《草地囝仔做牧師》

 | | | 轉寄

工顯資值

作者 林宗要 2010.12.19

哥林多前書三章10～15節

「我照神所hō͘我ê恩，kah-ná一個聰明ê工頭， kā根基立好，有別人tī頂面建造；只是各人ài謹慎án怎tī頂面建造。音樂那已經立好ê根基to̍h是耶穌基督，此外無人ē-tàng立別ê根基。若有人用金、銀、寶石、草木、稻仔tī-tsia根基上建造，各人ê工程必然顯露，音樂hit日子beh將伊表明出來，有火發現，這火藥試驗各人ê工程án怎。人tī he根基上所建造ê工程若儉會tiâu，伊就ài得賞賜。人ê工程若hông燒去，伊就ài受虧損，家己suah ài得救；雖然得救，suah像tuì火內底經過仝款。」（哥林多前書三章10～15節）

頂面所講tsit段經文是保羅用建築比喻說明人生生存ê原理。所謂「人生是tuì機會所積聚而成」，的確án-ne，咱ē-tàng了解人生ê每一個機會或者每一舉動lóng teh建立家己人生ê價值。保羅用無仝性質ê建材來闡述人應該如何去營建家己ê人生，建立個人性命ê價值，這比喻真傳神，將人ê一生比喻做建造房屋，自挖地基到整棟厝落成，就ná準人自出生到終局。

就厝來講，有各式各樣ê厝；人生何嘗m̄是án-ne？有人透世人轟轟烈烈。所做ê khang-khè，流芳萬世，造福人類社會，伊ê功勞無tè比，比如主耶穌傳福音ê khang-khè對人類ê貢獻，或者uì古早到tsit-má hiah-ê偉大ê藝術家、音樂家、哲學家、科學家所留落來ê，實在是價值連城！Tsiah-ê人若用保羅ê比喻來講，就ná準是用寶石、金、銀所建造ê人生；Hiah-ê tī社會上惡名昭彰，遺臭萬年ê敗類，比如歷代惡毒ê統治者，殘暴專制ê君主。比如二次大戰ê希特勒to̍h是。波斯灣戰爭時ê哈珊，美國布希總統將伊比喻做今á日ê希特勒，這號人物只hō͘真少數ê惡人所崇拜，比如台灣有一個tsiok惡ê人因為崇拜哈珊將伊ê子號名做林哈珊，可見伊ê心態ê一斑。

上帝創造人類ê目的是ài祂ê kiáⁿ兒ē-tàng榮神益人，為tio̍h達tio̍h tsia-ê目標，基督徒必須真gâu發揮上帝所賜ê才能來建立伊ê人生，hō͘伊ê人生thang突破重重考驗，hō͘伊ê性命hō͘人正面評價，若beh達到tsia-ê目的，就ài用khah堅固有價值ê材料建造人生。Mā to̍h是，基督徒ê言行舉止lóng是點點滴滴teh建造人生。擋會牢考驗伊價值存在；若m̄是，to̍h是hông燒掉。Tsit-ê所在所指ê伊有偉大價值ê性命，並m̄是指顯赫富貴ê人生，因為世上真tsē掌握權勢財富ê人，做出腐敗惡毒ê勾當者，tsit種人滿滿是。因此成功ê人生關鍵無tī成就ê大小，是tī正確ê動機kap心態，ē-tàng建立純全ê價值體系者，即使伊所完成ê是世人眼中tsiok細ê tāi-tsì，但是因為伊ê動機純正，mā有真有價值ê偉大事業；顛倒是有一kuá人雖然親像成就了大事業，但是因為動機操守無正，致使毒害社會人類ê災禍。譬如，修女德瑞莎tī印度ê khang-khè，依世俗ê觀點，伊所做ê，lóng是真細ê tāi-tsì，kah-ná微不足道；m̄-koh伊心中充滿了對上帝kap人類ê疼，因此khang-khè雖然細suah無比ê偉大，mā得tio̍h世人ê肯定kap敬仰。Tuì大眾媒體所報導ê德瑞莎，咱buē-pháiⁿ領悟tio̍h伊ê性命m̄是飛黃騰達，mā m̄是大富大貴，但是伊出自完全ê疼去分擔受苦人類ê重擔，伊偉大tī伊所關懷ê對象lóng是社會上tiām-tiām無聲e5san3-tshiah人，但是伊尊重每一個性命，tī伊ê心目中，tsiah-ê無名小卒ê性命kap達官顯貴ê性命有仝款ê價值，這是何等偉大高超ê情懷！Tsit種偉大ê胸坎愛心所成就ê尊貴事業，散發tio̍h無比ê光芒！比如偉大ê宣教師史懷哲獻身tī蠻荒ê非洲，to̍h是源自伊對性命ê尊重，tī伊ê代表作——《文化kap倫理》tsit本冊ê最後二章，特別強調「對性命敬畏ê倫理」，to̍h是推動伊放棄榮華富貴ê享受選擇投入非洲蠻荒ê叢林傳福音救世人khang-khè ê動力。伊ê精神實在值得全人類景仰，因為懷抱tio̍h對性命ê敬畏，成為偉大善行ê動力，史懷哲所謂ê善者，是維持性命、振奮性命ê人；惡者，to̍h是消滅性命，阻礙性命ê人。史懷哲畢生to̍h是奉獻teh尊重性命ê善行中。

