《草地囝仔做牧師》

 | | | 轉寄

復興ê道路

作者 林宗要 2010.08.08

以賽亞書五十七章14～21節，五十八章8～14節

現代文明中，人死亡ê兩大主因分別是人人所驚ê癌症kap心臟血管ê病變。

有一位長老，平常時身軀健康罕得有病痛。早起tsiah kap我講真tsē教會ê事工，但tī hit工暗時差不多九點接tio̍h伊死亡ê通知，原來是關門ê時，聲音siuⁿ大，隨時休克，送病院急救無效，伊ê死因是心肌梗塞，致使血流無通tsiah致命。現代人關心食ê問題，驚無小心會因為膽固醇hō͘心臟血管出問題，所以，造成台灣社會ê充滿健康食品kap流行減肥ê現象。

確實順勢ê人生狀況是人生活ê條件，tuì每一個角度去思考人生生活ê時，順勢ê人生是理想、健康kap幸福。反倒轉來講，buē順勢ê狀況會造成生活ê混亂、不幸kap病態！

咱看過年時ê 高速公路，本來二、三十分鐘ê路程，塞車ê時ài一、二點鐘。面對塞車ê情形，buē hō͘人有喜樂ê心情。Teh塞車ê時，駛車ê人若ē-tàng以平常心應對就已經相當bē-bái，真罕得有喜樂ê心情，大部分ê人lóng會發出怨言，造成無爽快，甚至影響行車安全。

用人體情形來思考ê時，咱koh-khah ē-tàng體會tsit種無順勢ê狀況，對人生是會造成非常嚴重ê負面效果。小小ê感冒mā會造成生活上真tsē無爽快ê現象，其他比如盲腸炎、結石或者是tī人體內無仝器官中所生ê腫瘤，lóng必須ài趕緊kā伊處理，以免影響整體ê健康，因為正常ê人生是確立tī順勢ê境況中，若無順勢ê時，就會發生危機。水溝若塞—tiâu，垃圾水就會溢出--來：血管若無通，就會造成中風，khah嚴重會死亡，khah輕--ê會行動不便。用tsit原理來思考人生ê時，咱人生ê經營mā必須ài有順勢而且良好ê狀況，以免有塞tiâu ê危機！ài如何去化解咱ê人生塞tiâu ê狀況，是今á日咱人生siōng迫切ê課題，tuì孩童時代開始，到學生時代，ài hō͘伊ê人生（學習ê人生）順勢通達，學生必須ài忠於學生ê角色，伊若beh hō͘伊ê人生現象有順勢通達ê狀況，伊必需要用智慧kap能力好好--á去經營，腳踏實地骨力做穡，tsiah ē-tàng有理想ê結局。Tī教會屬靈生活ê營運mā kap tsit-ê原理相仝，一般ê基督徒認為教會是傳教者teh經營，平信徒只要好好--á做禮拜to̍h ē-sái，tsit種觀點是m̄-tio̍h—ê，因為教會是全體基督徒所共有ê，基督徒有責任hō͘咱ê教會建立tī理想順勢ê過程中，tī-tsia需要全體基督徒ê參與kap分享，這是今á日教會ê重大事工，基督徒tī信仰生活中bē-tàng做會hō͘ tsit-ê愛ê共同體ê教會ê塞tiâu ê 物件，bē-tàng因為咱ê存在，tsiah kā教會生活塞tiâu bē-tàng正常流通。基督徒bē-tàng成做教會ê腫瘤，來阻礙教會功能ê發揮！tī現代教會中，咱tiāⁿ-tiāⁿ會聽tio̍h人批評某人是某教會ê癌！

基督徒信仰生活ê重點，tī保持咱kap上帝之間屬靈道路ê通順，m̄好因為生活狀況來阻礙kap上帝之間應該有ê連結，tsit種kap上帝之間建立良好ê通順管道，是教會生活ê內容。教會生活ê主要功能，就是不斷用各種方法，清除kap上帝之間ê真tsē障礙物，來建立kap上帝之間順勢ê屬靈道路，這是基督徒ê教會生活ê使命。

