《台語kah魔術》

| | | 轉寄

路竹教會70週年

路竹教會70週年感恩禮拜~作者:蘇晏德

路竹教會過生日 Lō͘-tik kàu-hōe kòe seⁿ-ji̍t
敬拜上帝排第一 Kèng-pài Siōng-tè pâi tē-it 
兄弟姊妹愛盡職 Hiaⁿ-tī tsí-moāi ài tsīn-tsit
信仰火種毋通熄 Sìn-gióng hóe-tséng m̄-thang sit

七十週年的種子 Tshit-tsa̍p tsiu-nî ê tséng-tsí
福音路竹傳出去 Hok-im Lō͘-tik thoân--tshut-khì
上帝不變的真理 Siōng-tè put-piàn ê tsin-lí
喜樂平安大福氣 Hí-lo̍k pêng-an tōa hok-khì

細漢跟綴主跤步 Sè-hàn kun-tòe Tsú kha-pō͘
感謝耶穌的保護 Kám-siā Iâ-so͘ ê pó-hō͘
愛吟聖詩來歡呼 Ài gîm Sèng-si lâi huan-ho͘
至好朋友是耶穌 Tsì-hó pêng-iú sī Iâ-so͘

大漢以後行天路 Toā-hàn í-āu kiâⁿ thiⁿ-lō͘
勤讀聖經飲甘露 Khîn tha̍k Sèng-king ím kam-lō͘
耶穌是咱避難所 Iâ-so͘ sī lán pī-lān-só͘
毋驚拄著大風雨 M̄-kiaⁿ tú-tio̍h tōa hong-hō͘

前輩教咱白話字 Tsiân-pòe kà lán Pe̍h-ōe-jī
豆菜芽仔真趣味 Tāu-tshài-gê-á tsin tshù-bī
予咱會曉吟聖詩 Hō͘ lán ē-hiáu gîm Sèng-si
欲讀聖經真便利 Beh tha̍k Sèng-king tsin piān-lī

宣揚福音七十冬 Suan-iông hok-im tsit-tsa̍p tang
感謝耶穌的疼痛 Kám-siā Iâ-so͘ ê thiàⁿ-thàng
上帝恩典毋通藏 Siōng-tè un-tián m̄-thang tshàng
大好消息緊報人 Tōa-hó siau-sit kín pò--lâng

路上耶穌來扶持 Lō͘-tsiūⁿ Iâ-so͘ lâi hû-tshî
竹林有主的印記 Tik-nâ ū Tsú ê ìn-kì
教導信仰傳鄉里 Kàu-tō sìn-gióng thoân hiuⁿ-lí
會友順趁主教示 Hōe-iú sūn-thàn Tsú kà-sī

生根發葉佇路竹 Seⁿ-kin huat-hio̍h tī Lō͘-tik
日日學習主款式 Ji̍t-ji̍t ha̍k-sip Tsú khoán-sik
快傳福音愛積極 Khoài-thoân hok-im ài tsik-ki̍k
樂意服侍閣盡責 Lo̍k-ì ho̍k-sāi koh tsīn-tsik

七十週年教會史 Tshit-tsa̍p tsiu-nî kàu-hōe-sú
十分虔誠感謝主 Tsa̍p-hun khiân-sêng kám-siā Tsú
週年回顧感動久 Tsiu-nî hôe-kò͘ kám-tōng kú
年長信仰真可取 Nî-tióng sìn-gióng tsin khó-tshú

感謝救主的大恩 Kám-siā Kiù-tsú ê tōa-un
恩典滿滿用有賰 Un-tián móa-móa ēng ū tshun
禮拜熱心蔭囝孫 Lé-pài jia̍t-sim ìm kiáⁿ-sun
拜主上帝大人君 Pài Tsú Siōng-tè toā-jîn-kun

信仰堅定攏共心 Sìn-gióng kian-tēng lóng kāng-sim
仰望真理傳福音 Gióng-bōng tsin-lí thoân hok-im
傳湠後代咱責任 Thn̂g-thòaⁿ āu-tāi lán tsik-jīm
湠開信仰日日深 Thuaⁿ-khui sìn-gióng ji̍t-ji̍t tshim

宣揚福音大真光 Suan-iông hok-im tōa-tsin-kng
揚棄偶像有擔當 Iông-khì ngó͘-siōng ū tam-tng
福音真理莫抛荒 Hok-im tsin-lí mài pha-hng
音樂佈道傳家庄 Im-ga̍k pò͘-tō thoân ka-tsng


路竹教會佇1946年10月25設教
佇2016年10月23舉行設教70週年感恩禮拜
主題:信仰傳湠、宣揚福音