《草地囝仔做牧師》

 | | | 轉寄

復興ê基地

作者 林宗要 2010.08.01

創世記三十五章1～15節

做一個基督徒，tī信仰生活中，tiāⁿ-tiāⁿ會tú-tio̍h淡薄á pháiⁿ決定ê tāi- tsì，就是當伊聽tio̍h上帝ê聲音了後，tī上帝面前，必須ài有真明確ê信仰決定來完成上帝所交託ê tāi- tsì，特別是有一kuá利害關係同時teh發生ê時，實在是真pháiⁿ取捨。

M̄-koh，信仰生活ê價值，就是tī tsit種取捨中顯出，基督徒必須以信仰ê良心做根本來採行伊ê信仰ê決定。Tsit種情形，往往是上帝hō͘基督徒ê挑戰。

Ná親像上帝kap亞伯拉罕，當上帝ê吩咐降tī伊身上ê時，伊面對極大ê挑戰（創世記十二章、二十章）。上帝命令伊離開家鄉到上帝所應允ê迦南地。希伯來書ê作者講：「出去ê時tsūn，iáu m̄知ài往toh位去，因為信，就tī所應允ê 所在作客，kah-ná tī異地tuà帳篷。」（希伯來書十一章8～9節），tsit兩節聖經充分描寫亞伯拉罕對上帝命令ê決定，完全用信心來承接上帝ê命令。另外tī創世記二十章上帝ài伊獻獨囝以撒ê時，咱ē-tàng想像伊內心激烈ê掙扎，但是最後伊選擇服從上帝ê話（m̄是做假ê，是實實在在ê表現）tī tsit兩件tāi- tsì中間，咱ē-tàng看出亞伯拉罕絕對ê信仰，完全ê確信，這tio̍h是伊所以成做信仰之父ê原因。

Tsit種情形實在是信仰上ê非常大ê挑戰，mā實在表現出信仰ê性格，無用自我取代上帝ê旨意，tsit種觀念的確立，是健全信仰ê唯一事實。為何真tsē基督徒tī社會生活中會表現妥協ê信仰？是因為自我ê成分tsē過上帝ê意旨。因此當上帝kap世界同時khǹg tī信仰者面前ê時，就會看出基督徒信仰ê真假，tsit種狀況tiāⁿ-tiāⁿ會發生，而且基督徒會一直面對tsit種選擇，若無堅固ê信仰基礎，往往會出現信仰ê危機。亞伯拉罕ê孫á雅各，伊ê信仰當然無法度kap in阿公亞伯拉罕相比，伊是承繼父祖ê信仰，用現代語來講，to̍h是世襲ê信仰，世襲ê信仰tī信仰ê表現上有時會有差別，有時會表現出buē冷buē燒，有危機性質ê信仰，一旦被引誘，往往無法度確定信仰ê真實價值，因為無真實ê體驗。

創世記二十八章描述雅各為tioh8beh閃避以掃ê殺害，離開家鄉，tī曠野中夢見天梯，將hit-ê所在號做伯特利，然後去投靠母舅拉班，而且koh成家立業，koh再tńg去故鄉。

創世記三十四章記載雅各ê tsa-bó͘-kiáⁿ被示劍人侮辱，產生家庭危機ê故事。有一kuá學者認為雅各若順從上帝，聽祂ê聲音，無停留tī示劍直接tńg來到伯特利（上帝ê厝），可能就bē發生tsit種危機，tī屬靈ê tāi- tsì頂面，咱ê信仰生活，若停tī m̄是上帝ê旨意ê所在，往往會有tsiok悲哀ê tāi-tsì發生。

當雅各全家tī tsit種危機中，伊suah聽tio̍h上帝ê喝聲「起來！上伯特利去tuà tī hia」（三十五章1節），上帝ê人民，必須ài生活tī有上帝應允ê所在！tsit句話to̍h是化解當時雅各in-tau危機ê根本原因。

上帝向伊提出此吩咐，到底有什麼特別ê啟示？雅各當時ê狀況，ē-sái做今á日基督徒生活ê借鏡，因為基督徒猶原活tī社會中，所接觸ê對象大部分lóng m̄是信徒、異教徒，tī án-ne ê境況中，難免有對基督徒ê信仰生活具挑戰ê誘因存在。因此，基督徒若beh確定信仰ê特質，必須ài有相當ê警覺kap敏銳ê觀察力，to̍h是信仰ê良心，tsiah ē-tàng tī án-ne ê現實ê境況中有美好ê見證。Tī-tsia有一件真重要ê tāi- tsì，就是ài不斷來留心注意聽上帝ê聲音，tsiah ē-tàng完成受託ê使命！上帝為何命令雅各去tuà-tī伯特利neh？咱ē-tàng tuì伊所經歷ê伯特利來思考下列tsit 幾項：

