《草地囝仔做牧師》

 | | | 轉寄

幸福ê人生（四）

作者 林宗要 2010.09.12

使徒行傳二十章35節：羅馬人書十四章22節

「Tiàm世間各項大欠，koh-khah好ê tāi-tsì mā有烏點」（聖詩三二二首第五節），此句聖詩指出現實ê人生內容，的確是án-ne，每一個人tī人生無仝ê階段，lóng有無仝ê欠缺，通常咱認為tsiah-ê欠缺若得tio̍h解決，tio̍h是無所欠缺ê人生，mā就是幸福ê人生。若是一個人tiāⁿ-tiāⁿ三頓食buē飽，狠狠得tio̍h改善，伊會感覺家己真幸福；一個人若不時lóng會破病，伊認為ê幸福有可能就是有一個健康ê身軀！一個細漢gín-á心中ǹg望得tio̍h某一項mīn-kiāⁿ，比如腳踏車、新衫新褲或者一粒球，當伊得tio̍h tsit-ê mīn-kiāⁿ ê時，伊會感覺真歡喜，真幸福；男女談戀愛，當二ê人愛情有好ê結果，二人一定會認為家己是siōng幸福ê人，tuì tsiah-ê例，咱ē-tàng知影人生ê幸福並無一定ê標準kap答案。有一個艱苦散赤ê庄腳gín-á，生活各項欠缺，伊夢想著有一日ē-tàng食到油食粿，一定是非常滿足、幸福ê tāi-tsì，但是當這gín-á最後ē-tàng ta̍k工自由ê食油食粿ê時，伊ê心tio̍h可能koh有koh-khah大ê夢想了，這就是人ê心態，相信咱thang tuì本身kap社會中得tio̍h tsiah-ê體會。

幸福確實建立tī具體ê物質條件，當然tsiah-ê條件，比如權力、財富、有價值ê物質，tī某一種程度頂kuân對人生有幫助，mā會滿足人心（人心ê滿足往往hông認為是幸福ê實在），但是這只是人生一段時間ē-tàng掌握伊ê所有權而已，因為無任何人有辦法控制伊所有ê一切物質條件，雖然人thang藉著法律將tsiah-ê物件傳hō͘ in-ê kiáⁿ孫，但是he mā是一段時間ê使用主控權而已，這就是社會權力kap財富無停ê轉手ê實況，譬如咱社會中有一kuá大財主ê事業會換手，權力mā會換手，蔣介石為tio̍h滿足做總統ê慾望來修改憲法，自做5屆ê總統，並將主控權傳hō͘伊ê後生蔣經國，但是結局neh？

Tsit種社會ê現況，說明人生不過是主權暫時ê所有者，這mā是咱教會一直teh強調ê受託ê人生，用tsit-ê心態去思考人生幸福ê問題，tsiah ē-tàng用積極kap開朗ê態度去面對，mā tsiah會有khah正面ê人生狀況。今á日台灣真tsē人已經受tio̍h利益思想影響，伊幸福ê價值觀只看重tī具體美好ê物質條件，比如金錢、權力、珠寶、土地房產、車、名利等，tsit種奇怪ê人生價值觀已經kā人性ê良知kap上帝所要求ê人生內容吞去--a，tsit種看榮華富貴等於幸福人生ê價值觀造成現代人ê虛華，追求財富權力ê社會狀況。因為心態無健全，造成tiāⁿ-tiāⁿ有人為tio̍h beh hō͘慾望得著滿足，用盡一切惡毒ê心機kap手路比如謀財害命、搶劫、綁票、詐欺等，目的就是beh得tio̍h in心目中ê幸福人生，但是咱知影tsit種表面ê幸福是無法度替人生帶來真正有內容ê幸福價值！

現代學者用「草phō族」形容tsit種無健全ê新人類（取伊ê外表好看，但是無法度用水來洗，若teh著to̍h會爛去），是指出現代人無實在ê人生內容，kan-ta有外表，無法度承受人生ê歷練，tú-tio̍h困難to̍h是無法度面對，這是現代人一項真嚴重ê人生狀況，tī tsit種現實ê人生中，基督徒ài如何去建立真正有價值而且幸福ê生活？這是現代基督徒ê課題。基督徒ê人生幸福觀是m̄是kap一般人仝款？只建立tī hiah-ê看會見ê現實kap財富，suah失—去了koh-khah重要，真正會帶hō͘人生幸福ê內容？

