《草地囝仔做牧師》

 | | | 轉寄

聖化ê印記

作者 林宗要 2010.12.12

羅馬人書六章1～14節

基督徒ê信仰生活，若用心參加教會聚會、ē-tàng主動研讀聖經、關心教會事工、對教會表現出關心kap奉獻ê生活，通常lóng會hông認為是有teh實行信心生活ê基督徒。但是khah嚴肅來看信仰生活，應該m̄是只有建立tī基督徒ê嚴謹生活內容比如：無pok薰、buē lim酒、生活端正以及ē-tàng讀聖經或者參與教會各項事工。因為tī m̄是基督徒中，ē-tàng嚴謹自愛品德高上ê人mā真tsē，若只用品德當做基準，基督徒ê品德無一定會比一般人完美！

基督徒信仰生活ê重點，是在tī kap上帝ê關係，是確立tī直ê關係，khah m̄是橫ê關係，是tī一個信仰者，ài如何去回應上帝ê生活，這tsiah是生活ê重點，有了tsit種生活內容，tsiah是基督徒信仰生活ê本質。當然，這是建立teh經tuì耶穌基督做中介tsiah完成kap上帝直接關連ê心靈契合，tī人ê心靈上帝ê聖靈有接觸ê時，就ē-tàng建立kap上帝之間ê人格結合。Tsit種結合是基督徒信仰生活siōng根本--ê，siōng偉大ê生活，tī約翰福音一章18節「從來無人看見上帝，只有tī老父懷內底ê獨生kiáⁿ將伊表明出來」因為這m̄-bat看過ê上帝，通過耶穌基督ê事實，將祂顯現hō͘世人，這to̍h是主耶穌向學生所講：「看tio̍h我，to̍h是看見老父」（約翰福音十四章9節）。這to̍h是神學上所講：「耶穌基督ê啟示」ê真理。所以基督徒ê信仰生活，必須ài建立teh對基督決定ê信仰世界。所以通常tī教會內觀察基督徒信仰生活ê時，lóng會將重點khǹg tī kap耶穌基督ê層次上，tī路加福音七章36～50節記載耶穌受一位法利賽人西門邀請食飯，有一位過tio̍h罪惡生活ê婦人，接近耶穌，流目屎kā耶穌ê腳滴tâm，用伊ê頭毛kā伊擦，一直唚耶穌ê腳koh抹kài貴重ê香油tī耶穌ê腳頂。Tsiah-ê動作本身是表明tsit位tsa-bó͘對耶穌ê敬仰。西門看tio̍h tsit種情形，內心teh想tsit-ê tāi-tsì，耶穌主動向伊說明，舉一個例來強調疼主ê熱情ê事實：有二位負債者，一個欠五十兩銀，一個欠五兩銀，但是主人lóng完全取消in ê債。試想這二個toh一位愛主人khah深？

Tī愛tsē ê所在，赦免就tsē，愛少ê，赦免mā少，tsit種情形，teh信仰生活中，tiāⁿ-tiāⁿ會出現，因為有一kuá基督徒，in體會tio̍h就會領受無限大ê恩典了後，tī in信仰ê過程中，會表現出相當大疼主ê熱情，mā因為tī個人生活中，確實體驗tio̍h主ê帶領kap保守，tsit種經過內心感恩所形成ê信仰生活，tiāⁿ-tiāⁿ有hō͘人想bē-tio̍h ê效果tī基督徒信仰現實中表現出來，tsiah-ê信仰者，tī in信仰生活過程中，in bat充分體驗過主耶穌ê恩疼，tī in現實境況中，tsit種體驗ná親像保羅tī腓立比書三章強調為tio̍h耶穌基督伊看萬事做糞土，包括金錢、學問、權勢等，ná親像主耶穌tī馬太福音第十三章講一個人tshuē-tio̍h絕世之寶，tuì án-ne賣掉伊所有ê財產去取得tsit-ê珠寶。因為伊ê心，已經hō͘絕世之寶所佔領，其他任何物件，tī he寶貝tsìn前，lóng無重要啊。

