《台語kah魔術》

 | | | 轉寄

五月節0505

作者 蘇晏德 2025.05.25

五月節(台語文)
Gō͘-gue̍h-tseh

五月初五肉粽節
Gō͘-gue̍h tshe-gō͘ Bah-tsàng-tseh
阿媽縛粽來送禮
A-má pa̍k-tsàng lâi sàng-lé
肉粽毋通食傷濟
Bah-tsàng m̄-thang tsia̍h siuⁿ-tsē
若無嘛會傷身體
Nā-bô mā-ē siong sin-thé

五月初五縛肉粽
Gō͘-gue̍h tshe-gō͘ pa̍k bah-tsàng
相招做伙掛香芳
Sio-tsio tsò-hóe kòa hiuⁿ-phang
香芳會當趕蠓蟲
Hiuⁿ-phang ē-tàng kóaⁿ báng-thâng
予咱豐收好年冬
Hō͘ lán hong-siu hó-nî-tang

五月初五扒龍船
Gō͘ gue̍h tshe-gō͘ pê-lêng-tsûn
鑼鼓齊響有氣氛
Lô-kó͘ tsê-hiáng ū khì-hun
拚看啥人著冠軍
piàⁿ khòaⁿ siáⁿ-lâng tio̍h kuan-kun
祝咱風調閣雨順
Tsiok lán hong-tiâu koh ú-sūn

五月初五來插艾
Gō͘-gue̍h tshe-gō͘ lâi tshah-hiāⁿ
保咱身體較勇健
Pó lán sin-thé khah ióng-kiāⁿ
逐家插艾佇門埕
Ta̍k-ke tshah-hiāⁿ tī mn̂g-tiâⁿ
台灣平安向前行
Tâi-oân pêng-an hiòng-tsêng-kiâⁿ