耶穌ê教示mā是仝款ê道理。主耶穌ê khang-khè to̍h是teh重視上帝所賜ê性命。祂教導世人，ài看清楚性命ê真正價值，因為只有了解性命價值ê人tsiah ē-tàng實踐性命ê內容。

當一個人ē-tàng了解性命ê價值，koh ē-tàng實踐有價值ê性命內容ê時，tsit種性命是ē-tàng榮耀上帝ê性命，tú親像保羅tī哥林多前書三章所講ê比喻，tsit種人生to̍h是金、銀、寶石所建立ê人生，是擋會tiâu考驗ê美麗kap燦爛ê人生，mā是輝煌高貴有價值ê人生。性命ê價值無tī長度，是在tī深度，siōng重要ê是ài建立對性命ê尊重kap熱愛，kap正確ê價值觀kap光明磊落ê心態，本tio̍h純正ê動機tsiah ē-tàng發揮上帝所託付hō͘人ê人生使命。

一、 Siáng teh經營？
保羅用建築做比喻來說明人生情況。講出了每一個人lóng參與這大規模ê建築khang-khè，講出了人生tī宇宙ê大舞台中，每一個人應該盡力去演好伊擔任ê角色，比如哥林多前書三章十節「只是各人ài謹慎án怎tī頂面建造」，現代譯本譯做「每一個人lóng tio̍h謹慎，看應該án怎tī根基上建造」，現代譯增加「應該」這是一句對咱人生真有警戒ê話，mā是基督徒人生觀ê決定性事實，基督徒ài確實了解伊人生ê價值kap內容，然後tsiah ē-tàng照這建造伊有內容ê人生。因此咱必須建立一重要ê信仰原則，to̍h是對基督徒ê性格koh再認bat，到底你為啥物加入上帝國？你神觀ê建立為何？有孔子m̄是就有夠啊，為何iáu需要耶和華？四書五經kap聖經有啥分別？有了道德修養m̄是就有夠mah？為何iáu需要十字架ê救贖？為何beh過教會生活？Tsiah-ê lóng是基督徒信仰生活不斷ê挑戰。

當一個基督徒用嚴肅ê心情去思考tsiah-ê問題ê時，必定會建立一種以上帝為主體ê順服ê信仰生活。因為深知浩瀚ê宇宙是上帝所主宰掌權，祂託付人類去經營照顧，tuì創世記二章ê創造論，真清楚看出上帝將人安置tī伊所創造ê世界，目的是「耕作kap顧守」，tuì tsia咱thang了解上帝創造世界ê目的，這mā是基督徒ê人生觀，咱是上帝所託付tī祂所創造ê宇宙中，代上帝耕作顧守ê人，所以無論如何人是受託者，代為管理者，tse to̍h是台語所謂ê「管家」，管家ē-tàng照伊ê意思來執行一切，無須要萬項tāi-tsì請教主人，但是必須向主人交待，mā to̍h是照主人ê旨意去執行受託ê tāi-tsì。Tī管家ê心目中，永遠用主人ê旨意做執行ê根據！基督徒ê人生觀必須確認咱是上帝ê khang-khè者，祂是永遠ê掌權者，基督徒必須了解咱ê掌權者是上帝！

二、 了解目的kap方針
當咱了解上帝是咱ê經營者，祂永遠是咱人類ê主宰，續落來咱必須了解祂ê心意，祂ài咱做啥物？上帝創造咱ê目的何在？咱若了解這一切，咱ê人生iáu無法有理想ê表現，因為理想ê人是建立tī對人生ê目的kap方向有完全了解，一個人對人生ê目的kap方向無明確ê把握ê時，一定bē有良好ê人生表現。可見基督徒ài建立完整ê人生內容，必須ài了解人生ê目的kap方向。Mā to̍h是上帝對咱人類ê期待kap創造咱ê目的為何？相信咱若ē-tàng了解上帝對人類ê期望，並ē-tàng付諸實現，咱ê人生必定是有價值ê，那上帝創造人類目的何在neh？

