《台語kah魔術》

 | | | 轉寄

0901記者節

作者 蘇晏德 2023.08.27

記者節(台語文)
Kì-tsiá-tseh

九月初一記者節
Káu-gue̍h tshe-it kì-tsiá-tseh
無論日時抑暗暝
Bô-lūn ji̍t--sî ah àm-mê
毋管風雨抑落雪
M̄-koán hong-hō͘ ah lo̍h-seh
重大新聞走若飛
Tiōng-tāi sin-bûn tsáu ná pe

記者任務真重要
Kì-tsiá jīm-bū tsin tiōng-iàu
專業智識愛會曉
Tsuan-gia̍p tì-sik ài ē-hiáu
頭腦清楚有絕招
Thâu-náu tshing-tshó ū tsua̍t-tsiau
內容充實閣有料
Lōe-iông tshiong-si̍t koh ū liāu

記者採訪足辛苦
Kì-tsiá tshái-hóng tsiok sin-khó͘
毋管透風抑落雨
M̄-koán thàu-hong ah lo̍h-hō͘
新聞報導袂耽誤
Sin-bûn pò-tō bē tam-gō͘
趕緊放送來傳播
Kóaⁿ-kín hòng-sàng lâi thoân-pò͘

記者工課誠趣味
Kì-tsiá khang-khòe tsiâⁿ tshù-bī
特定採訪講台語
Te̍k-tēng tshái-hóng kóng Tâi-gí
報導美食佇夜市
Pò-tō bí-si̍t tī iā-tshī
親像明星上電視
Tshin-tshiūⁿ bêng-tsheⁿ tsiūⁿ tiān-sī