（一） Tī伯特利，雅各體驗tio̍h上帝
對雅各來講，伯特利是伊ê人生關鍵ê所在，創世記二十八章咱看tio̍h一個奸巧、pì-sù而且m̄-bat離開厝真遠ê青年，為tio̍h伊ê行為，必須ài逃離家園，伊拚性命走到伯特利已經是黃昏，只好暫時tuà-tī曠野，tsit時伊心中ê情感是咱所ē-tàng了解ê。因為雅各欺騙ê行為hō͘伊ê阿兄以掃ê 不滿，伊若無走，koh驚伊ê阿兄ê追殺，性命不保，但是頭前是暗暗長路，伊必須tuà-tī荒郊野外，可能有真tsē驚人ê野獸。頭前ê路途無法度知，後面伊ê阿兄追殺ê危機mā iáu未消除，tī án-ne ê境況中，伊內心一定是無限ê空虛kap絕望，無人ē-tàng幫助伊化解tsit種狀況，伊是處tī人生ê絕境中。Tī tsit種極端ê苦境裡，伊體驗tio̍h上帝！事實上照雅各當時ê狀況，除了上帝以外，實在無其他辦法 ē-tàng化解伊當時ê危機！

Tsit種體驗，是人生ê幫助kap安慰，mā是力量，hō͘伊有能力面對未來ê人生，伊講：「耶和華真正tī tsia，我竟然m̄知影。」（創世記二十八章16節），tsit句話真實表達出雅各對信仰ê體驗。所以伯特利對雅各來講，是伊經驗tio̍h上帝ê所在！tsit種體驗hō͘伊tuì世襲ê信仰變做體驗ê信仰。過去伊tī厝內ê信仰，是被動--ê、間接--ê，ē-sái講是現在伊tī伯特利，伊體驗ê信仰是直接--ê，因為上帝面對面kap伊講話！tsit種直接ê信仰是今á日基督徒siōng需要--ê！

（二） 保守、蒙恩、得tio̍h應允之地
伯特利對雅各來講，m̄-nā kan-ta是伊真正認bat上帝ê所在，同時，tī tsia伊iáu聽見上帝親自beh保守、賜福伊kap伊ê後裔ê應允。「我是耶和華lín阿祖亞伯拉罕ê上帝……我beh kap你同在。無論你去tó位，我beh保庇你……」(創世記二十八章13～15節)

相信當時雅各siōng需要ê問題，是聽見上帝安慰kap祝福ê聲音！因為伊ê信仰kā伊講，伊所事奉ê耶和華是全能ê大主宰。

Tī-tsia上帝m̄-nā保證伊目前ê安全koh應允伊未來ê人生亨通發達！無任何不幸憂傷會侵擾伊，相信無任何tāi- tsì ē-tàng kap當時雅各所體驗tio̍h上帝ê保證kap祝福相比--ê！咱生存tī世上，phah拚追求ê就是安全（平安）kap受祝福ê人生（有成就）。Tsit種不斷teh追求ê siōng根本事實，就是tī伯特利！所以伯特利是人生體驗安全kap承受上帝ê祝福ê一個特別ê所在。可惜現代人往往錯過了方向！

基督徒必須明白，伯特利是上帝向所有基督徒應允平安kap賜福ê所在！真tsē熱心有為ê基督徒蒙恩ê人生，通常lóng將in ê生活建立tī伯特利。

當時ê伯特利是拋荒地，是曠野，但是經過雅各kap上帝發生直接ê接觸了後，伊就成做伯特利，所以基督徒teh tú-tio̍h拋荒地或者是曠野時無需驚惶，只要ē-tàng kap上帝有接觸ê機會，伊必定ē-tàng成做伯特利。伯特利是人生siàu想--ê，因為上帝無限ê保守kap應允，mā著是人生ê安全kap祝福ê所在！基督徒ê人生ài設法盡量生活tī伯特利ê境況中，只要基督徒存在tī-tsia，無論tī生活或者屬靈ê事實上，lóng會有優秀ê表現，因為tsit種生活環境beh成做基督徒ê ǹg望kap力量，tuì-tsia產生真tsē榮神益人ê作為。

（三） 性命更新之地
雅各ê真tsē不安kap危機tī伯特利得tio̍h完全ê解決。對伊來講，伯特利是伊信仰ê轉捩點，是伊ê人生siōng大ê轉機。因此雅各ê人生kap伯特利有密切ê關係，上帝tī-tsia特別向伊提起一件tāi- tsì，就是伊新ê存在。上帝向伊講：「你名是雅各，tuì今仔日了後mài koh叫雅各，ài叫以色列」（三十五章10節），tsit-ê事實，是表示雅各tī伯特利ài有一個重新ê開始，本來伊名叫雅各，但ài改名叫做以色列，咱若詳細看創世記，咱就會明白雅各ê性格m̄是真正直kó͘意，伊hō͘人ê印象是奸巧、不擇手段、欺騙兄哥kap老父，然後tī伊ê丈人hia mā 用無正當ê方法得著名利，可見雅各m̄是一位正直ê人。

