《草地囝仔做牧師》

 | | | 轉寄

理想ê建立

作者 林宗要 2010.08.15

尼希米記四章7～23節

自從以色列人kap上帝確立契約關係了後，上帝就要求in ê信仰kap生活內容必須ài符合上帝ê心意，ài常常謹慎，bē-sái有lán-si疏忽來影響in kap上帝之間ê信仰關係。因此，上帝向信仰者所要求ê 是以謹慎覺醒ê心去建立符合選民身分ê生活方式。

Tsit種生活方式就是選民蒙福ê主要原因，án-ne，in tī社會上，也ē-tàng發揮做一個上帝子民ê實質價值，這就是上帝揀選in ê目的。

Tī上帝對人類ê期待kap計畫中，祂確確實實對人類有tsit種要求，咱看創世記第一、二章ê創造論，tī上帝創造秩序中「上帝看tio̍h一切所造ê lóng真好。」（創世記一章31節），tsit句話是上帝創造ê時所講ê，伊說明了上帝創造ê事工ê完美kap理想，所以tī上帝創造ê計畫中，祂看一切被造物lóng真好，祂將人類安置tī伊甸園中，自有伊ê期待kap要求，上帝要求人必須有合上帝心意ê人生內涵，人tsiah ē-tàng以真實ê心態面對上帝。因為tī上帝ê計畫中，祂要求被造之物，tī in ê境況中，做一個相對稱ê存在者，上帝一定bē要求hiah-ê鳥獸以人ê模樣去面對上帝，只要被造物tī伊ê程序中，按照實況去做，就是完成上帝交託ê使命。

可惜人類無法度維持上帝所希望ê秩序，mā就是人bē-tàng照上帝ê命令，tī創造ê程序中，人將秩序錯亂了，本來人必須順從上帝ê話，但人卻無聽上帝ê話suah去聽從誘惑者ê聲音，phah亂了上帝創造ê秩序，造成人被上帝逐出樂園ê結局。

同時咱了解，反背上帝創造秩序ê社會ê實況，必定會產生負面作用，tsit-ê事實就是咱所看見，自有人類以來，四界充滿了人性ê問題。Uì古早到taⁿ，咱詳細觀察社會中ê問題，就會知影：人因為違背了上帝創造ê秩序，致使人ài活tī脫序ê社會狀況中，主要ê原因是人破壞了上帝所創立ê秩序，tsit-ê秩序ê重點teh說明人kap上帝之間ê人格關係。

對以色列人來講，in kap上帝ê關係既然是確立tī彼此ê特殊契約上，對tsit-ê契約ê履行mā就決定in kap上帝間ê實質關係，mā就是in kap上帝之間有一種特別ê秩序存在，以色列必須用謹慎自守ê態度去經營in kap上帝之間ê關係，就會得tio̍h上帝所應允hō͘ in ê人生（民族）ê繁榮kap祝福。

Tī舊約聖經中，講tio̍h上帝對伊ê選民ê祝福以及hō͘ in ê人生條件，伊ê重點tī選民對上帝忠誠ê信仰生活。Tī忠誠ê信仰生活中必須具備ê猶原是謹慎，自覺ê人生態度kap信仰ê絕對性，tsit種生活ê內容to̍h是信仰ê性格。

當時尼希米所領導ê上帝之城ê重建khang-khuè，一方面是表現出選民信仰生活ê願望、因為過去in ê民族被掠到巴比倫，上帝之城受tio̍h嚴重ê破壞，以色列人民中ê精英被掠到巴比倫，生活失去自由，tsit段被擄ê生活，tī in ê信仰上有非常深刻ê反省——為何上帝ê選民會遭遇án-ne悲慘ê人生狀況？當然，咱若有舊約聖經kui-ê以色列ê歷史，尤其是士師記ê內容，to̍h是說明選民ê生活史是siáng建立tī反背上帝之上，上帝tuì án-ne差遣外人來攻擊in，人民受欺壓受迫害，in認罪悔改，求上帝幫助，上帝興起士師，解救以色列人，了後tsit種情形一再循環發生，這是士師記ê大概內容，以色列人tsit種生活內容to̍h是伊 tī上帝面前實實在在ê信仰kap生活ê寫照。

