《草地囝仔做牧師》

 | | | 轉寄

完全ê信仰

作者 林宗要 2010.12.05

使徒行傳十八章24～28節

Tuì基督教史觀來看保羅ê時，咱ē-tàng了解伊對基督教ê影響非常大。伊三次ê傳道旅行kap伊ê書信，咱ē-tàng tuì使徒行傳kap伊ê書信中了解，伊是非常熱心ê猶太主義者，伊tī腓立比書三章強調伊án怎熱衷tī摩西ê律法kap伊完全純粹ê猶太化，是希伯來人所生ê希伯來人，照律法講是法利賽人。伊tī當時是具備良好ê優越條件，若照當時猶太社會ê狀況，ē-tàng擔任siōng kuân階層ê領導人物，照伊猶太化ê觀點，提撒勒人耶穌對掃羅來講，是真pháiⁿ理解ê，是謗瀆上帝--ê，為tio̍h beh維護上帝ê神聖律法，kap猶太教ê尊嚴，伊應該用伊所有ê影響力，採取激烈ê方法，來消滅tsiah-ê hō͘伊看做異端份子ê基督徒。

當時伊迫害教會，是因為對當時猶太教ê熱情，宗教意識所產生ê自然結果，掃羅迫害教會，若khiā-tī摩西ê律法，或者純猶太人ê宗教觀念ê時， 咱就ē-tàng理解伊ê作為，因為依照摩西ê法律，十字架是咒懺ê記號，基督徒kap教會，suah一直強調十字架，甚至有伊是榮耀kap勝利ê象徵，tsit點是無法度hō͘猶太社會所接受--ê，而且當時ê教會一直強調，tsit位hông釘死tī十字架ê耶穌，是真驚人ê謗瀆，而且侮辱摩西神聖律法，是bē-tàng赦免ê惡徒。因為咱知影當時猶太人所想像ê彌賽亞的確m̄是像基督所講ê提撒勒人耶穌，因為耶穌是hō͘人釘死tī屈辱ê十字架頂，in所期待ê彌賽亞是榮耀、理想、得勝，能力真大ê，ē-tàng克服真tsē惡劣環境來建立理想王國ê偉大君王。

所以掃羅用基督ê事實kap猶太人ê彌賽亞做對比ê時，就會感覺tsiah-ê傳提撒勒人耶穌ê基督徒實在是真該死，是非常可惡ê人，所以伊用伊所具備ê才幹，去策動迫害教會，伊告白講：「論熱心，我是迫害教會--ê」。但是伊ê計謀suah kap上帝ê旨意無符合，伊認為用伊ê phah拚來消滅tsiah-ê基督徒是真簡單ê tāi-tsì，照當時伊ê現實環境（伊ê學識、地位kap熱情），beh處理tsiah-ê tāi-tsì是真簡單ê，咱看使徒行傳九章1、2節「掃羅向主ê門徒，嘴吐威嚇兇殺ê話，去見大祭司，求文書hō͘大馬色ê各會室，恩准伊綑綁……」，tī-tsia咱看出當時掃羅ê心態，是極力想beh消滅教會。

Tuì人ê觀點來看ê時，掃羅認為一定成功，因為用伊當時所具備ê社會條件，有夠額ê能力去消滅tsiah-ê無學問、平凡ê基督徒，因此伊當時真樂暢，自認為in ê宗教做一件偉大ê貢獻，護教有功是伊當時ê心意，但是suah hō͘伊所迫害ê耶穌講：伊ê作為是「用腳踢刺」，伊自認為伊ê計畫是真成功、真得意，但是tī耶穌ê眼中，伊是「用腳踢刺」ê行為，是無應該kap痛苦ê行為。佳哉！主耶穌beh用伊，因此，伊tsit種無應該kap痛苦ê行為，suah成就日後為替基督教奉獻心力、三次ê傳道旅行、建立無數教會，對基督教發展史具有非常重要決定性ê關係。Tī基督教史上，保羅ê存在，差不多是無人ē-tàng取代ê。雖然天主教真重視彼得，甚至用彼得擔任首任教皇，但是保羅tī基督教史上ê地位 無輸首任教皇，尤其是伊ê書信，是基督教神學史上bē-tàng欠缺ê主要資源。今á日引用經節是保羅傳道旅行中，發生tī以弗所ê一件tāi-tsì，to̍h是一位博學而且有雄辯才能ê亞波羅，經過百基拉kap亞居拉尪仔bó͘ ê引tshuā，tsiah完全體會tio̍h基督ê福音。

