《寧毀不銹─馬偕e5故事》

 | | | 轉寄

弦á聲永遠bē停

作者 曹永洋 2009.04.05

馬偕自1871年離開祖國加拿大，不知不覺已經進入第káu-ê年頭。

1879年ê秋天，加拿大母會海外宣道會希望伊回國休假述職。馬偕翁á-bó tio̍h kā 20所教會kap 3百guā名信徒，交hō͘其他ê傳道人員負責，tī仝年12月26日離開淡水，敢程回加拿大。

In先坐船到南部，傳道師kap會友lóng含tio̍h目屎kā in送行。1880年1月1日船離開台灣經廈門、香港。新加坡、檳榔嶼、錫蘭到印度。In沿途拜訪教會kap學校．mā tī各地證道。

4月1日離開印度到埃及，了後訪問耶路撒冷、耶利哥、約旦河、死海、奧地利、法國，達到英國倫敦時，tuà-tī馬雅各醫生厝內。最後經蘇格蘭，tī 6月24日安然tńg到加拿大魁北克。

因為tsiah-ê日tsí以來，馬偕tī台灣ê宣教工作，成績真好，伊tńg來到祖國，甚至到美國各地所做ê證道演講，隨時受tio̍h真tsē人ê關心、興趣kap參與，伊ê募款工作mā得tio̍h熱烈ê響應。Tsit位昔日hō͘人看做是「tsi̍t位急出頭ê青年」，tsit-pái回國suah變成逐家心目中ê「海外宣教英雄」。

Kap伊同行ê tsit-ê台灣sin-pū，koh-khah是引起真tsē人ê好奇kap關心。伊tuè馬偕tī各地教會證道ê時tsūn，伊kuí-nā-pái kā台灣ê情形講hō͘婦女聽。伊tī親友為in tńg去台灣前舉行ê歡送會應邀上台，簡單來報告（馬偕翻譯），伊tī加拿大旅行ê美妙感受。

馬偕牧師kap牧師娘ê tńg來國內，hō͘牛津郡左拉村ê故鄉鄉民，感覺無比ê光榮kap欣慰。透過報紙ê報導披露，募集加幣6千2百15元，全部交hō͘馬偕tsah..tńg來台灣。

馬偕翁á-bó帶tio̍h家己故鄉得來ê募款，懷tio̍h感恩kap喜樂ê心情，tī 1881年12月29日由加拿大tńg來台灣，積極籌建tsi̍t間現代化ê學堂，koh kā故鄉捐款人ê希望hō名做「理學堂大書院」簡稱「牛津學堂」（Oxford College）。伊成做台灣教育史上歷史siōng久ê學校之it。

牛津學堂設tī現在ê真理大學校園內底（hit間學校原本是淡水工商管理學校。1999年熱天奉准改名「真理大學」）。牛津學堂tī 1882年7月21日起好，siōng早設立ê目的是培育訓練傳道人材，mā是今á日陽明山嶺頭台灣神學院前身。當初是由馬偕自加拿大tńg去台灣了後，選擇tī淡水砲台埔ê小山崙頂完成..e。

馬偕uì廈門買磚瓦，親自繪圖設計，koh監督工程ê進行。伊kap早期ê台灣真tsē所在城牆建築仝款，因為當時無紅毛土，是用石灰攪煮熟ê tsū米、烏糖kap水代替，建造完成後mā算堅固。

Tsit-ê紅色磚á起ê建築，tī百guā年了後ê今á日，已hō͘人列為國家jī級古蹟。伊除了做hit間學校校史館之用，mā成做hit間學校ê精神標竿kap無價之寶。

當時ê牛津學堂前，有舖真tsē條小路，siōng suí ê是學堂頭前ê hit條。nn̄g旁有種高大ê tsing-á。路面舖ê是小基隆海邊取得ê粗沙，沙中參夾tio̍h góⁿ彩繽紛ê貝殼。透早ia̍h-sī黃昏，馬偕時常家己tī tsit條小道頂頭散步。

自台北捷運系統淡水線通車了後，真tsē遊客tī參觀suah淡水紅毛城了後，mā lóng會sah去設tī紅毛城後面ê真理大學校園內，參觀古色古香ê牛津學堂。