每一位信徒lóng真清楚基督向撒但所講ê：「人活teh，m̄是kan-ta靠食物，mā是靠上帝嘴內底所出ê一切話。」（馬太福音四章3節），當撒但koh一pái用世上榮華富貴顯示tī主耶穌面前，主講：「撒但退去罷！當拜主你ê上帝，單ài事奉伊。」（馬太福音四章10節），確實tsiah-ê人所認為ê幸福ê人生條件，對人生生活有時有幫助，但是會記leh，伊m̄是絕對--ê，基督徒必須ài認清，tī人心中所有ê上帝形象ê人性價值，伊ê形成無 tī外在ê物質條件，是tī心靈kap肉體有相仝ê生活內容，tī生活中充分表現出phông-phài ê性命力，koh顯現出聖靈所結ê果子，用誠心去對待人，用愛ê基礎去關懷別人，kap人之間有美好ê情誼等，有一kuá人ê物質生活條件無一定豐富，但是心中充滿美好活潑ê性命力，用誠心去對待人，用愛心去關懷人，kap人建立良好ê友善關係，因此生活非常充實，但是有一kuá人雖然有phông-phài ê物質條件，但是做人刻薄無情、自私自利，kap人關係真bái，這是不幸ê人生。真tsē年前報紙bat報導過tī下港鹽水hit-ê所在有一位真好額ê婦人人，死ê時無人共伊送，只有幾名契tsa-bó͘-kán the相爭財產，記者用「好額suah不仁」來形容伊，這就是不幸、悲哀ê人生。

（一） 問心無愧ê人生：羅馬人冊十四章22節
「人teh家己認為thang行ê tāi-tsì頂面，ē-tàng 無自責，就有福了。」Tsit句經文teh強調問心無愧ê人生。的確tī無完美ê人生現象中，人ê生活ài表現出問心無愧ê生活內容並m̄是簡單ê tāi-tsì，所以一個人若確實ē-tàng建立tsit種完美ê人生內容，伊就ē-tàng體會人生幸福ê實在。

聖經中上帝所要求人ê是盡本分，人ê本分是什麼？就是對上帝kap對人ê態度，傳道書十二章13節「總義就是敬畏上帝、謹守祂ê誡命，這是人所應該盡ê本分。」祂ê誡命tī舊約聖經中記載真清楚，上帝要求伊ê子民「Ài盡心、盡性、盡意疼主你ê上帝，koh ài疼人如己。」主耶穌講這是律法kap一切道理ê總綱，mā就是舊約聖經ê全部精神，當一個人ē-tàng tī生活中án-ne表現，確實盡到人一切ê本分。

所以盡本分ē-sái講是人生全部生活ê內容，mā是人問心無愧ê基本條件，因為若無盡本分，是beh如何講無愧？事實上人生有真tsē應盡ê本分，若buē-tàng逐項完成，tio̍h無資格叫做無愧ê人生，譬如tī厝內ê角色，學生或者khang-khè者，社會生活中ê人kap教會中ê基督徒等，對受託ê人生內容，你若buē-tàng好好á去完成受託ê使命，如何叫做無愧ê人生？一位老父無盡本分，烏白亂來、拍bó͘拍kiáⁿ、無顧家庭，tsit種老父thang叫做無愧ê老父mah？學生m̄認真用功讀冊，kan-ta知影交pháiⁿ朋友，出入無正當ê場所，tsit種學生kám是無愧ê學生mah？耶穌基督救贖咱，是beh hō͘咱成做聖潔，無缺點、無thang責備ê khiā tī主ê面前（歐羅西書一章22節），tsit種講法tī新約中時常可見，保羅teh寫hō͘提摩太ê kap提多書冊信中，講做監督ê資格「必須無thang指責」（提摩太前書三章2節；提多書一章6～7節、二章8節），tsit種無thang指責ê生活是基督要求屬於伊ê子民應該有--ê，mā就是buē見笑ê人生，先知以賽亞書四十九章23節「……等候我ê一定到見笑。」，保羅mā講：「信靠伊ê人一定bē致使見笑」（羅馬人書九章33節、十章11節），這就是我所講無愧ê人生，buē見笑ê人生，伊確立teh人完全謹守上帝ê誡命，因為這是人ài有ê本分，tsit種人ê生活內容永遠是盡本分，而且無論tī人前或者人後，in lóng是仝款，tsit種態度會hō͘人感覺伊有無愧ê人生，這是siōng大ê幸福，期待咱lóng ē-tàng問心無愧，án-ne自然ē-tàng tī生活上大大ê榮耀上帝，上帝tī咱身上得tio̍h榮耀，這是人生siōng大ê福氣！

