《台語kah魔術》

 | | | 轉寄

高雄中會九十週年~啟應文

作者 蘇晏德 2020.09.13

Ko-hiông Tiong-hōe Káu-tsa̍p Tsiu-nî Kám-un Lé-pài~Khé-èng-bûn
高雄中會九十週年感恩禮拜~啟應文
Tsóng-tsú-tê kah Bo̍k-piau：Thoân-sêng Sio̍k-thiⁿ Kè-ta̍t, Kiàn-li̍p Hong-sēng Sán-gia̍p.
總主題佮目標：傳承屬天價值、建立豐盛產業

Khé：Ko-hiông tiong-hōe kòe seⁿ-ji̍t, Kèng-pài Siōng-tè pâi tē-it.
啟：高雄中會過生日，敬拜上帝排第一。
Èng：Hiaⁿ-tī tsí-moāi ài tsīn-tsit, Sìn-gióng hóe-tséng m̄-thang sit.
應：兄弟姊妹愛盡職，信仰火種毋通熄。
Khé：Káu-tsa̍p tsiu-nî ê tséng-tsí, Hok-im Ko-hiông thoân--tshut-khì.
啟：九十週年的種子，福音高雄傳--出去。
Èng：Siōng-tè put-piàn ê tsin-lí, Pêng-an hí-lo̍k tōa huaⁿ-hí.
應：上帝不變的真理，平安喜樂大歡喜。
Khé：Sìn-tô͘ kun-tòe Tsú kha-pō͘, Kám-siā Siōng-tè ê pó-hō͘.
啟：信徒跟綴主跤步，感謝上帝的保護。
Èng：Ài gîm Sèng-si lâi huan-ho͘, Tsì-hó pêng-iú sī Iâ-so͘.
應：愛吟聖詩來歡呼，至好朋友是耶穌。
Khé：Ūi Tsú tsò-kang kiâⁿ thiⁿ-lō͘, Khîn-tha̍k Sèng-king ím kam-lō͘.
啟：為主做工行天路，勤讀聖經飲甘露。
Èng：Iâ-so͘ sī lán pī-lān-só͘, M̄-kiaⁿ tú-tio̍h tōa hong-hō͘.
應：耶穌是咱避難所，毋驚拄著大風雨。
Khé：Tsiân-pòe kà lán Pe̍h-ōe-jī, Tāu-tshài-gê-á tsin tshù-bī.
啟：前輩教咱白話字，豆菜芽仔真趣味。
Èng：Hō͘ lán ē-hiáu gîm Sèng-si, Beh tha̍k Sèng-king tsin piān-lī.
應：予咱會曉吟聖詩，欲讀聖經真便利。
Khé：Suan-iông hok-im káu-tsa̍p tang, Kám-siā Iâ-so͘ ê thiàⁿ-thàng.
啟：宣揚福音九十冬，感謝耶穌的疼痛。
Èng：Siōng-tè un-tián m̄-thang tshàng, Tōa hó siau-sit kín pò--lâng.
應：上帝恩典毋通藏，大好消息緊報--人。
Khé：Ko-kú Siōng-tè ê tōa-kî, Hiông-su tsing-ping kiâⁿ--tshut-khì
啟：高舉上帝的大旗，雄師精兵行--出去。
Èng：Tiong-hing sìn-gióng thoân hiuⁿ-lí, Hōe-iú sūn-thàn Tsú kà-sī.
應：中興信仰傳鄉里，會友順趁主教示。
Khé：Káu-tsa̍p tsiu-nî kàu-hōe-sú, Tsa̍p-hun khiân-sêng kám-siā Tsú.
啟：九十週年教會史，十分虔誠感謝主。
Èng：Tsiu-nî hôe-kò͘ kám-tōng kú, Nî-tióng sìn-gióng tsin khó-tshú.
應：週年回顧感動久，年長信仰真可取。
Khé：Kám-siā Siōng-tè ê tōa-un, Un-tián móa-móa ēng ū tshun.
啟：感謝上主的大恩，恩典滿滿用有賰。 Èng：Lé-pài jia̍t-sim ìm kiáⁿ-sun, Pài Tsú Siōng-tè tōa jîn-kun.
應：禮拜熱心蔭囝孫，拜主上帝大人君。
Khé：Seⁿ-kin huat-hio̍h tī Ko-hiông, Ji̍t-ji̍t kiàn-tsèng sim kian-kiông.
啟：生根發葉佇高雄，日日見證心堅強。
Èng：Khoài thoân hok-im hiòng-tsêng tshiong, Lo̍k-ì ho̍k-sāi koh tsīn-tiong.
應：快傳福音向前衝，樂意服侍閣盡忠。
Khé：Thoân-sêng sìn-gióng ê tséng-tsí, Sêng-tsiap sio̍k-thiⁿ ê hok-khì.
啟：傳承信仰的種子，承接屬天的福氣。
Èng：Sio̍k-lêng sèⁿ-miā thòaⁿ--tshut-khì, Thiⁿ-téng hok-hūn ū ìn-kì.
應：屬靈性命湠出去，天頂福份有印記。
Khé：Kè-ta̍t sìn-liām sèng n̂g-kim, Ta̍t-tit kóng-thoân Tsú hok-im.
啟：價值信念勝黃金，值得廣傳主福音。
Èng：Kiàn-li̍p sìn-gióng ji̍t-ji̍t tshim, Li̍p-tiûⁿ kian-tēng lóng kāng-sim.
應：建立信仰日日深，立場堅定攏仝心。
Khé：Hong-sēng hok-im tōa tsin-kng, Sēng-tsêng tsò-kang ū tam-tng.
啟：豐盛福音大真光，盛情做工有擔當。
Èng：Sán-gia̍p huat-iông mài pha-hng, Gia̍p-tsik hong-siu thoân ka-tsng.
應：產業發揚莫拋荒，業績豐收傳家庄。

註：2020年高雄中會成立90週年