《林茂生博士論文》

 | | | 轉寄

[推薦序三] 日治時期台灣教育沿革之經典佳作

作者 李遠哲 2017.06.18

本冊作者林茂生博士是台灣第一位得tio̍h日本東京帝國大學文學士kah美國哥倫比亞大學哲學博士殊榮ê人。「林茂生愛鄉文化基金會」秉承前志，繼續teh推動台灣教育文化ê改革，伊對本土文化kah自由民主崇高理念ê提倡，一向無惜氣力。遠哲感佩林博士ê迫切疼鄉情kah知識啟蒙，所以tsìn前答應基金會為林博士tī哥大ê博士論文中譯本寫序。

林茂生博士ê著作—《日本統治下台灣ê學校教育—其發展kah有關文化之歷史分析kah探討》，無論tùi它ê理論結構、分析手路、邏輯推論kah證據引用等等角度來評斷，lóng ē-sái講是一本有下功夫ê佳作。本冊探討日治時代用同化做目的ê教育政策kah台灣本土文化ê衝突面向。作者雖然部分肯定日本tī推動台灣教育普及所做ê努力，m̄-koh，另方面mā直言批評：日本ê殖民地教育政策，tī本質上是一種無平等ê教育。所以，tī量ê方面，m̄-nā台灣人ê小學數量比日本人ê小學數量低真tsē，而且台灣學童ê就學率mā比日本學童ê就學率較低。Tī質ê方面，因為日本皇民化政策ê倡導，致使tī台灣積極推動同化教育kah日語教學，對本土文化素材明顯欠缺。作者針對tsit點，來批評tsit種同化教育政策嚴重壓制台灣本土文化ê發展，因為教科書內容lóng kah台灣本土ê地理、歷史kah文化無關，mā背離台灣學童ê實際生活經驗。這m̄-nā造成學童認同上ê疏遠，mā阻礙in ê創造性思考ê發展。尤其koh khah嚴重ê是，tī普及日語ê政策下，學童hông強迫接受生疏ê外來語言，就án-ne阻礙in吸收課程內容ê能力，進一步koh降低學童ê學習意願kah效率。林博士對日本tī台灣教育政策ê批評kah分析，雖然經過時空ê轉變，m̄-koh iáu是值得目前教育改革者深切省思kah參考。

本冊雖然m̄是教育理論ê專冊，m̄-koh卻展現林博士對教育政策kah實務ê深厚理論基礎。冊中大量收集、整理日治時代ê原始資料kah統計數據，tsiok值得後來ê學者參考。Koh khah重要ê是，透過林博士ê論證kah分析，致使伊ê論點kah證據koh khah有說服力，可讀性非常koân。最後，林博士以宏觀ê角度，詳細審視日治時代ê台灣教育行政kah教育體系ê演變，時間洪流橫跨了西元1895年到1929年。作者對hit時期ê教育制度沿革，做了詳細而且精闢ê分析，ē-sái講是一本經典之作，值得推薦。 （作者為中央研究院院長）