《台語kah魔術》

 | | | 轉寄

0308婦女節

作者 蘇晏德 2024.03.03

婦女節(台語文) Hū-lú-tseh

三月初八婦女節
Saⁿ-gue̍h tshe-peh Hū-lú-tseh
婦女雙手上美麗
Hū-lú siang-tshiú siōng bí-lē
啥物空課伊攏會
Siáⁿ-mih khang-khòe i lóng ē
你是阮的天佮地
Lí sī goán ê thiⁿ kah tē

婦女雙手捒搖笱
Hū-lú siang-tshiú sak iô-kô
共咱細囝當作寶
Kā lán sè-kiáⁿ tòng-tsò pó
你的恩情像江河
Lí ê un-tsêng tshiūⁿ kang-hô
會當予囝通倚靠
Ē-tàng hō͘ kiáⁿ thang óa-khò

細囝生長靠婦女
Sè-kiáⁿ sing-tióng khò hū-lú
婦女功能真特殊
Hū-lú kong-lêng tsin te̍k-sû
教囝道理像老師
Kà kiáⁿ tō-lí tshiūⁿ lāu-su
教咱做人佮做事
Kà lán tsò-lâng kah tsò-sū

男人成功婦女助
Lâm-jîn sêng-kong hū-lú tsō͘
婦女角色足辛苦
Hū-lú kak-sik tsiok sin-khó͘
教囝踏出第一步
Kà kiáⁿ ta̍h-tshut tē-it pō͘
予咱美好的前途
Hō͘ lán bí-hó ê tsiân-tô͘