以色列人（猶太人）ê性格加減表現出像雅各ê款，tsit種人是無受歡迎、hō͘人討厭ê，但是上帝suah命令伊ài上伯特利koh必須ài改做以色列tsit-ê名。

創世記三十二章28節，上帝hō͘雅各改做以色列了後，以色列就成做tsit-ê民族kap信仰ê合稱，未來ê雅各tī伯特利beh成做以色列，是有屬tī上帝性格ê人，tio̍h親像保羅tī哥林多後書五章17節所講：「若有人tī基督內底，伊就是新造ê人，舊事已經過，lóng變成新ê了。」了後ê以色列kap上帝ê關係就有美好ê表現，無koh像以前hit種受人討厭ê生活模式，完全變為具有屬上帝性格ê以色列。

過去真gâu欺騙、奸巧ê雅各，經過上帝ê憐憫tsiah成為以色列，所以伯特利，對雅各來講是重生之地，kap過去tī示劍無仝， 因為現在伊是tuà-tī上帝ê厝伯特利。Tuà-tī上帝ê厝ê人，伊ê生活、價值觀，kap所有ê心態lóng tio̍h ài有符合上帝屬性ê氣質，因為咱知影，beh承接上帝ê恩典，必須tio̍h建立tī符合上帝所要求ê存在ê內涵。

（四） 敬拜上帝ê所在
伯特利對雅各來講，是伊ê新性命ê開始，但是tsit種新ê存在，m̄-nā是外觀，koh-khah表現出伊ê實質價值觀。

這就是上帝命令伊必須ài tī伯特利敬拜上帝！雅各以及一切kap伊同在ê人，到迦南地ê路斯就是伯特利，伊tī hia起一座壇，將hit-ê所在號做伊勒伯特利（創世記三十五章6～7節）tī創世記二十八章18～21節mā有記載，ài tī tsia建立上帝ê祭壇，伊是敬拜上帝ê所在，是表示雅各對上帝ê感恩以及信仰ê決定，這是信仰者ài進入上帝ê殿堂ê基本要素。啥麼人會想beh進入上帝ê聖殿？就是心存感恩kap有意向獻身ê人！這是基督徒teh禮拜ê時所需要了解ê，因為，人必須ài有tsit種感恩ê心進入上帝ê聖殿，同時用獻身ê心情khiā-tī上帝面前，tsit種禮拜tsiah是上帝所喜樂ê。

「Tio̍h除掉lín中間ê外邦神，也tio̍h自潔。」（三十五章2節），因為耶和華是獨一無二ê主，祂bat向伊ê子民講：「除了我以外bē-tàng有別ê上帝」，同時也tio̍h自潔，這是做禮拜ê人所必須具備ê條件。人beh敬拜上帝tsìn前，必須先phah破、清除所有ê偶像，然後ài自潔，就是有美好生活ê見證，這是咱所強調ê禮拜kap生活ê配合，人若是只有禮拜bô自潔，án-ne上帝是bē悅納--ê。

基督徒ê使命就是hō͘上帝ê旨意通透tī人間，這是建立tī有清潔ê禮拜ê生活tsiah來，假使tī基督徒心中iáu有偶像ê存在（私意取代神旨就是人siōng大ê偶像！），就無可能有真誠ê敬拜！因為主耶穌bat警告咱講：「一個人bē-sái事奉二個主。」，當你ê心被自私利益家己所佔tiâu，上帝一定無tī你ê性命。基督徒若beh體會伯特利事實，一定會消滅所有ê偶像，並以清潔ê心敬拜奉待上帝！

基督徒對偶像了解，m̄-nā是指hia-ê看會tio̍h ê雕像，聖經中論偶像ê時，iáu包括以人意替代上帝ê位，這mā是拜偶像，tī咱心中真tsē 不法ê心思意念，hiah-ê屬tī肉體ê私慾所發出ê lóng是偶像，ài進入上帝ê厝tsìn前，tsiah-ê lóng tio̍h ài kā伊粉碎hō͘伊清氣。

有一位學者講：基督徒若beh踏入教堂，必須將所有ê罪kap惡khǹg tī教堂門口外！

結論：基督徒ê信仰kap環境，有時會處tī危機kap挑戰中，信仰ê狀態mā會起起落落，今á日所特別需要ê，是得tio̍h有利ê靈屬境況，若ē-tàng不斷來進入伯特利，to̍h ē-sái hō͘咱ê屬靈性命koh-khah完全進步。