（二） 歡喜付出ê人生（使徒行傳二十章35節）
「紀念主耶穌ê話講，hō͘人比接受koh-khah有福。」 通常人ê心理lóng是盡力mài得著對家己有利ê條件，因此有人講，人uì出生ê時，雙手就掠東掠西掠無停，無guā久就開始嘴peh開開等人飼，所有物件就塞入嘴，但是當人生行到最後ê時，suah是雙手伸直直，buē掠mā buē食，tsit種現狀tī現實ê生活中mā時常看tio̍h，kan-ta會掠會搶，kan-ta知影入m̄知影出，這是ko͘-tak ê人生，用過去ê人生體驗，過去自利，m̄知影付出ê人生，伊ê人際關係一定buē歡樂，真tsē人生ê悲哀，大部分lóng是tsit種心態所造成。有ê時咱teh探聽某人或者紹介親事ê時會強調「過分接受錢財無好」，過分就變成凍霜，表現出「無度量」，台語講「有量tsiah有福」，的確幸福ê人生是建立tī「有度量」ê過程中，所以主耶穌講「hō͘人比接受koh-khah有福」，箴言中亦時常有歡喜hō͘ ê人一定蒙受祝福ê教育，「有ta̍k工m̄知影滿足ê，義人施捨才buē凍霜」（箴言二十一章26節），「有施捨--ê，會加koh-khah tsē，siuⁿ過凍霜--ê，顛倒散赤，愛施捨--ê，一定富裕，hō͘人快樂幸福--ê，家己mā一定會快樂」（箴言十一章24、25節）。保羅mā kā提摩太講ài「吩咐hiah-ê今世好額ê人，mài看家己siuⁿ重，mā mài倚靠無固定ê錢財。只要倚靠he厚賜hō͘百物hō͘咱享受ê上帝。Koh ài吩咐in行善，tī好事頂面富足，甘願施捨，歡喜提供hō͘人」（提摩太前書六章17、18節），這是基督教ê真理，因為主耶穌就是表現tsit種付出ê典範，伊講「人子來，m̄是beh受人奉待，是beh奉待人」而且獻出性命來贖回人類，tsit種完全ê付出to̍h是基督教ê真理，今á日ê教會kap所有ê基督徒必須ài有tsit種甘願付出ê心態，同時伊mā是無負擔ê人生行為，因為這是信仰ê價值，tī基督徒ê行為頂kuân若有成做負擔ê表現ê時，就失去了信仰ê價值，有負擔ê事奉是表示伊ê心中無真誠ê疼。信仰生活中ê 一件真理是「因為愛心所付出ê事奉是完全、理想ê信仰事實」，伊會結出真tsē有意義、有價值ê信仰果子。Tī教會生活中有真tsē美好ê見證定定是tuì tsit種ê基督徒完全、真誠ê疼所付出ê結果，伊會幫助人，mā會成就家己，是人生幸福ê來源，義大利俗語講：「若你beh tshuē一工--ê幸福快樂就去洗身軀、掠龍或者鉸頭毛，ài tshuē 一禮拜ê幸福快樂就去kap 一位少女結婚，一個月ê幸福快樂就去買一隻新馬，一年ê幸福快樂去起一間符合心意ê新厝，ná是ài一生幸福快樂，tio̍h ài成做一個老實有愛ê人」，tī-tse咱thang知影老實--ê有愛心ê人生是kui世人lóng ē-tàng得--tio̍h人生ê幸福kap快樂，相信tī咱信仰生活中thang證實tsit-ê真理，to̍h是主耶穌所講--ê hō͘人比接受koh-khah有福ê人生內容。