一、 理想ê喪失
以色列人有一個理想，就kan-nā in tī埃及做奴才時，摩西代表in向法老王所求ê一句話：ē-tàng生活tī自由自在敬拜上帝ê所在，這是以色列人出埃及ê主題。確實，tsit種ē-tàng生活tī自由自在、tī ē-tàng敬拜上帝ê環境to̍h是基督徒理想ê生活內容，是信仰者應該爭取ê，mā是理想ê人生，因為知影做一個上帝ê人民tī伊ê人生境況中，若無tsit種thang自由自在kap上帝交往、敬拜上帝ê時間，𥴊kám ē-sái叫做理想？這是有缺陷、無完美、有瑕疵--ê。理想ê希求是人生活ê重點，失去伊，人生就無意義，仝款ê道理，tī信仰ê世界，信仰者iah一定ài有伊信仰ê理想 kap希望，向理想ê目標去發展、追求，建立理想ê信仰生活ê實在，tī信仰生活史中，確實有真tsē人持守tio̍h tsit種理想kap希望，in甚至為tio̍h tsit-ê理想甘願付出一切，有時連性命mā獻上，成做教會歷史上真tsē ê殉教者。

M̄-nā限tī信仰世界，人生現實中mā會有tsit-ê狀況，有人為tio̍h人生某種理想tsiah奮鬥，甚至犧牲一切，尤其伊 tī極權政治中，有tsi̍t-kuá自由ê鬥士，願意冒一切危險去追求in心目中ê理想，咱ē-tàng tuì台灣ê政治實況了解tsit-ê情形，tsit幾年台灣ê民主運作確實比以前進步，形成ê原因，是因為tī過去台灣社會中有真tsē人為tio̍h tsit-ê理想tsiah奮鬥、phah拚，經過流血、囚禁、犧牲性命所換來ê代價。

Tsiah-ê人心中lóng充滿tio̍h無上ê理想，所以理想是人生生存ê siōng大目標kap重心，假使一個人心中ê人生理想破碎時，往往會失去求生ê意志，咱有時會見tio̍h tī tsit款情形中ê自殺者或者自暴自棄ê人。

選民ê理想，照tio̍h in kap上帝之間ê關係，in應該希望ē-tàng tī上帝ê聖城耶路撒冷，自由自在ê敬拜上帝，這是in siōng大ê理想，ē-sái講是tsit-ê理想破碎了，tī主前五八六年聖城被巴比倫王phah-pháiⁿ，對hiah-ê心向祖國ê以色列人，in體會tio̍h理想破壞ê悲哀，咱讀耶利米哀歌全卷五章，就ē-tàng明白當耶路撒冷毀滅ê時ê悲慘景況，以色列人認為tsit-ê悲哀就是家己反背上帝ê旨意，是家己犯罪ê結果（耶利米哀歌一章5節），tsia詳細說明聖城滅亡時ê社會景況、敵人ê侮辱、人民ê悲哀kap無助、人民受曲辱困頓，甚至teh腹肚 iau時，母食囝肉（四章1～10節），tsit種描寫 tī leh說明in理想ê破滅，因為in體驗tio̍h tsiok大ê kiaⁿsiau，選民ê尊嚴被蹧躂，家破人亡，in無法度按照家己ê心意去生活，一切lóng ài受tio̍h約束，tsit種失去自由ê現象是人生siōng大ê悲哀，tī tsit款情形下，咱了解當時選民心中ê感受，kap in響應尼希米重建ê事工所付出ê努力是肯定積極ê，主要原因是tī彌補in過去ê缺憾——被kiuaⁿ百多年ê體驗。Tī人ê一生中，有一kuá人會因為tú-tio̍h大觸磕tsiah刺激伊ê重新建設tsiah有真大ê成就，以色列人亡國，確實造成伊ê信仰頂懸ê大轉變，因為in體會tio̍h理想ê喪失，這是非常悲哀ê代誌。