但是tī現實ê狀況，基督徒tiāⁿ-tiāⁿ會因為外在環境阻礙tio̍h咱kap上帝之間ê關係，mā就是tī咱kap上帝之間ê路上，有帶真tsē人情世故、事業khang-khè、無正常ê心態，阻礙tī咱kap上帝之間，因此造成咱beh行tsit條路ê時會增加真tsē困難，hō͘咱無法度順利處理咱ê心路歷程，這是浪費ê人生！iah就是本來tsit條路是單純好行ê心靈道路，因為咱ê人性軟弱，變成有真tsē塞tiâu ê路，今á日ê教會ài像先知所講ê：「有聲講，Thūn高，thūn高，備辦路，tùi我ê百姓ê路中除去窒礙。」。（以賽亞書五十七章14節）

（一） 建立正確ê觀念
教會ê復興siōng主要是在tī上帝聖靈ê感動，iah就是咱所了解ê聖靈ê同工，tī教會中所有ê基督徒若有聖靈ê感動或者是充滿ê時，教會自然就會復興，因此咱ē-tàng講復興ê主體，是tī聖靈ê同工。基督徒必須明白，聖靈充滿ê真實意義，m̄是只有hiah異常ê動作——講方言或者是祈禱ê極端肢體動作，因為tsiah-ê方言kap特殊祈禱屬靈狀態ê解說是見仁見智ê！

Tī現實ê教會生活中，過分重視tsiah-ê神祕ê作為時，有時會謗瀆上帝ê名，亂用聖靈來滿足家己ê私慾，如騙色、騙財！所以咱必須對「聖靈充滿」建立正確ê觀念。

聖經講，若無hō͘聖靈充滿，就bē認基督耶穌做救主（哥林多前書十二章3節），親像保羅因為聖靈充滿hō͘伊勇敢tī公會見證基督耶穌是人類救主（使徒行傳九章8節），司提反hō͘聖靈充滿了後就有美好ê見證（使徒行傳六章7節），使徒行傳記載保羅hō͘聖靈充滿做極美好ê福音事工，歷代教會中，mā有真tsē hō͘聖靈充滿ê人，tsiah-ê人tī信仰生活方面mā可能無像靈恩派人狂熱ê肢體表現，但是suah ē-tàng tī in真靜態ê信仰生活中看tio̍h tsiah-ê人ê 高尚品德，以及hō͘人肯定ê宗教行為。因為tī tsiah-ê人身上，咱ē-tàng看出：1） in有非常聖潔ê品格。2）in ê生活是建立tī順服上帝ê旨意，凡事lóng以上帝為主ê生活方式是tsiah-ê受聖靈充滿ê人ê人生內容。3）in ê生活kap信仰ê表現lóng受上帝kap人ê喜愛。一個基督徒ê生活，若有tsiah-ê內容，雖然伊bē曉講方言，mā buē有真狂熱ê屬靈動作，但是咱ē-tàng肯定ê是，有tsit種信仰kap生活內涵ê基督徒是完全受聖靈充滿ê人。

聖經tī-tsia kā咱講復興所必要ê條件，是建立tī正確ê信仰價值觀。比如1) 就是tuì咱ê屬靈道路上清除障礙物，hō͘咱kap別人之間ê管道通達無阻礙。2) 另外一件重大ê事實就是體驗上帝ê同在。（以賽亞冊五十七章14～15節）

