士論文，題目是“Japanese Colonial Education in Taiwan”（1895年~1945年），hit篇論文早to̍h已經發表。林茂生先生tī哥大ê博士論文，評述日治時代ê學校教育史，只到1929年，tī時間範圍ê涵蓋上，khah不如前者。M̄-koh，林先生ê論文，mā提供bē少ê歷史事實，表達特殊ê歷史知識，是研究台灣教育史bē-tàng欠缺ê材料。尤其tī tsit篇論文ê第三部分，林先生有先列出發人深省ê問題kah評論。

台灣ê正式教育是由日本人奠基。M̄-koh，日本人m̄是台灣人，ná親像西班牙人kah荷蘭人m̄是台灣人。日本政府tī台灣ê教育措施，並無kā台灣子弟ê潛能發展列做siōng要緊ê tāi-tsì，tsit種教育ê偏差心態，mā是殖民ê意識，不幸lóng長期罩tiâu tī台灣學生ê心上，甚至到二十世紀結束ê時，猶原án-ne；這是台灣人ê悲哀。以「教育史」ê研究為例，師生kan-taⁿ知影「中國教育史」kah「西洋教育史」，m̄-koh卻無看tio̍h「台灣教育史」，這是台灣教育學術界ê見笑tāi kah大侮辱。若beh彌補tsit種缺憾，林茂生先生ê大作是一個示範作用。

Ǹg望tsit本冊ê出版，thang hō͘台灣教育史ê研究成做研究教育史ê主流，án-ne，林先生七十年前所寫ê論文，對台灣教育史就koh khah有意義ā。
（作者為台灣師範大學教育學院院長）