《草地囝仔做牧師》

 | | | 轉寄

成功ê失敗者

作者 林宗要 2010.09.19

歷代志下二十六章4～5、15～21節

通常人tī性格上tiāⁿ-tiāⁿ有tsit款tāi-tsì，就是teh iáu未達成心中ê理想ê時，lóng會表現出相當ê謹慎kap頂真ê心態，態度謙虛有禮貌，期待ē-tàng得tio̍h心中ê理想，比如：Teh選舉ê時tsūn候選人lóng會表現出謙虛有禮ê態度，拜託所有ê人共伊支持；但是有一kuá人teh當選了後，伊ê態度就一百八十度ê大轉變。我就bat tú-tio̍h一個人有tsit種心態，當伊參選議員teh拜票ê時，非常ê謙虛，非常有禮貌，當選了後，態度suah大大無相仝。第二ê就是真tsē男女teh戀愛ê時tiāⁿ-tiāⁿ會表現出熱情、體貼入心而且koh不時替對方設想為著beh hō͘對方有美好ê印象，hō͘伊認定家己tio̍h是siōng理想ê對象，但是結婚了後往往就走繩啊，teh戀愛中hiah-ê美好ê狀況lóng會ta̍uh-ta̍uh-á消失去。

Tsit二個例teh說明人ê性格有tsit種變化，kap人格問題有真深ê關係，是人ê性格ê表現之一。Tsit種情形若tī信仰ê世界內，咱就會了解主責備以弗所教會ê一件tāi-tsì，就是離開了一開始ê疼心（啟示錄二章4節）。

Tī信仰ê過程中，所要求ê是不斷進部，這tsiah是正常ê，但是tī現實ê信仰生活中有起有落，基督徒應該ài明白靈命成長kap時間是互相影響ê關係，tī屬靈ê過程中，靈命jú久ê基督徒伊ê屬靈ê狀況應該是jú充實tsiah合理，m̄-koh現實ê環境中有一kuá老基督徒ê信仰狀態無一定會比初信ê基隆徒好，這就是失去仰嚴肅性所造成--ê。Tsit種失去了嚴肅信仰ê基督徒tiāⁿ-tiāⁿ會失去了信仰所要求ê siōng基本ài項：就是警醒ê心態，信仰若失去了警覺性tio̍h是信仰ê危機。Tī tsiah-ê危機中ê基督徒，tiāⁿ-tiāⁿ會發生真tsē信仰生活負面ê tāi-tsì。

信仰ê本質是建立tī 不斷ê警醒中，所以若失去了謹慎ê態度ê時，無細膩to̍h會失去了伊ê本質。聖經中有真tsē tsit種失去警覺ê事例，好親像挪亞ê食酒醉，聖經寫伊tī hit-ê時代是一個完全ê人，tsit-ê完全ê人為是án-ná會失態？另外大衛王tī舊約聖經中mā是上帝所喜樂ê人，因為伊順服上帝ê命令，但是伊tī太平之日ê時suah犯了侵犯別人ê bó͘ ê罪，（奪取烏利亞ê bó͘拔示巴，撒母耳記下十一～十二章），參孫、掃羅王tsiah-ê人teh開始ê時lóng真成功，為何會失敗？主因tī in失去了信仰生活中siōng重要ê kuân度警覺。咱thang tuì現實ê社會來體會tsit-ê tāi-tsì；前一暫仔歐洲一小國ê公主tī海墘仔上穿3點式ê泳衫，hō͘記者hip tio̍h koh共伊刊tī雜誌頂kuân，引起了保守ê人民非常大ê批評kap攻擊。比如用現代ê標準，穿泳衫tī海墘á應該是無問題，為什麼tsit位公主會hō͘人攻擊？主因tī伊ê身分kap地位，伊若是普通人就無問題，只因為伊是一位公主，所以伊ê行為kap表現tio̍h必須ài符合伊ê身分地位，遵守頂下尊卑ê禮儀規範。咱mā時常聽tio̍h一句話：「怎樣án-ne無體統？」基督徒必須ài認清咱應該ài有ê體統是啥物？這是基督徒生活中一件重要ê tāi-tsì，tī聖經以弗所書五章３節；羅馬書十六章２節lóng提起體統ê原則，好好á運用伊，就會幫助基督徒信仰生活上有美好ê表現，tsiah ē-tàng榮耀主。

基督徒ê體統就是行事奏人必須ài kap上帝ê福音相仝，tī聖經腓立比書一章27節；；以弗所書四章1節，lóng bat提起，施洗約翰向當時tī伊身軀邊ê人--講：「lín ài結出果子來，kap悔改ê心相稱。」（路加福音三章8節）。因為tsit種生活方式是上帝向只要屬祂ê人所要求ê生活方式。舊約或者新約中，上帝lóng期待伊ê子民有體統ê生活，但是可惜--ê是teh信仰ê過程中，上帝ê子民tiāⁿ-tiāⁿ表現出無體統ê情形，教會生活中mā時常thang看tio̍h信仰ê危機kap變節。