路加福音十九章ê撒該ê體驗，為什麼一個kā錢財當做性命ê守財奴，當伊kap耶穌基督接觸了後，伊竟然願意將伊ê財富ê大部分，提出來當做救濟之用，tsit種價值觀ê改變，m̄是平常ê事物thang改變--ê，只有耶穌基督ê福音，mā to̍h是上帝ê權能tsiah ē-tàng改變人間所認為無可能ê tāi-tsì，伊ē-tàng完全除去人心中所有因為罪惡tsiah發生人生ê行為，當一個人有tsit種真實體驗了後，伊ê人生就會有完全ê變化，tú親像保羅tī哥林多書五章17節所講：「人若tī基督裡，就成做新造ê人，舊事已經過，lóng變成新ê啊。」Tsit種絕對ê改變，to̍h是teh信仰生活中，時常hō͘看做非常ê行為。比如：宋尚節博士留美tńg來到中國ê時，將全部ê學位文憑，lóng丟到海浬，雖然伊ê作為hō͘人看做異常，甚至hông關tī精神科病房內，但是事實上伊是真實體驗tio̍h耶穌基督救恩所帶來人生完全ê改變，咱看路加福音七章36～50節所記hit位hō͘社會看做「Bái ê婦人」，伊用伊人生中siōng尊敬ê方式表現tī耶穌基督身上，用目屎水kā祂ê腳浸tâm，用頭毛擦，而且用嘴唚耶穌ê腳，tsit種作為是比任何有價值ê物品，koh-khah充分表現出絕對ê誠懇kap疼慕。

Tsit種信仰ê體驗，to̍h是保羅tī羅馬人書第六章所強調ê真理。保羅tī-tsia強調一個受恩ê基督徒必須ài建立符合上帝ê旨意ê信仰生活，伊ê重點teh對耶穌基督救贖ê信仰體驗，tsit種對耶穌救贖恩典ê體驗，是形成基督徒kap主耶穌之間信仰ê人格關係，tī-tsia咱ē-tàng看見基督徒ê信仰，ē-tàng藉tio̍h上帝豐富恩典來表達tī伊個人生活，家庭狀況，社會生活以及教會生活中，tsit種經由信仰所發生有價值ê人生行為tī tsiah-ê基督徒身上，因為in確實體會tio̍h上帝ê恩典tī軟弱ê人身上。問題ê重點，m̄是人本身有什麼價值，是tī tsiah-ê無價值ê人身上有充分上帝ê恩典，tsit種信仰ê體驗是保羅tī哥林多後書第十二章ê信仰告白，「伊對我講，我ê恩典有夠你用啊，因為我ê能力是tī人ê軟弱上顯得完全，所以我koh-khah歡喜誇口家己ê軟弱，好叫基督ê能力覆庇我」（十二章9節），tsit種體驗to̍h是信仰ê體驗tsiah有可能ê事實。

一、 kap耶穌基督同死同活：羅馬人書六章3～4節
「Kám m̄知咱這受洗歸入基督耶穌ê人，是受洗歸入伊ê死mah，所以咱藉tio̍h洗禮歸入死，kap伊埋做伙，是叫咱一舉一動有新生ê樣式，像基督藉tio̍h老父ê榮耀，tuì死內底復活仝款」信仰siōng基本問題，保羅用「Kám m̄知」to̍h是「一定ài知影」來說明一個受贖基督徒kap耶穌基督ê關係。 基督徒信仰生活ê重點，是teh經由耶穌基督tsiah建立kap上帝靈ê關係，只有經由耶穌基督ê事實，基督徒tsiah ē-tàng體驗tio̍h上帝，因為祂完全表現出上帝tī人ê中間，因為耶穌基督是上帝ê啟示，所以kap上帝ê信仰關係，必是發tī出世基督對耶穌信仰決定而成，tú親像主耶穌向學生所講「看tio̍h我，to̍h是看見老父」（約翰福音十四章9節）因此咱就koh-khah清楚，teh信仰ê過程中，基督徒kap耶穌ê關係非常重要。同時對耶穌基督ê認bat kap體驗是關係tio̍h基督徒信仰生活ê重點，teh信仰生活中，基督徒ài了解道成肉身ê耶穌是出生tī馬槽內，但是基督徒ài koh-khah清楚耶穌基督tī十字架頂ê死kap復活，to̍h是形成基督徒信仰ê基本重點。做一個受贖ê上帝ê子民，若確信耶穌基督復活ê事實，to̍h是ē-tàng了解耶穌基督ê存在是道成肉身，講tio̍h祂十字架tsiah死，是用無罪ê上帝ê kiáⁿ兒來負擔世人ê罪ê救贖行為：然後經由祂ê復活，hō͘只要信祂ê人體會tio̍h tī人生生活中非常重要ê新生ê樣式。Tsit種信仰經驗是基督徒ê真實體驗，to̍h是經由贖罪所帶hō͘信祂ê人新性命，tsit種新性命是上帝創造人ê要求，是符合上帝旨意ê生活ê人生，因為tī tsiah-ê重生ê基督徒身上，已經kap耶穌基督做伙死做伙復活，保羅講「Kám m̄知咱這受洗歸入耶穌基督ê人，是受洗歸入伊ê死麼？所以咱這藉tio̍h洗禮歸入死kap伊埋做伙，原是叫咱一舉一動有新生ê樣式，像基督藉tio̍h老父ê榮耀，tuì死內復活仝款，咱若tī/伊死ê形狀上kap伊聯合，mā ài tī伊復活ê形狀上kap伊聯合，因為知影咱ê舊人kap伊做伙釘tī十字架，hō͘罪身滅絕，叫咱無koh作罪ê奴僕，因為已經死ê人是脫離了罪」（羅馬人書六章3～7節），因此一個體驗tio̍h耶穌基督救贖ê基督徒伊ê人生，是永遠活tī新ê樣式中，這to̍h是保羅tī哥林多後書五章17節所強調新生ê人生，因為基督徒是kap耶穌基督同死同活ê人。