咱知影上帝臨在ê頭一項條件是tī以賽亞書五十七章15節所講：「我khiā起tī至高至聖ê所在，亦kap心神痛悔謙卑ê人相kap khiā起，」，這就是上帝臨在ê事實，tī tsit兩節經文，已經清楚kā咱講ài確立復興ê道路ê正確價值觀念，tī-tsia咱已經明白復興ê首要條件就是tī你ê心中有憂傷悔改ê心靈。詩篇五十一篇17節：「上帝ah，憂傷痛悔ê心，你無beh看輕伊。。」伊同時mā是上帝拯救ê對象（詩篇三十四篇18節）。「耶和華oá近傷心ê人，　　拯救靈性痛悔ê人。」因為伊是踏入上帝恩典之門ê第一階段，咱看耶穌tī路加福音中，有關法利賽人kap稅使ê祈禱ê比喻（路加福音十八章），就會明白上帝所喜樂ê是人用憂傷悔改ê心靈去面對祂！這是咱ê教會生活中一件真實在ê真理。

（二） 信仰kap生活ê一致
咱已經知影復興ê道路是基督徒必須用具備信仰ê正確觀念做基礎，án-ne tsiah ē-tàng建立真正心靈ê復興，因為tī tsit-ê前提之下，上帝ê靈tsiah有可能進入tī人ê心中，當一個軟弱無完全ê人，心中充滿上帝ê靈ê時，就會有新kap充滿能力ê人生作為。因為咱知影，復興ê道路的確m̄是kan-nā停tī hiah-ê人ê觀念ê tsit-ê階段而已。因為人ê觀念若無用行動做基礎，伊ê觀念是lóng無價值--ê！所以tī復興ê道路上，人不但ài有正確ê觀念，同時必須將伊ê有理想、有價值ê觀念kā伊行動化，mā就是信仰kap生活ê實質關係。因為信仰若kap現實脫節，án-ne自信是無價值ê。現實ê環境中，有真tsē人，tī信仰ê世界所表現ê kap伊ê實際生活完全無仝，mā就是tī人ê現實生活中，看bē-tio̍h伊tī信仰世界所表現出ê優雅kap美好ê行為！

Tsit種只有tī宗教氣氛ê世界會看tio̍h信仰者所表現出來ê虛假ê敬虔（有人對聖經真熟練而且真gâu講道，祈禱時mā會流目屎），ē-sái講是tī日常生活中，比平常人khah離譜、墮落、腐敗、無惡不作，親像先知對當時以色列人ê指責，以賽亞書五十八章1～7節，只重視看會tio̍h ê外表，kap耶穌tī馬太福音二十三章對法利賽人ê批評仝款，信仰siōng驚人ê現象，就是信仰kap生活無相仝，這是現代教會siōng弱ê部分，是教會必須ài koh檢討ê。

Tī現實ê教會生活中，有一kuá基督徒表現出kap上帝ê關係非常ê熱烈、敬虔，但是伊tī社會生活上所表現ê性格是刻薄無情、品性殘酷、行動奇怪，一方面手the̍h聖經、聖詩，嘴唱哈利路亞，另外一方面ê心思teh思考傷天害理不法ê tāi-tsì，tsit種情形是今á日咱ê教會ài虛心去檢討ê實情，tio̍h親像上帝藉tio̍h先知以賽亞書五十八章1～7節所講--ê，tī tsit段聖經，咱看tio̍h，當時以色列人ê宗教信仰以及生活ê 無仝，in實行宗教ê禁食行為（通常被認為是宗教生活中ê siōng kuân境界就是禁食、祈禱）。但是tī-tsia，上帝suah責備in ê虛假（以賽亞書五十八章3節），因為上帝所喜愛ê是信仰kap生活ê一致。

親像以賽亞書五十八章6節以下所講ê，有行為做基礎ê禁食tsiah是上帝所歡喜--ê。Tī-tsia必須有實際關懷ê行動（比如：解放受無公正壓迫ê好人，關心無物件thang食、無厝thang tuà、無衫thang穿ê人！以賽亞書五十八章6～7節）。

這就是主耶穌向hiah-ê 謙虛實行祂旨意ê人tī馬太福音二十五章分別山羊kap綿羊ê比喻所講ê話。

因為tī現實ê狀況中，基督徒若是無法度表現出屬於上帝屬性ê公義、憐憫關懷ê行為，kan-ta去實行禁食祈禱ê生活，是無意義ê！

今á日台灣教會真流行tī祈禱山禁食、祈禱、靈修（有一kuá所在kui年ê時間表lóng排滿），假使只有停tī tsit種境界，m̄是重視現實環境中真tsē人生ê不幸kap苦難ê時，ài如何去解釋咱ê信仰？這是值得現代教會迫切去思考ê重大課題。