教會中形形色色ê基督徒，有一kuá確實tī各方面lóng值得o-ló，熱心、忠誠、盡職、有好ê見證，但是負面ê基督徒mā有，假仙假ta̍k，對教會恐驚有負面ê影響，時常有破壞ê行為suah無有建設ê作為，tsit種人講道理出口成章，生活suah無見證，談吐老練，但是tī伊ê行為上suah真惡質，tī教會中、社會上、家庭內底lóng buē-sái榮耀上帝，對教會ê事工完全是負面影響，tsit種基督徒khah會出狀況，因為伊無謹慎ê信仰生活，tī教會史上tsit款tāi-tsì ê例真tsē，舊約中mā有真tsē tsit種成功了後koh失敗ê人；比如羅得、巴蘭、參孫、掃羅王、所羅門王，咱今á日所讀ê tsit段聖經就是teh說明烏西雅王ê事實。

一、 成功ê烏西雅王
照聖經ê記載，伊十六歲就繼承王位，是年歲真輕tio̍h有作為ê明主。烏西雅行耶和華感覺是好ê tāi-tsì，效法伊老父王亞瑪謝所行ê一切。先知撒迦利亞在世ê時tsūn，烏西雅定意tshuē上帝，耶和華上帝就hō͘伊亨通（歷代志下二十六章4～5節）Tsit-nn̄g節聖經teh說明烏西雅成功ê主因。以色列人ê政治kap宗教ê關係，是真密切ê結合，政治建立tī hō͘神管理ê主體內。Tī以色列王中有好bái ê差別，通常描寫明主ê時lóng會講：「某某人tī toh位做王做幾年，伊行耶和華所有感覺是好ê tāi-tsì。」Iáu會提起伊ê老母是什麼人，強調母親對王ê影響，差不多每一個王lóng用tsit種看法，以耶和華所看做是善、是惡ê作為來決定 tsit-ê王ê好iah bái。

Tsit-ê事實teh說明以色列ê王kap其他國家ê王無仝，tī in做王ê期間in ê生活必須ài符合耶和華感覺是好ê tāi-tsì，來成做in ê好iah bái ê標準，這只有以色列ê國王tsiah有--ê特權。Tī以色列人中in理想ê王m̄是所羅門，是大衛王，雖然伊bat犯下真大ê罪，但是整體講來伊是一位有正面價值ê王，是tī in-ê民族中siōng受著敬仰ê王。以色列人認為in是亞伯拉罕ê後代同時mā是大衛ê後代。馬太寫基督耶穌ê家譜ê時，起頭寫講「亞伯拉罕ê後代大衛ê kiáⁿ孫，耶穌基督ê家譜……」（馬太福音一章1節）Tuì tsia看出以色列人心中理想ê王是大衛王，tī舊約中tiāⁿ-tiāⁿ有「坐大衛ê寶座」、「大衛ê城」、「大衛ê厝」kap「大衛ê後代」等等lóng teh強調tsit位以色列人心目中理想ê王ê事實。

好親像頭前所講--ê，大衛王雖然有缺點，但是整體來講伊是符合上帝心意ê王，因ūj伊teh執行上帝交hō͘伊ê王位ê時，tiāⁿ-tiāⁿ遵守siōng帝ê旨意去做，這就是伊所以替上帝所喜樂ê主因；伊表現出信仰ê偉大性格，用順服上帝ê旨意行事做人，這就是以色列王國成敗ê主因。聖經中有關列王ê成敗記載，tī成功者時常thang看tio̍h伊受祭司、先知以及家己ê母親指引ê描寫，tú親像歷代志下二十六章5節「當通達神啟示ê先知撒迦利亞tī ê日子，烏西雅王定意ài求耶和華，上帝就hō͘伊亨通。」歷代志下二十四章2節「祭司耶何耶大在世ê時tsūn，約阿施行耶和華所感覺是好ê tāi-tsì。」成功是人順從了上帝ê話，但是mā是ài有敬誠ê人tuì邊仔kā伊教導kap感化，siōng重要ê是信仰者必須ài親身體驗建立kap上帝ê密切關係，若無身邊ê人若無tī ê時，伊ê信心真簡單tio̍h會產生危機了。