二、 Uá靠上帝ê幫助
Tī hit種狀況中，尼希米tshuah著當時有心ê選民去做重建聖城ê khang-khuè，in認為聖城是in生活ê理想kap重心，可惜因為祖先反叛上帝造成聖城毀壞以及家破人亡ê淒慘景象。 尼希米ê新使命就是重建毀壞ê聖城，當然這是非常辛苦ê khang-khuè，而且人ê力量有限，若m̄是uá靠上帝ê幫助是無法度完成ê，tio̍h親像基督徒信仰生活ê過程中，mā會tú-tio̍h真tsē 艱苦ê事實，但是信徒一定會體會tio̍h「uá靠hē厚賜我力量ê，我凡是lóng ē-tàng」，tio̍h親像主耶穌kap學生kap hit位 好額ê青年對話了後向學生講ê「tī人這是bē-sái--e，tī上帝凡事lóng ē-tàng」，確實信仰者若無tsit種體驗，伊ê信仰一定有真tsē問題存在。

當時ê尼希米面對建立共同ê理想tsit-ê偉大ê問題時，伊所表現出來ê就是倚靠上帝幫助tsit種絕對ê信心，確實，當時in ê環境非常惡劣，ē-sái用內憂外患來形容，m̄是一般ê人力ē-tàng面對，m̄-koh對上帝ê人民來講，唯一ê辦法就是經營信仰ê事工，專心ńg望全能ê主，這是當時尼希米siōng主要ê khang-khuè之一。

（A） 以祈禱開始「阮ê上帝ah！求你垂聽，因為阮被藐視」（四章4節）。
「m̄-koh阮祈禱阮ê上帝……」（四章9節） 面對tio̍h hiah-ni̍h tsē挑戰kap破壞ê事實，一方面in ê防備，另外一方面就是表現出信心ê事工，uá靠上帝ê幫助，tsit位偉大ê領袖tī tú-tio̍h重大ê困境時，伊無倚靠家己ê才能 kap辦法，是以信仰，確信上帝幫助伊面對hiah-ni̍h重大ê問題。以祈禱開始是表示服從上帝ê旨意，順從上帝ê命令。

（B） 以信心去感動人：
Beh建立共同ê理想ê前提是建立tī確信上帝會幫助ê信仰上，一方面以祈禱順從上帝ê指示，另外一方面是用信心感動人，「我察看了，就起來對貴冑、官長kap其他ê人講免驚in，當紀念主是大koh 可畏ê，lín ài為著兄弟、囝兒、牽手、家產爭戰。」（四章14節）

Tī逆境困苦中，siōng大ê安慰力量是來自信仰ê感動，尼希米以tsit種絕對確信ê信心去面對tī惡劣環境當中ê人民，的確產生良好ê效果，因為tuì信心所產生出感動ê力量，是超過人ê想像，因為往往有真tsē人無法度理解ê神蹟會發生，因為tsiah-ê神蹟，mā只有tī信仰ê世界tsiah ē-tàng實現。

（C）人格ê感化kap個人ê犧牲（五章15～19節）建立共同ê理想猶原是以人格參與事工，就是用有ê見證去完成共同ê理想，tī tsit段聖經中，tsit位偉大ê領袖m̄是高高在上，卻是用奴僕ê形象kap民眾生活作伙，用實際生活表現出伊心中ê理想，伊愛民如子以及付出所有tī伊ê理想ê事工上，tsit種以完美ê人格感動呼召人參與，以及絕對付出個人所有ê情形，往往是成做hiah-ê人所欽仰kap效力ê主因。為何政客會失去民心？原因tī-tsia，以中國近代史做鑑戒，這是值得思考ê一件代誌。只要選民ē-tàng響應tsit位偉大ê領導者ê人格感化，服從伊ê作為，相信任何艱難ê理想目標lóng會達成。