一、 亞波羅
關於伊ê事跡，tī聖經中記載無tsē，但是thang略略仔知影伊ê生平，伊是亞歷山大城ê人，亞歷山大是埃及ê大都市，是當時教育、經濟ê重心，對當時ê社會，有淡薄á有影響力，kap希臘ê雅典，並稱tī當時ê世界，是主前三三二年亞歷山大大帝所建tsiah命名，是商業文化中心，tī羅馬帝國時代，伊是世界第二大都市，學術風氣發達是該城ê特色，因為tī-tsia融合了羅馬、埃及、希臘、猶太人文化，主前二～三世紀，舊約ê希臘語譯本tī tsit-ê所在出版，mā有真tsē神學家，對基督教神學真有影響力，比如：克利免、奧利根等。

亞波羅to̍h是出生tī亞歷山大ê猶太人，深受希臘哲學影響，因此造就伊在學問方面有良好ê條件，對舊約聖經真熟手，koh有好口才。Tī當時ê人，認為傳道siōng好ê方法，to̍h是具備對聖經豐富ê知識，kap有好ê口才，亞波羅具備tsit兩項條件，所以hông稱做有學問ê人，但是伊所接受ê福音，kan-nā限制tī施洗約翰ê福音，雖然伊bat熱情提起彌賽亞ê事實，但是只是舊約中ê彌賽亞而已，buē-tàng kap耶穌有直接關係，tī以弗所tú-tio̍h百基拉翁仔某，tsiah引tshuā tsit位有學問ê亞波羅體驗到基督ê事實，hō͘ tsit位本來iáu未體驗到耶穌to̍h是基督ê人，變為耶穌基督福音ê使者，了後伊到希臘（亞該亞），聖經寫「伊到那內底，加幫助那蒙恩信主ê人，tī眾人面前真有能力，駁倒猶太人，引聖經證明耶穌是基督」（使徒行傳十八章27～28節）可見tsit時ê亞波羅已經是一位徹底了解耶穌基督to̍h是舊約所預言ê彌賽亞，哥林多前書三章保羅hō͘哥林多教會ê phue中，to̍h知影亞波羅對哥林多教會ê影響力有guā大，tī哥林多竟然有屬於伊ê黨；教會內有黨派產生，是無好ê現象，相信tsit種情形m̄是亞波羅所願意ê，伊kap保羅tī福音事工上是一致ê。哥林多前書三章6節「我栽種，亞波羅灌ak，只有神叫伊大漢」。Tuì tsit句經節，咱mā了解，亞波羅是hō͘保羅所看重--ê。Tī十六章12節保羅勸亞波羅去哥林加看哥林多教會，聖經有關亞波羅ê記事無tsē，但是若tuì保羅向哥林多教會ê人提起亞波羅ê情形，咱thang知影至少保羅看伊是同工，而且肯定伊。（一章12節，三章4、5、22節，十六章12節）。

二、 信仰kap智識
Tuì頂面所講，咱ē-tàng看tio̍h一個具體ê問題，to̍h是信仰kap智識ê問題。知識tī信仰生活中，有重要地位，雖然智識m̄是得救ê要件，但是tī信仰生活中，是有正面ê價值，tī宗教信仰生活中，有真tsē走火入魔，極端迷信ê宗教信仰，tiāⁿ-tiāⁿ失去理性，因為理性至少會tī咱信仰生活中，hō͘ in適中ê行為模式，ē-sái講是價值判斷作用，因為咱知影，宗教信仰若hông認為迷信，伊ê信仰內容就無價值。

