《台語kah魔術》

 | | | 轉寄

0615警察節

作者 蘇晏德 2023.06.11

＊警察節 Kéng-tshat-tseh
六月十五警察節 La̍k-gue̍h tsa̍p-gō͘ kéng-tshat-tseh
警察護民閣安家 Kéng-tshat hō͘ bîn koh an-ke
維持治安勤務濟 Î-tshî tī-an khîn-bū tsē
規年辛苦愛鼓勵 Kui-nî sin-khó͘ ài kó͘-lē

警察精神真偉大 Kéng-tshat tsing-sîn tsin úi-tāi
天災地變愛救災 Thian-tsai tē-piàn ài kiù-tsai
代誌艱苦愛忍耐 Tāi-tsì kan-khó͘ ài jím-nāi
拒絕引誘愛正派 Kī-tsua̍t ín-iú ài tsiàⁿ-phài

警察任務足辛苦 Kéng-tshat jīm-bū tsiok sin-khó͘
毋管透風抑落雨 M̄-koán thàu-hong ah lo̍h-hō͘
暗時出勤毋驚烏 Àm-sî tshut-khîn m̄-kiaⁿ o͘
頭殼清楚袂糊塗 Thâu-khak tshing-tshó bē hô͘-tô͘

警察作穡真拍拚 Kéng-tshat tsoh-sit tsin phah-piàⁿ
拄著困難攏毋驚 Tú-tio̍h khùn-lân lóng m̄-kiaⁿ
看著賊仔趕緊掠 Khòaⁿ-tio̍h tsha̍t-á kóaⁿ-kín lia̍h
祝恁平安閣勇健 Tsiok lín pêng-an koh ióng-kiāⁿ