《草地囝仔做牧師》

 | | | 轉寄

社會ê良心

作者 林宗要 2010.07.25

「社會」tsit二字是無人m̄知、時常聽見ê一個名詞，到底伊ê定義如何？siōng簡單ê解釋就是：tī仝一个時期、仝一个地域，人kap人之間關係ê總合。

咱lóng明白，人生kap社會ê關係非常密切。當然，社會是非常複雜ê，既然是人kap人ê關係，因此只要發生tī hiah-ê人生活上ê狀況，lóng可能tī社會上看tio̍h，有人用五花八門或者是包羅萬象來形容形形色色ê社會情形。

咱知影人kap人之間ê關係相當複雜，所以由人所形成ê社會，複雜mā是自然ê。

咱看社會ê現象就ē-tàng明白，伊kap人生有密切ê關係，因為伊是人生ê所在，社會動態對人生有直接或者間接ê影響，譬如政爭會引起經濟不振。另外如垃圾場ê設置，附近ê人一定起來抗議，核四電廠四周ê人mā極力反對，台塑六輕本來預定tī宜蘭縣設立，因為地方反對tsiah變更tī雲林麥寮（mā有反對者，但是地方政府贊成tsiah tī-tsia定案）。殘障團體數年前tī台北市楓橋新村設立兒童發展中心ê時，社區居民lóng起來反對，理由是破壞環境ê安寧、對兒童有不良影響、安全ê問題、降低社區khiā起ê品質、房價落價……等，in講，甘願捐款一筆錢hō͘ hit-ê中心，請in遷到山ê khah內底ê所在……tsit件tāi-tsì tī當時引起相當大ê震撼，有人甚至寫文章批評hiah-ê人無愛心、無同情心，因為hit陣弱智ê兒童已經有夠可憐，為何社會koh用tsit種態度來對待in？tsit項事實to̍h是 teh反應社會問題，因為hit-ê新村附近hiah-ê人認為tī家己ê社區中，若設立tsit種機構，一定會影響in ê社會環境。七十年代ê美國，有一kuá khah富裕ê烏人有時會用khah kuân ê價數走入去白人區置產買厝，（如五十萬ê價值會以五十五或者六十萬成交），但是了後hit所在ê房價一定落價，tsit種意識型態，往往帶來真tsē社會問題。

基督徒kap社會：聖經中明白kā咱講，基督徒kap社會ê關係是密切ê，因為教會通常tī人tsē ê所在，而且，過去教會往往以神聖自居，致使教會kap社會出現鴻溝，教會用「聖」來自稱，如聖殿、聖徒、基督聖教、聖日、聖典等，用「俗」來稱呼未信耶穌ê人。這是教會以聖ê籬笆來圍tiâu教會，致使生活tī教會ê聖徒kap一般世俗人隔離，譬如猶太人tī社會中形成小團體，過分強調家己ê神聖，看別人為俗物，這m̄是教會應該有ê態度。今á日教會必須進入社會，感化社會，進一步來淨化社會，做社會ê光kap鹽，這tsiah是教會ê本質。Tī歷史上，教會難免受tio̍h時代潮流ê影響，一位教會歷史學家將教會歷史分做四個時期，每期以簡單一句話說明伊ê特性：
（a） 初代教會：教會征服世界ê時。
（b） 中世紀教會：教會成做帝國ê時。
（c） 宗教改革時：教會振動世界ê時。
（d） 現代ê教會：是世界振動教會ê時。

相信咱ē-sái uì tsiah-ê事實體會tio̍h二千年來教會ê演變。咱若以台灣基督徒發展ê情形來看，加減ē-tàng明白tsit-ê動向。台灣初期教會（以長老教會來講），當時教會ê病院、學校、音樂lóng tī台灣社會ê領導地位，如馬偕、彰基、新樓病院，當時ê醫療水準lóng是一等ê：淡江、長榮中學，tī當時koh有贏過公立學校：教會音樂mā是當時音樂界siōng kuân水準，m̄-koh今á日neh？醫療界iáu有馬偕、彰基，二間中學已經無上榜，音樂neh？只tī教會內！現在ê教會脈動已經tī第四期：世界teh振動教會！ 咱若想tio̍h tsiah-ê問題，大概thang明白，過去ê世界teh睏，現在已經醒起來ah，（自文藝復興，工業革命了後），過去咱教會tī清醒中，面對睏ê世界iáu有辦法，但對睏醒ê世界suah the̍h bē出新ê方法，一百guā年來ê長老教會，或者是咱現在ê教會，是m̄是iáu延用舊法？雖然有心想beh變，但iáu tshuē bē不出一條新路！