二、聖化ê印證
保羅tī羅馬人書一章17節「因為神ê義當teh福音上顯明出來，這義是信ê根本，tsiah成做信。比如經上所記『義人必因信得生』」，tsit種hō͘上帝稱做義ê人，to̍h是體會tio̍h耶穌基督拯救ê福音，因為tuì上帝恩典ê事實ê拯救是發tī出世耶穌基督所賜ê福音內，「這福音本身是神ê大能，beh救一切相信ê人」（羅馬人書一章16節），所以經由信仰決定去體會神ê恩典ê人，伊ê生存，to̍h是聖經所講hō͘聖化ê人生，tsit種受聖化ê人生，tī伊現實ê生存中，必須ài有印證聖化ê內涵。Mā to̍h是用伊生活ê完美kap理想來證明神ê恩典tī伊人生kui-ê領域中，tsit種有新性命ê生活方式，to̍h是基督徒信仰生活中，一項重要ê內容——聖化ê印證。基督徒ê人生，必須ài不時有tsit種印證聖化信仰ê存在，tsit種靈命ê重生，m̄是基督徒本身ê決志，是因為持守上帝ê疼，這to̍h是咱信仰所強調ê聖化。所以聖化ê tsit-ê事實通常mā是經由上帝ê恩典變成ê。因為咱知影，聖化主要重點，是經由耶穌基督拯救ê福音，這福音ê來源是tī上帝，所以受聖化ê基督徒，一直hông要求ài生活tī新ê狀況中，「我是耶和華lín ê神，所以lín ài成做聖潔，因為我是聖潔--ê」（利未記十一章44節）彼得tī伊ê phue中mā提起「He召lín ê既是聖潔，lín tī一切所行ê tāi-tsì頂面也tio̍h聖潔」（彼得前書一章15節）。

這是受聖化人生ê根源，伊是由上帝開始，有罪ê人經過耶穌基督拯救ê福音，用信仰ê決定去接受、體會，用洗禮做開始，然後有信仰生活，持守到上帝ê審判，tsit段期間to̍h是基督徒聖化ê事實，這to̍h是一個罪人成做聖徒ê過程，因此咱必須清楚基督徒聖化ê印證是確立teh接受基督救恩開始，然後to̍h是tī帝所交代你ê年日中，你必須用警醒戒慎ê心情去經營符合上帝旨意ê生活，一直到朝見救主耶穌，mā to̍h是khiā-tī上帝ê審判台前。Tī tsit種信仰生活過程中，基督徒追求聖靈ê充滿，親像保羅tī羅馬書五章講tio̍h患難中ǹg望ê時所強調ê真理，基督徒現實ê生活確實會有真tsē患難，但是tsiah-ê hō͘人看做不幸ê患難，有時顛倒會造就基督徒信仰生活ê正面價值，因為teh患難中會hō͘人產生ǹg望，進一步koh行向光明磊落ê人生，「患難生忍耐，忍耐生老練，老練生ǹg望，ǹg望bē致使見笑」（羅馬人書五章4～5節），這to̍h是聖靈充滿ê事實，基督徒受聖靈充滿，m̄是kan-nā teh講方言或者行異能，khah重要ê to̍h是ná保羅tī加拉太書五章所講ê結聖靈ê果子（五章22～25節），因為這是耶穌基督福音ê目的，所以咱ē-tàng講福音ê效用tuì án-ne講到人類ê聖化，咱tsiah-ê受洗tī耶穌基督ê子民，是受聖化ê人生，咱有責任tī咱人生中印證出聖化ê真實性，這to̍h是咱ê教會生活一直teh強調追求聖靈充滿ê生活，只有hō͘聖靈充滿ê基督徒tsiah會結出聖靈ê果子，所以基督徒ài了解結聖靈ê果子，to̍h是基督徒人生生活ê內容，保羅the hō͘提多ê冊中，mā有提起「耶穌替咱捨了家己，beh贖咱脫離一切罪惡，koh潔淨咱特作家己ê子民，熱心向善。」（提多書二章14～15節），因為只有基督徒完美純潔ê人生生活，tsiah是聖靈ê果子，伊to̍h是基督徒聖化ê印證，保羅tī-tsia用「你tio̍h講明、勸戒人」來強調伊ê重要性。