（三） 敬虔事奉上帝（以賽亞書五十八章13～14節）
咱已經講起基督徒必須正確建立信仰ê價值觀，tsiah ē-tàng結美好ê信仰果實，因為通常人ê行為lóng是伊ê心態所自然產生出來ê結果。這就是咱所強調人ê心態，就是伊ê做人ê種種表現，tī人ê性格上，咱tē-tàng完全理解tsit-ê狀況。

Tsit種正確ê信仰價值觀，是teh說明，基督徒ê信仰生活必須ài一致，tsiah會發揮出偉大ê功效！

只有tī人間社會發揮信仰ê實質價值ê時，tsiah ē-tàng帶動基督徒屬靈道路ê復興，會成做tsit種信仰kap生活一致ê關鍵，to̍h是在tī基督徒kap上帝之間，有敬虔ê心來奉待上帝！伊是表現對上帝ê熱愛，有像上帝屬性ê實在。當一個人對上帝有熱愛，而且有上帝屬性ê人生生活ê時，一定ē-tàng看出復興ê動力tī其中。

所以先知kā咱講，復興ê道路是先ài糾正人kap上帝之間ê關係，ài hō͘人kap上帝之間ê關係正常、完美，確定人對上帝有敬虔ê禮拜以及有感恩ê心情去奉待祂，所以先知tī-tsia強調守安息日ê生活。當然m̄是講守安息日ê人，一定kap上帝之間，就有絕對ê良好關係，但是若beh kap上帝建立良好ê關係，一定會有遵守安息日禮拜ê生活，因為這是siōng起碼ê條件。Tī基督徒禮拜ê生活中，咱必須ai3koh-khah反省，tsit-ê siōng基本ê問題，若buē-tàng做好，其他ê問題，大概mā buē有理想ê結果，這是真理。

人講基督徒ê人生是tuì tsit-ê安息日到後一個安息日。Tio̍h是講，基督徒ê人生是夾tī安息日ê中間，所以一個真正ê基督徒，是經由安息日了後，ē-tàng hō͘其他六工koh-khah顯出意義kap內涵，因為咱知影安息日是上帝祝福ê日子，上帝賜福tī安息日，身為上帝子民ê基督徒，若buē-tàng好好á利用伊，其他ê六日自然mā buē有啥物好結果。因為一個無重視安息日ê人，ná有可能重視其他ê六日？tsit種道理是咱ē-tàng了解--ê。人若ē-tàng重視、好好利用安息日，其他ê六日一定會因為tsit-ê聖日ê緣故koh-khah充實，這是信仰生活ê公式，mā是歷代教會所經驗出來ê結果。基督徒ê信仰生活公式，若了解，自然tī信仰生活上就bē有問題，親像數學上ê公式對學生ê理解程度有深切ê關係仝款。

用tsit種信仰生活ê公式來衡量咱現實ê生活ê時，加減就ē-tàng測出基督徒屬靈道路大概ê狀況！

雖然tsiah-ê問題tī咱ê生活上是真細ê tāi-tsì，但是卻是上帝應允咱復興ê路徑，以賽亞書五十八章13～14節是上帝向咱所提出ê應允，只要照上帝ê話去生活，你屬靈ê路況必定是完美理想ê。

結論：只要人ē-tàng順從上帝，實行主ê道路，上帝ê應允kap賜福就會降tī你身上，發出kah-ná天星ê光，耶和華beh做你ê保護，你求告，耶和華必定垂聽，你ê人生會kah-ná肥沃ê田園，有流不盡ê泉源，耶和華beh 提升你，承接應允之地！成做非常完美ê境況，這就是復興。