三、 提防破壞力，完成理想ê實現。
咱知影tī人間社會中，若有理想ê建設時，就有破壞力量ê存在，這是人間道理，傳道冊講「拆毀有時，建造有時」當尼希米beh建立共同ê理想時，就已經有破壞力存在，可見偉大ê理想背後存在tsiok驚人ê破壞力。咱mā ē-tàng uì人類生活內容去體會tsiah-ê事實，甚至tī被認為是愛ê共同體會ê教會生活中mā有tsit種可能性，當教會有理想ê藍圖出現時，定定會受tio̍h無理、無情ê反對、批評、甚至攻擊，雖然tsit-kuá反對者定定口口聲聲講是因為教會，但是事實是teh表現出人性自私kap惡劣ê性格。 當時尼希米tú teh tsit種狀況中，hiah-ê反對者絕對m̄是出tī愛護聖城，這是咱ē-tàng理解ê，因為tī有上帝美好旨意ê事工中，必定mā有真tsē反對破壞ê動作。

因此，beh建立共同ê理想ê心理準備，就是提防破壞力，了解tsiah-ê反對者ê企圖，以相當程度ê準備提防tsit種破壞力，tsiah ē-tàng達成建立共同理想。尼希米一方面對反對者ê破壞企圖相當清楚，另外一方面是以伊ê人格去感化所有ê人，hō͘伊ê同心合意，m̄是只有尼希米一人演獨腳戲，是動用所有ê人投入並參與tsit-ê共同理想ê建設，tsit種同心合意所產生出來ê共同力量ê發揮，就是完成in ê理想bē-tàng欠缺ê力量，塞內加（Seneca）講：「上帝hō͘人成做多數者，猶原是tī互相援助。」的確，同心合意ê力量是完成理想ê大動力，無論家庭或者是企業團體或者是政黨ê運作，甚至咱ê教會lóng必須以tsit種心態去經營tsiah ē-tàng達成理想ê現實，若無就是失敗。

Tī-tsia，咱ē-tàng明白，同心合意是成功ê主要條件。「人民專心作工」（四章6節），「各人做各人ê工」（四章15節），「各按宗族the̍h刀the̍h槍the̍h弓……」(四章17節)tī tsiah-ê經文中thang看tio̍h，當時tī尼希米帶領下ê民眾已經成做一ê力量，m̄是一盤散沙，tio̍h是眾人成做一體，共同為理想來付出，kan-ná親像保羅tī以弗所冊四章論教會中無仝ê肢體，為建立耶穌基督ê教會，人人各盡伊ê職，無分你我，ē-tàng建立共同ê理想。 咱ê教會雖然小，但是mā有各種事工需要咱用無私奉獻ê心kap豐富ê愛心去參與，若ē-tàng án-ne，教會自然會發生無比ê力量去完成建立共同ê理想kap目標。時常聽見一句話：合一就是力量，咱教會所需要ê就是tsit種力量，tsiah有能力面對強敵。

另外一方面，咱mā看tio̍h當時以色列人是以武裝來參與khang-khuè，當然今á日教會事工推行mā可能有無方便ê所在，但是伊說明了：這是當時環境中完成理想一定ài ê方式，mā說明咱今á日信仰生活ê內容是必須持守儆醒ê心靈，謹慎、警醒！ 結論：聖城ê毀害是上帝子民ê悲哀kap負擔，重建是上帝子民ê使命。但是完成理想一定有真tsē阻礙。尼希米ē-tàng持守：（一）對上帝絕對ê信心，（二）對人民ê愛心去行。Tsit二者實在是勝利ê根本動力。