三、 獻上身軀做榮耀上帝ê器具
聖化ê印證是tī上帝ê恩典ê耶穌基督ê福音ê感動，tsiah hō͘一個罪人經過洗禮來建立kap耶穌基督仝生死ê性命，tsit種tuì聖化所帶hō͘人類ê性命，to̍h是保羅所講重生ê人生，因為伊已經脫離罪惡，hông要求ài像上帝ê聖潔ê真實性，來圖謀符合神旨ê信仰生活，重點是teh追求聖靈充滿，tsiah ē-tàng結聖靈ê果子，tī-tsia上帝ê名，就會得tio̍h榮耀，因此保羅tī最後強調hō͘聖化ê人生，必須ài有決心獻家己ê身軀做義ê器具，這是上帝創造人ê目的，mā是人生存在ê基本內容。

因為只有聖化ê外表，若無聖化ê實質，是無功效--ê，tsit款事實咱lóng ē-tàng了解，tī教會生活中，tiāⁿ-tiāⁿ有tsit種異常ê狀況，tī長老教會中有小兒洗禮，是小兒出世了後，tuì父母tshuā到教會受洗，到青年期，正常ê小兒洗禮者lóng會koh再家己參與成人信仰告白，成做正式會員，但是tī教會會員名簿中，tiāⁿ-tiāⁿ有一kuá三、四十歲ê小兒會員，tsit種情形是無正常ê，只有聖化ê外表，無聖化ê實質內容，tsit種只有枝葉suah無結果實ê現象，m̄是主耶穌所喜樂ê。

耶穌tī福音書中，一直責難tsit種只有外表形式ê存在者。比如對當時宗教領袖ê指責（馬太福音二十三章），kan-nā洗杯仔ê外面，內底suah lap-sap，hō͘主耶穌指責為粉飾墓外表，內面藏tio̍h枯骨。馬太福音二十一章，耶穌咒懺hit欉只有滿滿ê枝葉suah無果實ê無花果樹，咱就會了解，tī耶穌心中祂所喜愛ê人生是teh將本身獻hō͘上帝做義ê器具，mā to̍h是榮耀上帝ê人生，因為這是上帝創造人ê目的，mā是人存在ê價值，但是人因為犯罪tsiah虧欠了上帝ê榮耀（羅馬人書三章23節），因此活tī罪惡中ê人生是無可能有榮耀上帝ê事實，今á日基督徒已經hō͘耶穌救贖，是屬於基督ê人生，所以咱ê生存， buē-sái虧欠上帝ê榮耀，咱ài生活teh像保羅所講：「所以lin2m7管是食或者是lim，無論做啥物，lóng tio̍h為tio̍h榮耀神來行。」（哥林多前書十章31節），這是基督徒生存ê內容，必須ài用生活ê見證，來印證耶穌基督福音tī咱身上，這to̍h是基督徒聖化ê實質內容，基督徒m̄-nā經過洗禮tsiah聖化，koh-khah ài tī人生生活上成做義ê器具，當然siōng切實ê問題，to̍h是咱ài成做聖潔。

「所以mài容罪tī lín必死ê身上作王，hō͘ lín順從身子ê私慾，mā mài將lín ê肢體獻hō͘罪做不義ê器具」（羅馬人書六章12～13b節）只有無罪成聖ê基督徒ê人生tsiah ē-tàng成做上帝ê靈居ê聖殿。

只要上帝ê靈臨在咱中間，基督徒自然會生活teh榮耀上帝ê世界，這to̍h是保羅所要求「將肢體作為義ê器具獻hō͘神」（六章13節b）。基督徒必須ài認清信仰生活ê重點，是tī有神ê恩典ê聖化ê事實，經過基督徒ê人生kā伊印證出來。馬太福音五章16節「Lín ê光mā當án-ne照tī人前，叫in看見lín ê好行為，便將榮耀歸hō͘ lín tī天頂ê老父。」

總講一句：以前咱是罪ê奴僕，tsit-má是上帝ê子民。「現今lín既然tuì罪得tio̍h釋放，作了神ê奴僕，就有成聖ê果子，he結局to̍h是永生。因為罪ê工價是死，惟有神ê恩賜，tī咱主基督耶穌內面，是永生。」（羅馬人書六章22～23節）。