Tī急變ê社會中，教會kap無應變ê作為，這就是今á日ê教會問題，歐美ê傳統教會，出席率無夠10％ ê近半數。台灣教會情形有khah好，通常lóng有六、七成ê出席率，為何教會失去吸引人ê力量？是社會變遷？人生活ê安定？或者是教會無物件hō͘人？抑是教會siuⁿ過保守？咱必須明白，教會ê存在是為tio̍h社會，所以必須進入社會做光做鹽，主耶穌講：燈ài khǹg tī燈台頂，m̄是khǹg tī斗底。

因為教會離開了社會ê教會，便失落伊存在ê價值，tsit-ê事實，任何一位基督徒必須謹慎記tiâu在心，tsiah ē-tàng tī社會上有良好ê見證。

一、 亞伯拉罕ê受召
亞伯拉罕tī信仰史上是受人所尊崇ê信仰典範，伊一生ê行動lóng teh說明信仰ê事實。尤其他ê受召koh-khah是說明教會ê存在kap社會ê價值，因此咱ē-tàng tuì亞伯拉罕來看今á日咱ê信仰生活。亞伯拉罕信仰ê開始是伊ê受召，本來伊tuà-tī巴比倫ê吾珥城，上帝卻ài伊放棄原本生活ê所在到上帝所應允ê迦南地。亞伯拉罕ê受召就是teh說明人信仰上帝ê第一步，就是勇敢踏出伊熟悉ê生活環境！因為hit-ê所在，m̄是上帝應允之地，卻是反背上帝旨意ê所在。一個確信上帝ê信仰者ê第一步，就是ài行到上帝應允ê所在，來運行伊ê人生！

咱若看創世紀一到十一章，至少會明白當時ê世界kap人類有四大項問題：1.始祖被趕出樂園。2.該隱thâi死親小弟亞伯。3.挪亞ê大水。4.巴別塔。四pái lóng看tio̍h人類反背上帝，一pái比一pái嚴重。Tuì十二章起記載了亞伯拉罕ê受召，tī上帝遠大ê計畫中，亞伯拉罕ê受召被安排tī tsiah-ê人反背上帝了後，上帝選召亞伯拉罕ê目的，是teh完成伊對人類拯救ê事工，這是聖經作者特別ê安排，當咱用tsit-ê情景來思考今á日教會ê時，咱koh-khahe7-tàng了解基督受召，本質上kap亞伯拉罕受召有仝款ê目標kap使命。 基督徒ê被呼召，ná親像當時亞伯拉罕受召仝款，有上帝完全美好ê旨意，就是ài每一位被選ê基督徒ē-tàng tī伊有限ê生命中完成上帝ê旨意kap計畫。但咱必須記tiâu，咱受呼召，完全是因為上帝ê恩典，並m̄是tī品格上比別人khah完美，這是基督徒一定ài確立ê信仰內容。Tio̍h親像亞伯拉罕當時被上帝選召亦是án-ne！

被召ê時，ài tī受召ê過程中體會上帝豐盛ê恩典並完成受託ê使命（就是成做上帝拯救罪人ê工具），án-ne tsiah ē-tàng彰顯教會存在ê內容kap價值，mā就是tī生存環境中發揮教會ê特質。當然被召ê路途無一定順利，咱看亞伯拉罕ê生涯tio̍h ē-tàng明白，伊ê人生是坎坷中，體驗上帝ê引tshuā kap恩典！這是基督徒信仰生活上ê典範。基督徒ê人生無一定一帆風順，有時ài tī極端ê景況中去體會上帝ê豐盛，tī困苦中學習成長定定是基督徒信仰生活ê一部分，當然上帝若祝福，信徒tī順境中去營造信仰是siōng好ê狀況！

二、 現實ê教會
咱已經明白亞伯拉罕ê事實猶原是現今教會ê狀況，教會ná親像當時ê亞伯拉罕仝款，tī恩典中被召，beh去完成上帝或者是人類歷史中絕對ê計畫！但m̄是完成式，猶原是現在進行式，ná親像亞伯拉罕受召了後致使完成了上帝ê託付tsit段時間，就是亞伯拉罕ê.「信仰之時」，今á日教會ê「信仰之時」是接tio̍h主基督ê呼召了後到確確實實khiā-tī主前，把握應允ê tsit段時間（ná親像以色列人出埃及到進入迦南地ê曠野期間！）tsit段信仰ê時間，是咱現實ê教會ê生存狀況，tī-tsia有真tsē ê問題kap困難、不安、危險會tú-tio̍h，上帝呼召亞伯拉罕了後並無賜伊一個永遠安寧平安ê所在，伊猶原ài面對真tsē現實ê困苦狀況kap漂流ê生活，tī伊ài得tio̍h上帝絕對應允ê迦南地，伊必須面對真tsē現實ê狀況，如家庭、親人、生活、外患、飢荒等問題！這是亞伯拉罕ê現實生活，tsit-ê現實mā是教會ê景況，教會被召了後，無一定會tī永遠安樂ê現況中，上帝hō͘教會tī真tsē現實ê逆境中完成對人類拯救ê事工，這是教會歷史所kā咱講ê信息。

