《寧毀不銹─馬偕e5故事》

 | | | 轉寄

弦á聲永遠bē停

作者 曹永洋 2009.04.12

今á日ê淡水kap百guā年前ê滬尾港，已經有真大ê差別。清澈ê河水phah無去..a，淡水河變成tsi̍t條烏河。河對岸ê觀音山，it向是畫家筆下tsi̍t座iau-kiau ê青山，m̄知tang時山頂已經有真tsē bōng，山腳高大ê樓á厝mā kā美麗ê景觀破壞去..a。

Hiah-ê人親目睭看tio̍h古蹟，心肝內lóng忍buē-tiâu莫名ê感動kap鄉愁；俯瞰淡水河，馬偕博士ê後輩柯設偕先生筆下所描繪ê淡水「詩美之鄉」，mā躍siōng tī歷史ê舞台。

1872年3月9日馬偕自滬尾登陸，先tī街á頂租tsi̍t間huàn厝，開始教育ê工作。伊tī傳道ê旅途中，mā隨時隨地授課，地點包括伊ê khiā家、淡水海邊沙灘、大tsing-á腳ia̍h-sī現在淡水高爾夫球場附近ê小山崙頂。

「神學院開拓時代」ê露天教育，差不多thang kap印度詩人泰戈爾創辦ê國際森林大學ē比phīng。上課ê時有藍天白雲，微微á ê清風kap水聲做伴。

露天教育時代ê早期弟子，包括siōng早受洗ê gō͘-ê門徒以及陳榮輝、陳雲騰、蕭大醇、劉求、許銳等22名學生。

牛津學堂tī 1882年7月21日起好。仝年9月14日正式開學。

當時無入學考試，學生lóng是各地傳教師推荐ê優秀青年。tsit批學生包括洪安、曾俊、何獅、葉順、郭希信（郭主）、高才等18人。

牛津學堂所教授ê學科，除了神學、聖經，iáu有社會科學（歷史、倫理）、自然科學（如天文、地理、地質、植物、動物、礦物）、醫學理論到臨床實習等。

開學初期ê教師陣容是án-ne：馬偕博士教聖經道理、聖經歷史、解剖學、地理學、植物學；嚴清華牧師教馬可福音、中國歷史;陳榮輝牧師教天文、地理；連和教中國字部kap中國歷史；洪胡教希伯來書。Tsiah-ê老師lóng是馬偕tī露天教育時代所訓練、教育ê早期學生。

馬偕博士講授動物、植物或者是礦物的時tsūn tiāⁿ-tiāⁿ the̍h實物來說明。譬如the̍h豬ê腹內來說明，或者是the̍h各種礦物來hō͘學生in看，有時iáu會hō͘學生去採集各種指定ê植物。Tī hit-ê時代tsit種實地教學會使講是真先進..e。



學生暗時集合tī講堂內底，發表hit工ê心得，上醫學課程之外，中晝歇睏息的時tsūn mā到偕醫館去協助幫忙馬偕博士，情形ná今á日醫學院學生tī病院實習ê型。學生講道ê訓練或者是討論，mā通常tī講堂內底演練展開。

牛津學堂tī當時ē-sái講為tsi̍t間相當進步，教學方法真現代化ê學堂。

牛津學堂創設3年了後（1885年）9月21日，英國長老教會tī府城（台南）創設長榮中學。10年了後（1895年）日本侵佔台灣，日人伊澤修二率領6位教師，tī士林近郊ê芝山岩惠濟宮開班授課。了後ê 50年內（1895－1945），台灣先民早期ê漢學á教育宣告結束，台灣正式進入日據時代全面殖民教育ê時期，台灣ê教育史mā發展成做另外tsi̍t種全新ê局面。

西洋傳教士tī台南展開ê教育、醫療奠基工作，馬偕ê牛津學堂、偕醫館ê創立，lóng tī日本據台tsìn前tio̍h已經開始，彰化基督教病院，mā tī日本登陸隔年1896年11月23日，由蘭大衛醫生創立，了後由伊ê kiáⁿ蘭大粥來接伊的工作，父kiáⁿ 2代做伙為台灣醫療宣教工作，tī中部寫出動人ê tsi̍t章。