（A） 人士為榮耀上帝才存在
以賽亞書四十三章7節「To̍h是只要稱做我名下ê人，是我替家己ê榮耀創造ê」Tī-tsia所講人是為上帝ê榮耀tsiah hông造--ê，所以保羅向哥林教會ê基督徒講「所以lín或者是食，或者是lim，無論做啥物，lóng tio̍h為榮耀上帝tsiah ē-tàng」（哥林多前書十章31節），tuì此咱ē-tàng體認hông造ê人類必須過tio̍h榮耀上帝ê生活！因為tsit-ê事實是主創造人類ê原旨，基督徒ài tiāⁿ-tiāⁿ用tse來省思人生ê一切狀況！

（B） 上帝喜愛人kap祂同行
為tio̍h beh完成人tī上帝面前真正ê價值，bē致使kah有偏失ê人生，人一定ài tī生活中kap上帝保持通順ê關係，mā to̍h是kap上帝同行，這是過去完成上帝ê旨意ê人ê信仰生活ê方式、挪亞、亞伯拉罕、以諾、約瑟、摩西、大衛王或者其他眾先知lóng是kap上帝同行tsiah完成使命ê，彌迦書六章8節「世人nah！耶和華已經指示你啥物是善；伊向你所ài ê是啥物neh？只要你行公義好憐憫存謙卑ê心，kap你ê神同行。」此經節表現了基督徒kap上帝之間siōng好ê關係。

（C） 盡力去完成上帝所託付ê使命
聖經ê主題，一面hō͘人認bat上帝，koh hō͘人了解上帝向人類所要求ê，了解神ê旨意了後，必須ē-tàng盡力去完成所託付ê責任，比如聖經所強調ê，ài盡心、盡性、盡力、盡意去疼主你ê上帝，koh ài疼厝邊ná親像家己，這是舊約kap新約ê siōng大誡命，基督徒m̄是只有建立teh認bat上帝而已，是teh認bat了後表現出有信仰ê生活行為。

三、 盡忠ê工人
既然咱已經了解上帝ê期待kap希求，所以咱必須按照各人無仝ê環境完成伊（亦to̍h是各人ài謹慎來建造伊！），一個人ē-tàng終其尾受託ê khang-khè是完成使命之第一步，而且看施工中ê情形，工頭手裡the̍h-tio̍h設計師設計ê藍圖，指揮工人按圖施工，一座建物ê完成，必須終其尾原始ê設計圖，tī台灣ê公共工程常有偷工減料ê情形，這to̍h是不忠ê表現，明知建築師所設計ê藍圖，lóng有結構ê必要考量，suah iáu偷食步、偷工減料，lóng可能造成真大ê危機kap驚人ê後果，因為人性貪婪ê弱點，buē-sái滿足tī正常施工ê百分之十左右ê利潤，企圖用偷工減料ê手路來達tio̍h兩倍以上ê利潤，tī台灣ê營造業持tsit種心態ê人，滿滿是，tsit種人是無可能盡忠--ê，若beh盡忠必須具備健忘ê心態，投機取巧ê人mā可能只ē-tàng tī主人面前一時有好ê表現；若主人無tī ê時就lán-si、無盡職，tsit種情形tī今á日社會真普遍，對社會造成極負面ê影響，基督徒應該是忠心ê僕人，必是照主人（經營者）ê方針按圖施工，千萬m̄-thang自作主張或者偷工減料，清彩隨便，這lóng m̄是基督徒應該有ê作為，m̄-nā án-ne，koh-khah應該認真、負責、精益求精，不斷研究改進，磨練家己ê技術，án-ne tsiah ē-tàng建造高品質ê工程。

基督徒一定ài建立正確ê觀念。進取心，開發潛能，善用上帝所賜ê時間kap空間，成做一個積極進取ê生活者，用充實人生ê內容，建立性命ê價值。

仝款是數十寒冬ê性命，掠準被動消極，清清彩彩，鬱悶無活力，一點阿趣味lóng無，不如充滿感恩kap喜樂，有豐富ê意義kap價值，tsiah符合上帝ê旨意，tsit種作為tsiah是基督徒信仰ê果實，因為一個真實ê信仰追求者，tī伊ê生活中必須有聖靈所充滿ê美好果實，tsit種聖靈充滿thang引tshuā基督徒成做善盡職責ê忠心工人，進一步koh完成上帝所託付ê使命，同時tsit種人生絕對m̄是清彩，伊是精益求精ê人生。

總有一工，ta̍k位基督徒lóng tio̍h khiā-tī上帝ê施恩寶座前，展示伊ê一生ê工程，面對那嚴肅ê一刻，人beh聽上帝審判ê聲音，是擋會tiâu千錘百鍊ê金銀寶石ê工程，抑是不堪一擊ê工程？Lóng tio̍h顯露tī審判主tsìn前，he就是工顯資值ê時刻！