《台語kah魔術》

 | | | 轉寄

台南山線遊記

作者 蘇晏德 2017.01.29

台南山線遊記

2016年1月初2拜六烏陰天，早時9點半出發，今仔日ê目的地是台南市ê南化、左
鎮、新化，tsit三ê行政區原本攏屬tī台南縣，縣市合併以後屬台南市ê行政區，雖
罔tsit三ê所在m̄-sī第一擺來，m̄-koh以前對tsit-ê所在無特別ê斟酌，tsit擺
是因為beh去南化烏山看猴，順紲來一回深度ê旅遊。

第一站：『南化烏山』，一家三人，車tsiūⁿ路竹交流道上北，沿國道1號轉台86號
轉國道3號，轉對國道8號終點到新化，轉台20、20乙線看著橫向ê台3線，mài
uat直行到目的地烏山。Tsit-ê所在來過幾若擺，幾若冬無來、一切攏變ah，遊
客、猴仔、生理擔攏變少，感覺無以前ê tshia-iāⁿ，山頂ê猴攏走落來kah人做
朋友，tsia-ê猴仔看--起來tsiâⁿ友善，因為人ē買塗豆kah芎蕉hōo猴仔做等路
（禮物）。大約tī-tsia半點鐘，車駛落山到南化市區ê菜市仔食tàu，雖罔tsia
是南化上鬧熱ê行政中心，m̄-koh人口無濟，市區無幾條街仔路，南化是台南市人口上少ê所在。食完中晝、頭家娘in讀國小六年ê查某囝出來收錢，我叫伊愛講台語
救台灣，伊隨用台語講：我會會曉講，我會認真講台語；我講以後會閣來kā lín捧
場；叫人講台語是台語人ê責任，tsit-ê查某囡仔hō͘我留落真深ê印象，南化後擺
我會閣來。

第二站：『左鎮二寮山』，離開南化沿台20乙線、南168線、來到崗仔林
（kong-á-nâ）長老教會，tsit間教會是英國ê馬雅各醫生來台南醫療傳教ê時，
有患者受馬雅各醫生ê大愛精神感動，在地人對基督教福音ê渴慕，信徒同心合力
tī-tsia開設tsit間教會，雖罔會友無濟，m̄-koh意義重大。Sòa接uat過南162
線來到二寮山，tsia是台南人看日出上好ê地點，peh tsiūⁿ觀景台四周圍攏是
山，tsia是台南有名ê惡地月世界，雖罔是中晝因為罩霧ê關係，所以視線並無清
楚，khiā tī-tsia著kán-ná進入仙境kāng款。翻頭beh去新化，看著hōo人放
sak ê崗仔林國小kah崗仔林派出所，bat聽過廢校、第一擺看著廢掉ê派出所，可
能tsia-ê人口siūⁿ-sió，警察無代誌做，自按呢kā伊廢掉。

第三站：『新化老街』，車沿南168線經過大坑休閒農場，（tsia是台灣羅馬字協
會2015年辦年會ê所在地）、到虎頭埤轉台19甲線，開始落sap-sap-á雨，來到新
化老街，怪奇！哪會無看著戴警察帽仔ê新化警察分局，原來已經拆掉起tī中山路ê
郊外。車tī市區慢慢仔pōng，tī信義路kah護安路口看著大目降故事館（大目降是
新化ê古早名），tsia有幾若棟日本式ê建築，雨笠gia̍h--leh來參觀看看leh。
大目降早期有平埔族Siraya族群tī-tsia 蹛，意思著是山林ê地。停無久tō徙跤
來到台19甲kah太平街ê交叉路口，tī太子宮ê頭前有人teh排隊，啥貨ah！哪會
tsiah-nī濟人teh排隊，原來是beh買『麥克炸雞塊』，我問在地ê阿婆：he是足
好食hiooh？今仔日哪會排hia長，伊講：he猶無算長o͘h，阿婆講伊攏m̄-bat買
來食。車uat過忠孝路，kāng款ê情形閣發生一擺，路邊猶原足濟人teh排隊，原來
是beh買蔥仔餅。車經過新化高中uat過中山路，駛無偌久tō看著厝頂戴警察帽仔新
化警察分局，阮tī-tsia hip一張相片，然kî後車駛tsiūⁿ高速公路，踏入回鄉ê
路途，雨繼續落、車寬寬仔駛、風景liâu-liâu-á欣賞，又閣是美好ê一日，台南
感謝--你。