二、 成功了後ê失敗
Tsit件tāi-tsì對人生來講是非常大ê遺憾kap損失，tī現實ê人生中beh成功並m̄是一件簡單ê tāi-tsì，但是事實上tī人生中像烏西雅王tsit種成功了後koh失敗ê人真正是tsē kah-ná 山咧。咱看人生ê現實就會了解；無論tī政治舞台，teh經營事業上，或者tī家庭ê尪仔bó͘ ê關係上lóng有tsit種狀況，tī現實中咱會看tio̍h一時真出名ê人成做犯人、失敗ê角色，非常好額ê大事業家破產，恩愛ê夫妻suah來結冤仇，tsiah-ê lóng是真貼切ê例。探討伊ê原因，lóng伊ê來有自。咱看烏西雅王，當伊順從上帝聽從伊ê命令ê時上帝to̍h hō͘伊興旺，名聲遠播，因為伊非常強盛（歷代志下二十六章８節、１５節），「伊既然強盛，心就會驕傲to̍h會造成腐敗，干犯耶和華伊ê上帝，入耶和華ê殿堂，ài tī香壇燒香」（歷代志下二十六章１６節），這就是烏西雅王失敗ê主因。強盛了後心內產生驕傲，驕傲是註定ài失敗。Tī聖經中有關驕傲ê說明：「驕傲若來、見笑mā會來」（箴言十一章２節）「失敗ê先人心若驕傲，尊榮以前一定有謙卑。」（箴言十八章１２節）

彼得講：「上帝阻擋驕傲ê人，恩賜hō͘謙卑ê人。」（彼得前書五章５節），本來烏西雅王ê名聲遠播koh得tio̍h非常ê幫助tsiah強盛；照理伊應該ài珍惜tsit種人生ê福份，可惜人性ê通病往往會「因富而驕」因此來敗亡，tī-tsiah說明人ê驚人ê罪性「驕」，伊造成了人ê失敗kap悲劇，因為tī伊ê心中充滿了自大ê心理，輕視是驕傲ê人ê生活方式，人若有輕視ê心存在，無論做任何tāi-tsì lóng 真pháiⁿ成功；人kap人之間必須ài互相尊重，tsiah會有美好ê結局，而且人tī上帝面前koh-khah ài謙卑來面對人生，上帝理想ê信仰者一定是充滿了謙卑ê心態ê人生，這就是彼得所講「上帝阻擋驕傲者，賜恩hō͘謙卑ê人」ê真理，驕傲者無kā上帝ê存在囥在眼內，自然buē遵行上帝ê旨意tsiah有違法ê行為，做事tiāⁿ-tiāⁿ 超過人ê界線，連m̄是伊所屬於ê範圍伊mā想beh去插手，「去祭壇燒香」Tī舊約中這是祭司tsiah ē-tàng去執行ê事工，但是伊suah想beh用王權去做m̄是伊分內應該做ê khang-khè，伊ê結局就是hō͘上帝棄絕，身軀致tio̍h ma-lá-lí-á來死，tsit-ê病tī當時只有上帝ê憐憫tsiah可能得tio̍h醫治，若無只有死路一條，tuì真亨通強盛名聲遠播到hông 趕出去ê過程to̍h是伊siōng大ê悲哀，大概無比tsit種人生狀況koh-khah不幸ê tāi-tsì啊。

三、 人生ê鑑戒
人生是teh建立屬於家己ê完美kap幸福，當然烏西雅王ē-tàng講是有錢有勢，是幸福ê人生，伊具備了人生所希求ê各種美好條件；伊ê幸福人生確立tī（一）聽從先知ê教導。（二）定意走找耶和華上帝。只要具備tsiah-ê條件就有夠來承受上帝無限ê祝福，可惜ê是伊失去了人生siōng重要ê性格，就是謙卑kap順服。因為信仰者kap上帝之間ê關係是tī互相ê關係頂kuân。好親像歷代志下十五章２節「lín若順從耶和華，耶和華一定kap lín同在，lín若走找伊，就一定會tshuē tio̍h伊，lín若離棄伊，伊必定離棄lín。」

Tsit種互相關係ê建立to̍h是基督徒信仰生活ê內容，mā to̍h是主耶穌講ê「因為離了我，lín就buē-sái做什麼。」（約翰福音十五章５節）烏西雅王ê事實確實ē-tàng當做咱信仰ê鑑戒。

Tī人ê一生中，一時ê興旺、成功真pháiⁿ斷定成敗，俗語講：「蓋棺論定」就是teh說明最後ê成功tsiah準算，因為tī人生中有真tsē人tī青壯年ê時的確相當成功，但是到路尾suah 起變化，用悲劇收suah；無論tī政治上、經濟上或者是家庭生活上lóng有tsit種實例，這是人生siōng大ê不幸，成功了後ê失敗，感受是非常ê痛苦。Tsit款事例tī聖經中ê教示kap 一般ê人生狀況中，四界thang看，這是值得咱當做鑑戒--ê，伊ê癥結是teh強盛了後離開上帝、m̄聽上帝ê話。所以咱ài tī生活中不斷來用上帝來做咱ê指引kap導師，tsiah ē-tàng有回應上帝要求ê人生生活。

結論：烏西雅王ê事例是一面鏡，用伊ê情形不斷來反省咱ê生活，ài做永遠ê成功者，必須ài堅持到底tsiah有勝利ê冠冕。