咱看現實ê教會，有時定定tī苦難中敬拜上帝，初代教會受逼迫，台灣初代基督徒ê患難，中國大陸ê地下教會等，lóng說明了現實教會ê真tsē景況。台灣ê現況是值得慶幸ê，因為無koh有迫害，卻失去了信仰ê警覺性。學習順服tī現實ê境況中是當時亞伯拉罕siōng大ê特質，教會（基督徒）tī現實中必須ài去學習亞伯拉罕ê信仰生活，無論任何境況lóng願順從上帝，有時照理來講是無合理ê tāi-tsì，iáu應該保持順從（如獻以撒！）tī咱信仰過程中，mā會tú-tio̍h tsit項事實，但上帝suah要求咱tī困境中去學習順服ê恩典！

當然，有時教會mā會表現出軟弱無完全ê一面，保羅tī哥林多後書四章7節：咱有tsit-ê寶貝khǹg tī瓦器內底，教會ài不斷來建立tī認bat家己ê軟弱kap無完全時，伊tsiah ē-tàng去追求全能、完全ê主上帝！當基督徒ê信仰有tsit種表現ê時，上帝ê能力會加tī無完全、軟弱ê人身上，hit時軟弱ê人所體會tio̍h ê m̄是軟弱、無完全，是上帝ê全能kap絕對ê能力，咱若khiā-tī上帝tsit pîng，什麼人ē-tàng抵擋咱？歷代教會就是倚靠tsit種絕對ê大能力來完成上帝所交託hō͘教會ê使命！

三、 社會ê良心（代禱者ê角色）
教會ê存在，m̄是只為家己，猶原是為上帝kui-ê拯救ê計畫，ná親像亞伯拉罕受召，m̄是為伊個人，是beh完成上帝對全人類救贖ê大事工。咱看亞伯拉罕kap上帝ê對話，就ē-tàng明白，教會ê存在至少有二個決定性ê目的： （a）教會ê存在，必須ài成做社會ê良心。Tī一個腐化ê烏暗社會中，若有教會ê存在，至少ài ē-tàng tuì教會中，tshuē-tio̍h hō͘上帝悅納ê義人，thang用來消除社會ê原因，因為親像亞伯拉罕向上帝祈求，若有十個義人，上帝會為hiah-ê義人赦免所多瑪。

Tsit-ê事實說明一個真理，hō͘教會koh-khah明白其存在ê真正價值，因為義人ài uì tsia出來，至少因為教會，ē-tàng有真tsē thang抵消上帝怒氣ê義人。這就是án怎講會強調教會必須是社會ê良心，尤其是tī tsit-má烏暗腐化ê社會，基督徒一定會時常把握家己，成做淨化社會ê功能。當然，基督徒無可能kap主耶穌仝款有拯救ê能力，但是咱ē-tàng經營咱ê人生現況，tī現實世界中成做上帝所喜樂ê義人，上帝一定會為tsiah-ê祂所喜樂ê義人kā伊行赦免ê恩典！

（b）另外一方面，咱必須明白，亞伯拉罕tī-tsia所表現ê是成做一位代禱者，khiā-tī上帝kap眾人之間，成做中介者（調停ê人），ná親像主基督成做人kap上帝之間ê中介者，咱看tio̍h亞伯拉罕向上帝所提出ê問題，雖然是簡單平常，但其中隱藏疼心，tsiah-ê人若照上帝ê公義是ài hông除滅ê，但是亞伯拉罕不斷來祈求上帝，tsit種熱愛人類ê心，to̍h是完全ê愛ê發揮，tsiah ē-tàng彰顯教會存在ê意義，koh-khah m̄免講，教會ê標幟是愛（十字架to̍h是愛ê標記），十字架猶原是教會向人自我紹介ê記號。但是咱ài會記得bē-tàng kā這形式化，必須hō͘伊實實在在來表現出十字架ê愛tī人間！

Tsit點是現代教會不足ê所在，咱是m̄是bat為四周hiah-ê teh-beh滅亡ê靈魂迫切tī主面前祈求neh？基督徒是hông叫做義ê人，m̄是掛名ê義人，是有防腐作用ê義人，聖經箴言十章24節：惡人所驚ê一定tshuē tio̍h伊，義人所願ê一定蒙受應允。25節講：暴風一過，惡人歸tī無有，義人ê根基是永久。

結論：咱ài學習亞伯拉罕對上帝完全ê信靠，對人類靈魂ê熱愛，以及謙遜ê心，koh一pái做信仰ê省思，咱ê存在如何？tī腐化ê社會中，咱kám有發揮基督徒ê功能？或者是成做別人ê阻礙？