無價值ê信仰，是一點用途lóng無。Ná親像主耶穌所講：「鹽若失味，怎樣ē-tàng叫伊koh鹹neh，了後無用，不過丟tī外面hō͘人踏而已」！ 迷信kap熱心無仝，因為通常宗教信仰lóng要求信仰者有熱心ê表現，伊m̄是迷信，（但是有時過分熱心mā會hō͘人厭棄，比如以教會為家，將所有收入全部獻hō͘教會，放bó͘-kiáⁿ ê生活m̄顧，tsit種行為已經m̄是熱心thang好解釋）。迷信是tī信仰生活中失去理智（智識）ê評判，tī台灣，四界ē-tàng看tio̍h迷信ê情形，tī虎尾服事期間，bat有一次看tio̍h「神轎發攆」，一般人認為有神附身ē-tàng行入北港溪中buē淹死，但是結果扛神轎ê二人lóng淹死，基督徒有時mā會看袂過民間宗教ê行為，看做迷信，但是有時基督徒mā會迷信，比如翻聖經經節卜問狀況、曲解聖經原意，就認為這是上帝ê指示，這lóng是侮辱上帝ê行為，這m̄是信仰，校園書房有一本冊《咱阻擋了gín-á》，講柏克翁仔某信心偏差，hō͘伊十一歲ê gín-á偉思禮ê性命犧牲tī偏差ê信心之下。通常先天性小兒糖尿病者，只要照醫師ê指示有規律ê生活kap按時食藥仔，應該是bē有問題ê，但是柏克翁仔某ê信仰失去理智，走火入魔，kan-ta想beh追求聖靈醫治suah放棄醫師kap藥物，堅稱用信心祈禱，經過牧師、長老、執事苦勸lóng無效，不幸三工了後gín-á就過身去，柏克翁仔某hō͘法官以過失殺人kap虐待兒童罪名判刑，了後經律師極力辯護，改判緩刑koh罰社區義務勞動服務。相信咱ê信仰生活中，mā會tú-tio̍h過分迷信失去理性ê信仰，kan-nā求神蹟kap信心祈禱，當然，咱buē-tàng m̄認神蹟kap信心祈禱醫治，但是咱必須了解上帝hō͘咱ê信心是配合咱ê現實環境，這包括教育背景、文化、心理、智識、價值觀等。譬如：一位醫師信仰ê體驗，可能buē kap一位無學問ê平常人一樣，但是信仰ê內在事實suah是一致ê，基督徒ài善用現實環境去幫助咱koh-khah體驗tio̍h信仰ê價值。假使傳教者，只求屬靈生活，疏忽咱人生現實狀況，就會掠準生存ê社會脫節。因此基督徒ê信仰必須ài有相當豐富ê智識，比如對聖經、神學、教會有相當ê認知，自然會幫助基督徒koh-khah了解伊ê信仰內容。 Tī智識中，mā須要有一kuá世俗智識，假使基督徒無良好智識，ná ē-tàng tī tsit-ê時代中榮耀上帝、見證福音neh？Tsit種道理相信咱ē-tàng了解，因為咱相信美好ê理性，實在對信仰有正面價值，但是基督徒ài時常謹慎一項事實，to̍h是bē-tàng只有重視理性（智識）suah將真誠ê信仰貶抑，這mā是tī現實教會生活中ê事實，真tsē人有豐富智識，但是無一定有信仰！基督徒ài了解，人tī理智ê世界以外，mā有信仰ê世界，兩者ê互相配合kap運用，對咱ê信仰kap知識，lóng是有幫助ê。

三、 完全ê信仰
Tī使徒行傳十八章24～28節tsit段聖經中，咱看tio̍h亞波羅ê背景，進一步koh學習信仰kap知識ê問題。

亞波羅雖然具備當時完備ê理性，但是只了解施洗約翰洗禮ê信仰，無耶穌基督ê真正信仰，施洗約翰當teh向伊ê學生紹介耶穌是上帝ê羔羊ê時，伊對家己kap對基督ê理解真清楚，伊講家己「配buē起基督ê鞋帶」，mā強調「伊興旺，我衰微」，因為伊知家己m̄是基督，伊只是tī基督tsìn前ê一個聲音，替基督預備道路ê角色而已。

假使亞波羅只停頓理解約翰ê洗禮，雖然伊具備博學kap對舊約深厚基礎，但是iáu無法度傳達拯救ê福音，佳哉伊虛心謙恭接受百基拉翁仔某ê引tshuā tsiah深深領悟基督ê真道，伊無因為伊ê博學阻礙tio̍h福音ê吸收，這是亞波羅偉大ê原因，因為伊ē-tàng接觸完全ê信仰。

一個具備世上良好學問ê人，若beh體會信仰世界ê奧妙，伊必須將所有博士學位囥 tī禮拜堂門外，án-ne tsiah ē-tàng接受耶穌基督屬靈ê真光。當時ê亞波羅體會tio̍h，伊所有ê學識kap辯才，若無耶穌基督靈光引tshuā，是無價值ê，當伊體驗tio̍h耶穌基督完全絕對ê信仰ê時，伊良好ê學識kap辯才，tī仰生活上，就koh-khah ē-tàng發揮伊ê價值，因此，基督徒就必須ài完全了解上帝所賜hō͘你ê才能、學識，hō͘ in成做服事信仰ê僕婢，伊ê價值tsiah ē-tàng存在，ná是一個基督徒看伊ê現實條件重過伊ê信仰生活ê時，tsit種作風m̄是基督徒信仰生活ê表現，teh追求現實風氣極盛ê現代基督徒，咱必須檢討，人ê財富、學問、地位，順利ê情況展現tī咱面前ê時，你ê信仰位置tī toh位？

Tsiah-ê問題tī現今基督徒ê人生生活中，是一件需要咱省思ê問題，當一個基督徒體驗tio̍h完全ê信仰ê時，就會表現出像保羅ê人生觀，用基督為第一，無論生或者是死，lóng會榮耀上帝ê生活。

結論：信仰hō͘人成做新造ê人，亞波羅ê狀況，to̍h是基督徒信仰生活真實ê內容，用信仰為主體，其他ê，比如學識、才能只是事奉信仰ê僕婢（工具），這tsiah是伊正確ê觀念。