（三） ē-tàng tī上帝國內底食飯ê人有福氣（路加福音十四章15節）
Tsit句話是每一個基督徒ài反省思考--ê，因為基督信仰生活ê終點是上帝國ê實在，你tī世間上所有ê生活總有一工ài結束，hit時你是m̄是有把握ē-tàng tī上帝國kap主坐做伙食飯kap lim？基督徒ê人生若無tsit種ǹg望，he真正是siōng可憐ê，上帝國ê信仰是基督徒信仰ê全部事實，當然咱每一個人lóng期待hit日ē-tàng kap主坐做伙鬥陣食kap lim，因為這是咱信仰生活ê內容。

主耶穌來世間ê主要目的就是teh傳揚上帝國ê真理hō͘人，mā就是將上帝國ê事實紹介hō͘世間人，到底上帝國是什麼？Siáng ē-tàng進入上帝國？上帝國是上帝主權運行ê所在，tī hia所有情況lóng符合上帝ê旨意，因此上帝國m̄是kan-ta指未來ê天國，tī現在，基督徒就會體會tio̍h上帝國ê生活內容，主耶穌bat講「上帝國就tī lín心內」。只要人ê生活ē-tàng表現出上帝ê主權kap符合上帝旨意ê生活內容，he就是生活tī上帝國，基督徒ài重視信仰ê現實環境，ài定定替家己營造有上帝同在ê生活內涵，hō͘上帝ê主權kap伊ê旨意時常tī咱ê生活中，這是beh進入上帝國ê根本真理。Siáng有資格進入上帝國？主耶穌tī馬太福音十六章19節向彼得講beh將天國ê鎖匙交hō͘伊，主要是因為彼得真清楚ê信仰告白，tsit種對耶穌基督絕對ê信仰告白就是ē-tàng進入上帝國siōng基本ê要素，另外有一件咱lóng熟悉ê記事，就是有人tshuā gín-á來見耶穌，門徒阻止in，但是耶穌講：「Hō͘ gín-á到我tsia來，mài禁止in，因為tī天國to̍h是tsit種人。」（馬太福音十九章14節），ná親像gín-á 單純，全然ê相信是人進入上帝國ê基本條件，因為gín-á ê心性siōng ē-tàng表達出信仰ê實在，所以耶穌講：「Ná是beh承受上帝國--ê，若無像gín-á，一定buē-sái入去。」（路加福音十八章17節）。

耶穌責備當時法利賽人kap文士，因為in偽善無老實ê生活kā天國ê門關起--來，hō͘人無法度進入上帝國，當耶穌結束山頂寶訓ê時，伊提出「只要聽見我tsiah-ê話就去做ê人tsiah ē-tàng進入上帝國」，tī馬太福音二十五章，主耶穌講beh繼續不斷來預備家己kap盡忠職守ê人生tsiah ē-tàng進入上帝國，tuì tsiah-ê聖經，咱thang了解，上帝國ê把握是確立tī人對耶穌基督ê信仰告白開始，了後tio̍h是照上帝ê大憲章去實行符合上帝旨意ê生活，tsit種信仰ê內容就是上帝國ê實在，tsit種生活，一定tī伊ê生活中表現出符合上帝所要求ê生活狀況，tsit種生活就是人生幸福ê根本原因。耶穌死了後，有一位亞利馬太城ê約瑟，清理耶穌ê身軀kā伊埋好，聖經講伊是一個護士，做人善良公義，時常ǹg望上帝國ê人。（路加福音二十三章50～51節）。

咱已經講過四講ê幸福ê人生，幸福ê人生就是：1）（a）倚靠上上帝ê人（b）敬畏祂，行祂ê路（c）歡喜tī上帝ê聖殿。2）（a）過失得tio̍h赦免（b）有上帝恩疼（c）聽上帝、肯受管教。3）（a）掠tiâu主（b）告白信仰（c）buē因主來跋倒。4）（a）問心無愧（b）歡喜付出（c）ē-tàng tī上帝國食飯。

「lín既然知影tsit項tāi-tsì，若是去行就有福了。」（約翰福音十三章17節）